ဝၼ်းတီႈ 14 လိူၼ်ၵျူႊလၢႆႊၼႆႉ ၵေႃႇမတီႇ ၾၢႆႇဢွၼ်ႁူဝ်ၶူင်းၵၢၼ် ပၵ်းပိူင် CEIR တင်း EIR သိုၵ်းမၢၼ်ႈ ပိုၼ်ၽၢဝ်ႇဝႃႈ – ၾူၼ်း (မိုဝ်းထိုဝ်) ဢၼ်ဢဝ်ၼွၵ်ႈမိူင်းသေ တေႃႉၶဝ်ႈမႃးၼႂ်းမိူင်းမၢၼ်ႈ လူၺ်ႈသဵၼ်ႈတၢင်းၼမ်ႉ၊ ႁိူဝ်းမိၼ် လႄႈ ဢၼ်ၶဝ်ႈမႃးၸွမ်းလႅၼ်လိၼ်ၸိူဝ်းၼၼ်ႉ တေလႆႈ တၢင်ႇ မၢႆၾၢင် ၶိူင်ႈၸၢၵ်ႈၾူၼ်းဝႆႉ ၼႂ်းပၵ်းပိူင် CEIR (ၾၢႆႇမၢၼ်ႈႁွင်ႉဝႃႈ – ဗဟိုမိုဘိုင်းစက်ပစ္စည်း သက်သေခံမှတ်ပုံတင် စနစ်)၊ သင်ဢမ်ႇသႂ်ႇၶွၼ်ႇႁဵတ်းၸွမ်း ၼင်ႇၶၢဝ်းယၢမ်း မၵ်းမၼ်ႈဝႆႉၸိုင် တေလႆႈၺႃးတၢမ်ႇ ဝႃႈၼႆ။

ၸွမ်းၼင်ႇ ၼႂ်းၶေႃႈပိုၼ်ၽၢဝ်ႇၼၼ်ႉသေ ၵူၼ်းဢွၵ်ႇၶၢဝ်းတၢင်း ၸိူဝ်းလုၵ်ႉတီႈဝၢင်းႁိူဝ်းမိၼ်ၵူႈမိူင်းမိူင်း ၶဝ်ႈမႃးၼႂ်းမိူင်းၼၼ်ႉ မီးသုၼ်ႇတေႃႉဢဝ် ၾူၼ်း(မိုဝ်းထိုဝ်) ၶဝ်ႈမႃးၸွမ်းလႆ သွင်လုၵ်ႈပႃးၾူၼ်း ဢၼ်ၸဝ်ႈၵဝ်ႇၸႂ်ႉတိုဝ်းဝႆႉ။

ၾူၼ်း(မိုဝ်းထိုဝ်) ၸိူဝ်းပႆႇလႆႈတၢင်ႇ မၢႆၾၢင်ဝႆႉ တီႈၼႂ်းပၵ်းပိူင် CEIR ၼၼ်ႉ ႁႂ်ႈၵႂႃႇဢဝ် Passenger Declaration Form (PD Form) တီႈ ၵွင်ႇတႃႇ ၾၢႆႇၵဵပ်းၶွၼ်ႇဝၢင်းႁိူဝ်းမိၼ်သေ တႅမ်ႈသႂ်ႇပၼ် မၢႆ IMEI ၾူၼ်းၸဝ်ႈၵဝ်ႇသေ ပိုၼ်ၽၢဝ်ႇဝႆႉ။

တႄႇဢဝ်ဝၼ်းပိုၼ်ၽၢဝ်ႇသေ ၼႂ်းၶၢဝ်းတၢင်း 30 ဝၼ်း တေလႆႈဢဝ်ၽိုၼ်လိၵ်ႈလၢႆး ၸိူဝ်းမၵ်းမၼ်ႈဝႆႉ ၼၼ်ႉသေ တၢင်ႇယိုၼ်ႈထိုင်တီႈၸုမ်း CEIR OSS လႄႈ သႂ်ႇၶွၼ်ႇ ၸွမ်းၼင်ႇတမ်းဝၢင်းဝႆႉ။ သင်ပူၼ်ႉၵႂႃႇ 30 ဝၼ်းလႄႈ ဢမ်ႇႁဵတ်းသၢင်ႈ ၸွမ်းၼင်ႇလၢတ်ႈမႃးၸိုင် လိူဝ်သေငိုၼ်းၶွၼ်ႇယဝ်ႉ တေၺႃး တၢမ်ႇ မႂ်ငိုၼ်းပႃး ဝႃႈၼႆဝႆႉ။

ၵူၼ်းဢွၵ်ႇၶၢဝ်းတၢင်း ၼိုင်ႈၵေႃႉၼႆႉ တႄႇဢဝ်ဝၼ်းပိုၼ်ၽၢဝ်ႇ PD Form ပွၵ်ႈၵမ်းၼိုင်ႈၼၼ်ႉယဝ်ႉ ၼိုင်ႈပီလႂ် မီးသုၼ်ႇတၢင်ႇယိုၼ်ႈလႆႈ တႃႇၾူၼ်း (မိုဝ်းထိုဝ်) သွင်လုၵ်ႈၵူၺ်း။ ၾူၼ်း (မိုဝ်းထိုဝ်) ၸိူဝ်းဢမ်ႇပႃးၼႂ်းသဵၼ်ႈမၢႆ (Whitelist) ဢမ်ႇလႆႈတၢင်ႇမၢႆၾၢင် ၾူၼ်းဝႆႉၸိူဝ်းၼၼ်ႉ တေၺႃး ပိၵ်ႉဢိုတ်း ပႅတ်ႈ လွင်ႈၸႂ်ႉတိုဝ်းလႅင်းၾူၼ်း (မိုဘိုင်းကွန်ရက်လိုင်း) ၼႆယဝ်ႉ။