ၸုမ်းယိပ်းၵွင်ႈၵၢင်ႇၶဝ်ႈယူႇသဝ်းတူင်ႉၼိုင်ၼႂ်းဝၢၼ်ႈလႄႈ တႄႇဢဝ် ႁူဝ်လိူၼ်ၻီႊသႅမ်ႊပိူဝ်ႊ 2021 ၼႆႉမႃး ၵူၼ်းဝၢၼ်ႈတႃႈတေႈ ၸႄႈဝဵင်းသီႇပေႃႉ ၵူဝ်ပဵၼ်ပၢင်တိုၵ်း၊ တႃႇလင်ၶႃးႁိူၼ်း မွၵ်ႈ 30 လင် ဢွၼ်ၵၼ်ငိူင်ႉဝႄႈဝႆႉထႃႈ ယၢပ်ႇၽိုတ်ႇတီႈယူႇတီႈၵိၼ်။

ၵူၼ်းဝၢၼ်ႈတႃႈတေႈ ဢွၼ်ၵၼ်မႃးသွၼ်ႈဝႆႉတီႈ ဝၢၼ်ႈတူင်ႈၸၢင်ႉ ၸႄႈဝဵင်းသီႇပေႃႉ ၸဵမ်မိူဝ်ႈႁူဝ်လိူၼ်ၼႆႉမႃး ။

ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ပီႈၼွင်ႉဝၢၼ်ႈတႃႈတေႈ လင်ၶႃး ႁိူၼ်း တင်းမူတ်းတေမီး 30 လင်ၼႆႉၶႃႈ။ ဢၼ် ယူႇၸွမ်းႁိူၼ်းယေး ပီႈၼွင်ႉၽႂ်မၼ်း ၸိူဝ်းၼႆႉ ၵေႃႈ မီးထႅင်ႈၶႃႈဢေႃႈ။ ပၢႆႈၽေးသိုၵ်းတႄႉ  ဢမ်ႇၸႂ်ႈ ၼင်ႇၵဝ်ႇ။ တေလႆႈဝႃႈ ငိူင်ႉဝႄႈဝႆႉထႃႈ  ၶႃႈဢေႃႈ။ ယွၼ်ႉတပ်ႉပွင်းၸူႉတူင်ႉၼိုင်ၶဝ်ႈမႃးၼႂ်းဝၢၼ်ႈလႄႈ ၵူဝ်ပဵၼ်ပၢင်တိုၵ်း   မိူၼ်မိူဝ်ႈၵူႈပွၵ်ႈၼႆသေဢွၼ်ၵၼ် ငိူင်ႉ  ဢွၵ်ႇမႃး ၵူၺ်း။ ယၢမ်းလဵဝ် ဢၼ်လူဝ်ႇတၢင်းၸွႆႈထႅမ်တႄႉ လွင်ႈၵိၼ် ယႅမ်ႉၽၵ်းၶဵဝ် ၸိူဝ်းၼႆႉၶႃႈဢေႃႈ”- ဝႃႈၼႆ။

ၵူၼ်းဝၢၼ်ႈတႃႈတေႈ ဢၼ်လႆႈငိူင်ႉဝႄႈဝႆႉထႃႈ မႃးသွၼ်ႈဝႆႉ တီႈဝၢၼ်ႈတူင်ႉၸၢင်ႉ တေမီးၶၢဝ်းတၢင်း 3-4 ဝၼ်းၼႆႉယဝ်ႉ ၵမ်ႈၽွင်ႈ ႁဵတ်းသုမ်ႉသွင်း ယူႇသဝ်းၵၼ် ၵမ်ႈၽွင်ႈ ၵႂႃႇသွၼ်ႈယူႇဝႆႉ ၸွမ်းႁိူၼ်း ယေးပီႈၼွင်ႉၽႂ်မၼ်းၸိူဝ်းၼႆႉၵေႃႈမီး  ။