မေႃသွၼ်ၸိူဝ်းသၢၼ်ၶတ်းဢႃႇၼႃႇသိုၵ်းမီးၼမ်လႄႈမေႃသွၼ်ဢမ်ႇၵုမ်ႇ တီႈဝဵင်းႁူဝ်ပူင်းၸိုင်ႈတႆးပွတ်းၸၢၼ်း၊ သိုၵ်းမၢၼ်ႈလႆႈႁွင်ႉဢဝ်မေႃသွၼ်တၢင်ႇတီႈမႃးထႅမ်ႁႅင်း၊ မေႃသွၼ်ၸိူဝ်းတူၵ်ႈပုၼ်ႈၽွၼ်းဝႆႉတီႈဝၢၼ်ႈ ၵႆဝဵင်းၼၼ်ႉၵေႃႈ ႁိပ်ႈၼႅတ်ႈႁႃတၢင်းတႃႇလႆႈၶၢႆႉၶဝ်ႈမႃးယူႇၼႂ်းဝဵင်းၶိုၼ်း။
ယၢမ်းလဵဝ် မေႃသွၼ်တၢင်ႇတီႈၸိူဝ်းၼၼ်ႉၶဝ်ႈမႃးႁၢပ်ႇၵၢၼ်တီႈႁူင်းႁဵၼ်းၸၼ်ႉငဝ်ႈမၢႆ 6 လႄႈ ၸၼ်ႉဢွၼ် ၸိူဝ်းၼႆႉ။
မေႃသွၼ် CDM ႁူဝ်ပူင်းၵေႃႉၼိုင်ႈၵေႃႈလၢတ်ႈတီႈၽူႈတွႆႇႁွၵ်ႈဝႃႈ -”ၵမ်ႈၽွင်ႈၵေႃႈပဵၼ်ၶိုၼ်းၵူၼ်းႁူဝ်ပူင်းၵူၺ်းၼင်ႇၵဝ်ႇ။ ၵူၺ်းၶဝ်ၵႂႃႇတူၵ်းပုၼ်ႈၽွၼ်းတၢင်းဝၢၼ်ႈပုၼ်ႉလႄႈၶဝ်သမ်ႉၶႂ်ႈမႃးယူႇႁိူၼ်းၶိုၼ်း၊ ၶႂ်ႈမႃးႁူင်းႁဵၼ်းၼႂ်းဝဵင်းၼၼ်ႉၼႃႇ ။လႆႈငိၼ်းဝႃႈယဵတ်ႈမွၼ်ငိုၼ်းသေၸင်ႇမႃးၼႆ လႆႈပၼ်ၵႃႈႁိုဝ်တႄႉၶႃႈၵေႃႈဢမ်ႇႁူႉလီလီ” – ဝႃႈၼႆ။
တီႈႁူင်းႁဵၼ်းၸၼ်ႉသုင်ၵေႃႈ မေႃသွၼ်တိုၵ်ႉႁႅင်းဢႄႇဝႆႉလႄႈ ဢၼ်တေၶၢႆႉၶဝ်ႈမႃးမႂ်ႇ ထႅင်ႈၵေႃႈမီးယူႇ ဝႃႈၼႆ။
“ႁူင်းႁဵၼ်းၸၼ်ႉသုင်ၼႆတႄႉတေၶဝ်ႈယၢပ်ႇဢိတ်းဢိတ်းၶႃႈၼေႃႈ။ ငိုၼ်းၵေႃႈလႅပ်ႈတေလႆႈပၼ်ၼမ်ၶႃႈဢေႃႈ။ ” – ဝႃႈၼႆ။
တီႈဝဵင်းႁူဝ်ပူင်းၼႆႉမီး ႁူင်းႁဵၼ်းၸၼ်ႉသုင် 2 လင်။ ႁူင်းႁဵၼ်းၸၼ်ႉငဝ်ႈ မၢႆ 2 မၢႆ 5 မၢႆ 6 ၊ ႁူင်းႁဵၼ်းယၢၼ်ႇၵိၼ်းလႄႈ ႁူင်းႁဵၼ်းၸၼ်ႉဢွၼ် ၼႆသေ မီး 7 လင်။
တီႈဝဵင်းႁူဝ်ပူင်းၼႆႉ ၵူၼ်းပဵၼ်ၶူဝ်ႊဝိတ်ႉ တိုၵ်ႉမီးယူႇသေတႃႉ သိုၵ်းမၢၼ်ႈပိုၼ်ၽၢဝ်ႇပိုတ်ႇႁူင်းႁဵၼ်းၶိုၼ်း မိူဝ်ႈဝၼ်းတီႈ 1/11/2021 ပတ်းပိုၼ်ႉၸိုင်ႈမိူင်း ။ ဢၼ်ဢမ်ႇလႆႈပိုတ်ႇႁူင်းႁဵၼ်းမိူဝ်ႈပိူၼ်ႈသမ်ႉ 46 ၸႄႈဝဵင်း ပတ်းပိုၼ်ႉမိူင်းႁူမ်ႈတုမ်။ ၼႂ်းၼၼ်ႉ မိူင်းတႆးပႃး 26 ၸႄႈဝဵင်း။ ထိုင်ဝၼ်းတီႈ 30/11/2021 သိုၵ်းမၢၼ်ႈသင်ႇပိုတ်ႇႁူင်းႁဵၼ်းထႅင်ႈ ၸုပ်ႈၼိုင်ႈ။ ၼႂ်းၼၼ်ႉ မိူင်းတႆးပႃး 14 ၸႄႈဝဵင်း ။
ပဵၼ်ဝဵင်း ႁူဝ်ပူင်း၊ လွၵ်ႉၸွၵ်ႇ၊ ပၢင်လွင်း၊ လၢႆးၶႃႈ၊ ၼမ်ႉၸၢင်၊ လႃႈသဵဝ်ႈ၊ ၼွင်ၶဵဝ်၊ ၵူတ်ႉၶၢႆ၊ ၼမ်ႉၶမ်း၊ မၢၼ်ႈပဵင်း၊ သႅၼ်ဝီ၊ ၵုၼ်လူင်၊ ၵဵင်းတုင်လႄႈ မိူင်းယွင်း – ၸိူဝ်းၼႆႉ။ ၵိုတ်း 12 ၸႄႈဝဵင်းၵေႃႈ တေပိုတ်ႇၵႂႃႇတူၺ်းၵမ်းဢိတ်းဢိတ်းလႆႈႁူႉၼင်ႇၼႆ။
