ၵူၼ်းၼုမ်ႇ 6 ၵေႃႉ တီႈဝဵင်းၾၢႆၶုၼ် သိုၵ်းမၢၼ်ႈ တီႉၵႂႃႇ မိူဝ်ႈႁူဝ်လိူၼ်ၼူဝ်ႊဝႅမ်ႊပိူဝ်ႊ ပူၼ်ႉမႃးၼၼ်ႉ ယၢမ်းလဵဝ် ႁၢႆဝႆႉ 3 ၵေႃႉ ပေႃႈမႄႈပီႈၼွင်ႉၸိူဝ်ႉၶိူဝ်းတင်းႁိူၼ်းယေး ပဵၼ်ဢၼ်မႆႈၸႂ် ။
ၵူၼ်းၼုမ်ႇ/ ၵူၼ်းဝၢၼ်ႈ ဝၢၼ်ႈဢၼ်ၶႂၢၵ်ႈမႂ်ႇ(ဝၢၼ်ႈမႂ်ႇ) ၼႂ်းၸႄႈဝဵင်းၾၢႆၶုၼ် ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ထုၵ်ႇၶွင်ႇသီႇသိုၵ်း မၢၼ်ႈ ယိုတ်းမိူင်း တီႉၺွပ်းၵုမ်းတူဝ်ၵႂႃႇ မိူဝ်ႈဝၼ်းတီႈ 8/11/2021 ပူၼ်ႉမႃး တင်းမူတ်း 6 ၵေႃႉ ယၢမ်းလဵဝ် ၵိုတ်းဝႆႉ 3 ၵေႃႉ ႁၢႆ ဝႆႉ 3 ၵေႃႉ ၼႆယဝ်ႉ။
ၵူၼ်းပိုၼ်ႉတီႈ ဝဵင်းၾၢႆၶုၼ် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းၵူၼ်းၼုမ်ႇၺႃးၺွပ်းၵႂႃႇၼၼ်ႉ တင်းမူတ်း 6 ၵေႃႉ ပႃးပေႃႈၶဝ် ၵႂႃႇၵေႃႉၼိုင်ႈ ။ ၵူၺ်းၵႃႈ မိူဝ်ႈလဵဝ်ၼႆႉ ဢၼ်မီးတီႈႁူင်းပလိၵ်ႈၼႆႉ မီးဝႆႉ 3 ၵေႃႉၵူၺ်းၶႃႈ။ ထႅင်ႈ 3 ၵေႃႉၼၼ်ႉတႄႉ ႁၢႆၵႂႃႇလႂ်ဢမ်ႇႁူႉ။ ပဵၼ်ႁိုဝ် မီးႁိုဝ်ၵေႃႈ ဢမ်ႇႁူႉ ဢမ်ႇလႆႈငိၼ်းၶၢဝ်ႇငၢဝ်းသင်ၸွမ်းၶႃႈ”- ဝႃႈၼႆ။
ၵူၼ်းၼုမ်ႇဢၼ်ၵိုတ်းဝႆႉၼႂ်းႁူင်းပလိၵ်ႈ 3 ၵေႃႉၼၼ်ႉ ပေႃးၸိူဝ်ႉ ၶိူဝ်းပီႈၼွင်ႉ ၵႂႃႇႁူပ်ႉထူပ်းၼႆ ပၼ်ၶၢဝ်းယၢမ်း ဢုပ်ႇတေႃႇၵၼ် ၼိုင်ႈၵေႃႉလႂ် ၼိုင်ႈမိၼိတ်ႉ ၵူၺ်း။ ဢမ်ႇတၼ်းလႆႈထၢမ်လွင်ႈလီလွင်ႈၸႃႉ ၵူၼ်းပဵၼ်ၵူၼ်းႁၢႆ ၵွပ်ႈၼႆလႄႈ ၸိူဝ်း 3 ၵေႃႉ ႁၢႆၵႂႃႇတၢင်းလႂ်ဢမ်ႇႁူႉ ၼႆယဝ်ႉ။
“ၶဝ်ပၼ်ၶၢဝ်းယၢမ်း လႆႈလၢတ်ႈတေႃႇၾူၼ်းတေႃႇၵၼ် ၼိုင်ႈၵေႃႉ ၼိုင်ႈမိၼိတ်ႉၵူၺ်းၶႃႈ ဢမ်ႇတၼ်းလႆႈထၢမ် သင်ၵႃႈႁိုဝ်။ ယၢမ်းလဵဝ်ပဵၼ်ႁိုဝ်ဝႆႉ ၸွင်ႇပၢႆးယူႇလီတဵမ်ထူၼ်ႈ ၸိူဝ်းၼႆႉၵေႃႈ ဢမ်ႇတၼ်း လႆႈထၢမ်သင်ၶႃႈ”- ၵူၼ်းပိုၼ်ႉတီႈ ၾၢႆၶုၼ် လၢတ်ႈၼႄၼင်ႇၼႆ။
ဝၢႆးသိုၵ်းၵူၼ်းမိူင်း PDF တင်း ၶွင်ႇသီႇသိုၵ်းမၢၼ်ႈ ယိုတ်းမိူင်း ပဵၼ်ပၢင်တိုၵ်းၵၼ်မႃး ၼႂ်းဝဵင်းၾၢႆၶုၼ်ၼႆႉ သိုၵ်းမၢၼ်ႈ ၸႂ်ႉလၢႆးမိူၵ်ႈမႂ်ႈ တေႃႇ ၵူၼ်းမိူင်း တီႉၺွပ်းၵူၼ်းမိူင်း မႃးႁၢဝ်ႈႁႅင်း။ ယၢမ်းလဵဝ်ၵေႃႈ ပေႃးႁၼ် ၵူၼ်းမိူင်းၸွမ်းတႃႈၸွမ်းတၢင်းၼႆ ႁွင်ႉၵိုတ်းသေ ၵူတ်ႇထတ်းၸႅတ်ႈထၢမ် ၸိူင်ႉၼႆမႃးႁၢဝ်ႈႁႅင်း ႁဵတ်းႁႂ်ႈၵူၼ်းမိူင်း ဢမ်ႇႁတ်းဢွၵ်ႇႁိူၼ်းယေးၵၼ် ယွၼ်ႉဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ