မိူဝ်ႈၼႆႉ ဝၼ်းတီႈ 2/12/2021 ယၢမ်းၵၢင်ၼႂ် ပူႇၵႄႇၼုမ်ႇ ဝၢၼ်ႈတႃႈလူင် ၺႃးၵူၼ်းႁၢႆႉ ယိုဝ်းတၢႆ ၼႂ်းၵၢတ်ႇလူင် ဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

ၵေႃႉၺႃးယိုဝ်းတၢႆ ၼႂ်းၵၢတ်ႇသီႇပေႃႉၼၼ်ႉ ၸိုဝ်ႈႁွင်ႉၸၢႆးၼၼ်ႇတေႃး တိုၵ်ႉႁပ်ႉၼႃႈတီႈပုၼ်ႈၽွၼ်း ပဵၼ်ပူႇၵႄႇ ဝၢၼ်ႈတႃႈလူင်မႃး လႆႈလိူၼ်ပၢႆ မၼ်းၸၢႆးၼႆႉ ဢႃယု တိုၵ်ႉမီးမွၵ်ႈ 30 ပီ။

ၵူၼ်းသီႇပေႃႉၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆးတိုၵ်ႉသိုဝ်ႉၽၵ်းယူႇၶႃႈ ၵူၼ်းႁၢႆႉ ယိုဝ်းမၼ်း မၢၵ်ႇၵွင်ႈၶဝ်ႈတူဝ် 2 ၵမ်း မၼ်းၸၢႆးပိၼ်ႈလူမ်ႉၵႂႃႇ။ ၽိူဝ်ႇၸုမ်းၸွႆႈထႅမ် မႃးဢဝ်တူဝ်မၼ်းၸၢႆး တေၵႂႃႇသူင်ႇႁူင်းယႃၼႆ တၢႆပႅတ်ႈၵၢင်တၢင်းသေယဝ်ႉဢေႃႈ။ ၵူၼ်းမႃးယိုဝ်း မၼ်းၼၼ်ႉၵေႃႈ ပဵၼ်ၽႂ် ၸုမ်းလႂ် ပႆႇႁူႉၶႃႈ”- ဝႃႈၼႆ။

ဝၢၼ်ႈတႃႈလူင်ၼႆႉ ယူႇၸဵင်ႇႁွင်ႇဝၼ်းတူၵ်းၼမ်ႉလၼ်ႈ၊ ၸဵင်ႇၸၢၼ်းဝၼ်းတူၵ်းဝဵင်းသီႇပေႃႉ၊ မီးၼႂ်းၵႄႈလႅၼ်ၶႅၼ်ႇ ၸႄႈဝဵင်းၵျွၵ်ႉမႄး တင်းၸႄႈဝဵင်းသီႇပေႃႉ။ ယွၼ်ႉၸမ်တၢင်းသီႇပေႃႉလႄႈ ၶဝ်ႈၵၢတ်ႇ ဝဵင်းသီႇပေႃႉ။

တၢင်းထုင်ႉၼၼ်ႉ သိုၵ်း SSPP တင်း RCSS ႁိမ်တီႈယူႇၵၼ် လေႃႇယိုဝ်း တိုၵ်းတေႃးၵၼ် ၊ မၢင်ႇၽဝ်ႇၵေႃႈ တေပဵၼ် ပၼ်ႁႃ ဝူင်ႈၵၢင်သွင်ၸုမ်း ႁိုဝ်ဢမ်ႇႁူႉၼႆ ၵူၼ်းၼႂ်းပိုၼ်ႉတီႈ လၢတ်ႈၼင်ႇၼႆ။

ၼႂ်းဝူင်ႈၼႆႉၵူၺ်း ယူႇတီႈၽူႈၵွၼ်းပွၵ်ႉ/ ဢိူင်ႇ ၼႂ်းၸႄႈဝဵင်းသီႇပေႃႉ ပၼ်ၾၢင်ႉထိုင် ၵူၼ်းၼႂ်းမူႇဝၢၼ်ႈၽႂ်မၼ်း ဝႃႈ ပေႃးယၢမ်းၵၢင်ၶမ်ႈ ၵၢင်ၶိုၼ်း ၽႂ်မႃးႁွင်ႉ မႃးတွႆႇၽၵ်းတူ ၵေႃႈ ယႃႇပေပိုတ်ႇလႃးလႃး ၵူဝ်ပဵၼ်ၵူၼ်းၵေႃႇၵၢၼ်ႁၢႆႉဝႃႈၼႆ။

ၵၢတ်ႇလူင် ဝဵင်းသီႇပေႃႉၼႆႉ ယွၼ်ႉတၢင်းပဵၼ် ၶူဝ်ႊဝိတ်ႉသေ ႁပ်းမႃး 5 လိူၼ်ပၢႆ ။ တိုၵ်ႉတႄႇပိုတ်ႇမႃးၶိုၼ်း မိူဝ်ႈဝႃး ဝၼ်းတီႈ 1/12/2021 ၼႆႉၵူၺ်း။