ၵူၼ်းၶၢႆထီႇ (ထီႇမိူင်းမၢၼ်ႈ) လႅၼ်ငိုၼ်းၵူၼ်းမိူင်း ဝဵင်းလႃႈသဵဝ်ႈဝႃႈ တိူဝ်ႉထီႇ 2 ဝႂ် တႃႇငိုၼ်း 100 သႅၼ်ပျႃး တေၵႂႃႇထုတ်ႈဢဝ်ငိုၼ်းမႃးပၼ် ၼႆသေ ယွၼ်းဢဝ်ငိုၼ်းၵႂႃႇ 11 သႅၼ်ပျႃးဝႃႈၼႆ။
ၼႂ်းလိူၼ်ၼူဝ်ႊဝႅမ်ႊပိူဝ်ႊ 2021 ပူၼ်ႉမႃးၼႆႉ ၵူၼ်းဝၢၼ်ႈဢိူင်ႇၼွင်မွၼ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၵေႃႉၼိုင်ႈ ထုၵ်ႇ ၵူၼ်းၶၢႆႇထီႇ လႅၼ်ဢဝ်ငိုၼ်းၵႂႃႇ တင်းမူတ်း 11 သႅၼ်ပျႃး ၊ လၢတ်ႈဝႃႈတေၵႂႃႇထုၵ်ႈငိုၼ်းဢၼ်တိူဝ်ႉထီႇ ၼၼ်ႉမႃးပၼ်ၼႆသေ ထိုင်ယၢမ်းလဵဝ် ၵပ်းသိုပ်ႇတိတ်းတေႃႇၵေႃႈ ဢမ်ႇလႆႈ ။
ၵူၼ်းၼႂ်းမုင်ႉႁေႃႁိူၼ်း ဢၼ်ထုၵ်ႇၺႃးလႅၼ်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈတႄႇမၼ်းၼၼ်ႉ ၶဝ်မႃးၶၢႆထီႇ ၼိုင်ႈ ဝႂ်လႂ် 5,500 ပျႃး ။ တီႈႁိူၼ်းသမ်ႉ သိုဝ်ႉ 10 ဝႂ် တႃႇငိုၼ်း 55,000 ပျႃး မိူဝ်ႈဝၼ်းတီႈ 12/11/2021 ၼၼ်ႉ။ ထိုင်မႃးထႅင်ႈ ဝူင်ႈၼိုင်ႈ မိူဝ်ႈဝၼ်းတီႈ 18 ၼၼ်ႉ ၵူၼ်းၶၢႆထီႇၶိုၼ်းမႃး လၢတ်ႈဝႃႈ သူတိူဝ်ႉထီႇသွင်ဝႂ်။ ၼိုင်ႈဝႂ်လႂ် သူလႆႈ 50 သႅၼ်ပျႃး သွင်ဝႂ်လႆႈ 100 သႅၼ်ပျႃး။ ၵူၺ်းၵႃႈ သူတေလႆႈပၼ်ငိုၼ်းဝႆႉ ၼိုင်ႈဝႂ် 550,000 ပျႃး ၊ သွင်ဝႂ် 11 သႅၼ်ပျႃး ။ ႁဝ်းတေၵႂႃႇဢဝ် ငိုၼ်းမႃးပၼ်သူၼႆလႄႈ တီႈႁိူၼ်းသမ်ႉ ထၢင်ႇဝႃႈတိူဝ်ႉၼႆသေ ပၼ်ၵႂႃႇ။ ထီႇဢၼ်တိူဝ်ႉၼၼ်ႉ မၼ်းတိူဝ်ႉဝႂ်လႂ်ၼႆၵေႃႈၶဝ်ဢမ်ႇလၢတ်ႈ။ တင်းမူတ်း 10 ဝႂ် ဢၼ်ႁဝ်းၶႃႈ သိုဝ်ႉဝႆႉၼၼ်ႉ” – ဝႃႈၼႆ။
ထိုင်မႃး ဝၼ်းတီႈ 23/11/2021 ၼႆႉ ယူႇတီႈ ၵူၼ်းႁိူၼ်း ၺႃးလႅၼ်ၼၼ်ႉ ၵပ်းၸူး ၵူၼ်းၶၢႆထီႇ ။ ၵူၼ်းၶၢႆထီႇလၢတ်ႈဝႃႈ တေမႃးပၼ်ၼႆသေ ႁၢၼ်ႉတေႃႇထိုင်ယၢမ်းလဵဝ် ၵပ်းသိုပ်ႇတိတ်းတေႃႇၶိုၼ်းၵေႃႈ ဢမ်ႇလႆႈယဝ်ႉ ဝႃႈၼႆ။
“ ၶဝ် ပၼ်ဝႆႉ ၵွင်ႇဢၼ်ၼိုင်ႈ မိူဝ်ႈၶဝ်မႃးဢဝ်ငိုၼ်း 11 သႅၼ်ၼၼ်ႉ။ ၶဝ်ဝႃႈ ပေႃးထႅင်ႈဝူင်ႈၼိုင်ႈ ပေႃးႁဝ်းမႃး ပၼ်ငိုၼ်းသူၼႆ ႁဝ်းၸင်ႇ ပိုတ်ႇ ၵွင်ႇၼႆႉ ၸွမ်းၵၼ် ၶဝ်ဝႃႈၸိူင်ႉၼႆ။ ထိုင်မႃးဝၼ်းတီႈ 23 ၶွပ်ႈတဵမ်ၼိုင်ႈဝူင်ႈယဝ်ႉ ထူဝ်းႁႃၶဝ်သေ ၶဝ်ၵေႃႈ ဢမ်ႇမႃး။ ႁဝ်းၶႃႈ ပိုတ်ႇတူၺ်းၼႂ်းၵွင်ႇ ၼၼ်ႉ မီးပပ်ႉဝႆႉ သွင်ပပ်ႉၵူၺ်းၶႃႈ”- ၵူၼ်းၼႂ်းမုင်ႉႁေႃႁိူၼ်းၼၼ်ႉ သိုပ်ႇလၢတ်ႈၼင်ႇၼႆ။
ၵူၼ်းမႃးၶၢႆထီႇ မိူဝ်ႈဝၼ်းတီႈ 12/11/2021 ပူၼ်ႉမႃးၼႆႉ ပဵၼ်ၵူၼ်းတၢင်းလိၼ်ထုင်ႉပဵင်း ။ ဝႃႈပဵၼ် တူဝ်တႅၼ်း ၸုမ်းၶၢႆထီႇ သူၺ်ႇမျၢၼ်ႇမႃႇၼႆသေ ၶဝ်ႈၶၢႆထီႇ ၼႂ်းမူႇဝၢၼ်ႈ ၽႅဝ်ၼႂ်းႁေႃၼႂ်းႁိူၼ်းယေးၸိူဝ်းၼႆႉ ဝႃႈၼႆ။
“ၵူၼ်းမႃးၶၢႆၼၼ်ႉ ပဵၼ်ၵူၼ်းမိူင်းမၢၼ်ႈ ယူႇတၢင်းမေႃႇပီႇၼႆဝႃႇ။ ပူၼ်ႉမႃးပႆႇႁိုင်ၼႆႉ ၵူၼ်းၼႂ်းဢိူင်ႇႁဝ်းၶႃႈၼႆႉ ၺႃးလႅၼ်ၸိူင်ႉၼႆၵႂႃႇယဝ်ႉပွၵ်ႈၼိုင်ႈ။ သုမ်းငိုၼ်း 50 သႅၼ်ပျႃးၼင်ႇၵဝ်ႇၶႃႈ၊ ၵူၼ်းပႅတ်ႉလႅၼ်ႁဵတ်းၵိၼ် ၸိူဝ်းၼႆႉ ဢမ်ႇၸႂ်ႈဝႃႈ တီႈႁဝ်းၶႃႈ ပွၵ်ႈလဵဝ်ဢွၼ်တၢင်းၵူၺ်း ၶဝ်လႅပ်ႈႁဵတ်းၵိၼ်ပႅတ်ႈမႃးလၢႆပွၵ်ႈယဝ်ႉ”- ၵူၼ်းၼႂ်းမုင်ႉႁေႃႁိူၼ်းၼၼ်ႉ သိုပ်ႇ လၢတ်ႈၼႄထႅင်ႈၼင်ႇၼႆ။
ဝၼ်းမိူဝ်ႈၼႆႉ ႁႃၵိၼ်လဵင်ႉတွင်ႉယၢပ်ႇ ၵူၼ်းလႅၼ်လိူင်ႇ၊ သင်ပဵၼ်လႆႈတႄႉ ယႃႇပေယုမ်ႇပိူၼ်ႈငၢႆႈ၊ ယႃႇပေလႃႈလီပၼ်ငိုၼ်း ၵူဝ်လႆႈသုမ်း – ၵူၼ်းမုင်ႉႁေႃႁိူၼ်း ဢိူင်ႇၼွင်မွၼ်လႃႈသဵဝ်ႈ ဢၼ်ၺႃးလႅၼ်ၼၼ်ႉ ၾၢၵ်ႇၵႂၢမ်းလၢတ်ႈၼင်ႇၼႆ။
မိူဝ်ႈဝၼ်းတီႈ 26/10/2021 ၼၢင်းယိင်းၵေႃႉၼိုင်ႈ ယူႇပွၵ်ႉ 4 ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၼၼ်ႉၵေႃႈ မီးၵူၼ်းႁဵတ်း Facebook ပွမ်/ တု သေဢုပ်ႇၸွမ်းမၼ်းၼၢင်းမႃးမီးၶၢဝ်းတၢင်း မွၵ်ႈၼိုင်ႈဝူင်ႈ။ ဢၢၼ်းလႅၼ်ဢဝ်ငိုၼ်း 10 သႅၼ်ပျႃး ။ ၼၼ်ႉတႄႉ တၼ်းၶိုတ်းဝႆးသေ ဢမ်ႇတၼ်းလႆႈသုမ်းၸွမ်း။
မိူၼ်ၼႆၼင်ႇၵဝ်ႇ ပူၼ်ႉမႃး4-5 လိူၼ်ၼႂ်းပီၼႆႉ ၸဝ်ႈၶူးၼၼ်ႇတႃႇသီႇရိ ၸႄႈဝဵင်းတၢင်ႉယၢၼ်း ၸူဝ်ႈၶၢဝ်းဝဵင်းတႃႈၵုင်ႈၵေႃႈ မီးၵူၼ်းၼွၵ်ႈမိူင်း ၵေႃႉၼိုင်ႈ သူင်ႇၶူဝ်းတွၼ်ႈ ပၼ် ၼႆသေ လႅၼ်ဢဝ်ငိုၼ်း 600 တေႃႊလႃႊ တူၵ်းငိုၼ်းမၢၼ်ႈ 9 သႅၼ်ပျႃး ။
