ပူႇၵႄႇ ဝၢၼ်ႈၵုၼ်ၼိူဝ် ၼွင်တဝ်း မိူင်းမၢဝ်း ၺႃးသိုၵ်းၵူၼ်းမိူင်း ၾၢႆႇႁူမ်ႇလူမ်ႈ လႅၼ်လိၼ် မိူင်းၶႄႇ ပေႃႉထုပ်ႉ မၢတ်ႇၸဵပ်း လႆႈသူင် ႁူင်းယႃမိူင်းမၢဝ်း သေ ယူတ်းယႃတူဝ် ၊ ၵူၼ်းမိူင်းဢမ်ႇႁၢၼ်ႉၸႂ် ဢွၵ်ႇၼႄၵၢင်ၸႂ် တုၵ်းယွၼ်းလွင်ႈၽဵင်ႇပဵင်း။
ဝၼ်းတီႈ 28/11/2021 ၼႆႉ ၵူၼ်းဝၢၼ်ႈ ၵုၼ်ၼိူဝ် ၼွင်တဝ်း ဢွၵ်ႇၼႄ ၵၢင်ၸႂ်တေႃႇ လူင်ပွင်ၸိုင်ႈၶႄႇ လႄႈ သိုၵ်းၶႄႇ ၊ တုၵ်းယွၼ်း လွင်ႈၽဵင်ႇပဵင်း ဢၼ် ပူႇၵႄႇ ဝၢၼ်ႈၵုၼ်ၼိူဝ် ၺႃးသိုၵ်းၶႄႇ ပေႃႉထုပ်ႉ မိူဝ်ႈဝၼ်းတီႈ 26/11/2021 ၼၼ်ႉ။
ၵူၼ်းဝၢၼ်ႈၵုၼ်ၼိူဝ် လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆးၵႂႃႇၼႃးသေ ပွၵ်ႈမႃး ထုၵ်ႇၸုမ်းၾၢႆႇႁူမ်ႇလူမ်ႈၶႄႇ ဢဵၼ်ႁႅင်း 28 ၵေႃႉၼႆႉ ထုပ်ႉပေႃႉ ။ မၼ်းၸၢႆးပဵၼ်ၵူၼ်းလီ၊ ၸႂ်လီၵေႃႉၼိုင်ႈၶႃႈဢေႃႈ။ ယၢမ်းလဵဝ် မၼ်းၸၢႆးမၢတ်ႇၸဵပ်းသေ လႆႈသူင်ႇယူတ်းယႃတူဝ်ဝႆႉ တီႈႁူင်း ယႃမိူင်းမၢဝ်းဝႆႉၶႃႈ”- ဝႃႈၼႆ။
မိူဝ်ႈဝၼ်းတီႈ 26/11/2021 ၼၼ်ႉယၢမ်းဝၢႆးဝၼ်း ၸၢႆးဢၢႆႈဢူင်းၽေႇ ဢႃယု 30 ပၢႆ ပူႇၵႄႇဝၢၼ်ႈၵုၼ်ၼိူဝ် ဢိူင်ႇၼွင်တဝ်း ၸႄႈဝဵင်းမိူင်းမၢဝ်း ၼႃႈ လိၼ်ၽွင်းငမ်းတူဝ်ၵဝ်ႇတႂ်ႈၶူင်း မိူင်းၶႄႇ ၺႃးၸုမ်းသိုၵ်းၵူၼ်းမိူင်း ပႂ်ႉလႅၼ်လိၼ် မိူင်းၶႄႇ 28 ၵေႃႉ ပေႃး ထုပ်ႉမၼ်း မၢတ်ႇၸဵပ်း ထိုင်တီႈပေႃးလႆႈသူင်ႇယူတ်းယႃတူဝ် ။
“ပူႇၵႄႇႁဝ်းၶႃႈ ၵႂႃႇႁဵတ်းၼႃးသေပွၵ်ႈမႃး ၼႃးၵေႃႈ ဢမ်ႇမီးၵႆ မီးႁိမ်းဝၢၼ်ႈၵူၺ်း။ ႁဝ်းၶႃႈ ၵူၼ်းဝၢၼ်ႈ ဢမ်ႇႁၢၼ်ႉၸႂ် ႁူမ်ႈၵၼ်ဢွၵ်ႇၼႄၵၢင်ၸႂ်သၢၼ်ၶတ်းတေႃႇ ၶဝ်ဢေႃႈ။ ၶဝ်ပေႃႉထုပ်ႉ ႁဵတ်းႁၢႆႉပိူၼ်ႈယဝ်ႉ ၶဝ်ဢမ်ႇတူၺ်းထိုင်သင်ၶိုၼ်း ။ ပလိၵ်ႈၶႄႇ မႃးဢဝ်ၶဝ် ၵႂႃႇမူတ်းယဝ်ႉၶႃႈ” – ၵူၼ်းဝၢၼ်ႈ ၵုၼ်ၼိူဝ် သိုပ်ႇလၢတ်ႈၼႄၼင်ႇၼႆ။
ၼႂ်းဝၼ်းတီႈ 28/11/2021 ၼၼ်ႉ ၵူၼ်းလူင် ၾၢႆႇၽွင်းငမ်း မိူင်းၶႄႇ မႃးႁူပ်ႉ ၵူၼ်းဝၢၼ်ႈ သေ လၢတ်ႈဝႃႈ တေပၼ်တၢင်းၽိတ်း ၵူၼ်းၸိူဝ်းပူၼ်ႉပႅၼ်၊ ပူႇၵႄႇဝၢၼ်ႈၵေႃႈ တေႁပ်ႉပုၼ်ၽွၼ်းယူတ်းယႃပၼ်ဝႃႈၼႆ။
တၢင်းပဵၼ်ၶူဝ်ႊဝိတ်ႉၽႄႈ၊ လူင်ပွင်ၸိုင်ႈ မိူင်းၶႄႇ သမ်ႉပိၵ်ႉႁပ်းလႅၼ်လိၼ် ပိၵ်ႉႁပ်း မူႇဝၢၼ်ႈ ဢမ်ႇပၼ်ၵူၼ်းၵႂႃႇမႃး ၶဝ်ႈဢွၵ်ႇၵၼ်၊ ၵူၼ်းမိူင်း ၸိူဝ်းႁႃၵိၼ်ယၢပ်ႇ လႄႈ မိူဝ်ႈႁူဝ်လိူၼ်ၼႆႉ ၸၢဝ်းတႆး ၸိူဝ်းယူႇ ၾင်ႇတၢင်းမိူင်းၶႄႇ ဢွၵ်ႇၼႄ ၵၢင်ၸႂ်၊ လူင်ပွင်ၸိုင်ႈၶႄႇ ႁပ်ႉႁူပ်ႉၵႄႈလိတ်ပၼ်လႄႈ ပၼ်ႁႃယဝ်ႉၵႂႃႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ