ၾႆးမႆႈႁိူၼ်းၵူၼ်းမိူင်းထၢၼ်ႇတလၢၼ်း မိူင်းၶျၢင်း ပဵၼ်ပွၵ်ႈၵမ်းသၢမ် မႆႈႁိူၼ်းယေးၵူၼ်းမိူင်း 49 လင်ပဵၼ်ၽဝ်ႇ ဢမ်ႇမီးၵူၼ်းယူႇလႄႈ ဢမ်ႇမီးၽႂ်ႁတ်းၶႄ။
ၾႆးၼႆႉတႄႇမႆႈ ဝၼ်းတီႈ 24 ယၢမ်းၵၢင်ၶမ်ႈ တီႈပွၵ်ႉ ၸူင်ႊမုၼ်ႊ လႄႈ ပွၵ်ႉၵျွင်းလၢၼ်း ဢမ်ႇမီးၵူၼ်းၶႄႈလႄႈ ၾႆးလၢမ်းမႆႈထိုင် ဝၼ်းတီႈ 25 ။ ႁိူၼ်း 49 လင် ယဵၼ်းပဵၼ်ၽဝ်ႇ။ မႆႈပႃး ၵျွင်းၽြႃးၶရိတ်ႉယၼ်ႇ Thantlang Centenary Baptist Church ၼႆ The Chin Journal ဢွၵ်ႇဝႆႉၼင်ႇၼႆ။
တင်ႈဢဝ်လိူၼ် သႅပ်ႉထႅမ်ႊပိူဝ်ႊမႃး ႁိူၼ်းၵူၼ်းတီႈဝဵင်းထၢၼ်ႊတလၼ်ႊ မိူင်ၶျၢင်း ၵမ်းၵမ်းၺႃး ၸုတ်ႇၽဝ်။ ဢၼ်ၾႆးမႆႈၵမ်းၼႆႉပဵၼ်ၵမ်းထူၼ်ႈ 5။ မိူဝ်ႈႁူဝ်လိူၼ်ၼႆႉၵေႃႈ သိုၵ်းမၢၼ်ႈယိုဝ်းၵွင်ႈ ၸုတ်ႇၽဝ်ႁိူၼ်းၵူၼ်းမိူင်း ။ ၾႆးမႆႈၵႂႃႇ 195 လင်လႄႈ ၵျွင်းၽြႃး 2 လင်။ ၽွင်းၼၼ်ႉ မီးသြႃႇၾၢႆႇသႃႇသၼႃႇၶရိတ်ႉ ၵေႃႉ 1 ဢၢၼ်းၵႂႃႇၶႄၾႆး ၊ ၺႃးသိုၵ်းမၢၼ်ႈယိုဝ်းတၢႆ – ၶၢဝ်ႇမိူင်းၶျၢင်း ဢွၵ်ႇဝႆႉၼင်ႇၼႆ။
တီႈမိူင်းၶျၢင်းၼႆႉ သိုၵ်းၵူၼ်းၼုမ်ႇၶျၢင်း ငွႆးယိုဝ်းတပ်ႉသိုၵ်းမၢၼ်ႈ ၊ ထိုင်တီႈသိုၵ်းမၢၼ်ႈမီးလွင်ႈလူႉတၢႆမၢတ်ႇၸဵပ်း၊ လႆႈထွႆထွၼ်တပ်ႉပၢင်သဝ်းလႄႈ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း။ ၵူၼ်းဝဵင်းထၢၼ်ႊတလၼ်ႊ ဢမ်ႇႁတ်းယူႇသဝ်းၼႂ်းႁိူၼ်းယေး ဢွၼ်ၵၼ်ပၢႆႈၽေးသိုၵ်းၵႂႃႇမူၵ်းထိူၼ်ႇမူၵ်းယုမ်း။ သိုၵ်းမၢၼ်ႈပိုတ်းယိုဝ်းၾႆးၽဝ်ႁိူၼ်းၵူၼ်းၼႂ်းဝဵင်းထၢၼ်ႊတလၼ်ႊ ။ ၾႆးမႆႈ 5 ၵမ်းၼႆႉတင်းမူတ်းႁိူၼ်းၵူၼ်းမိူင်းၺႃးၽဝ်ၵႂႃႇ 244 လင်၊ ၵျွင်းၽြႃးၶရိတ်ႉယၼ်ႊ ၺႃးၽဝ် 3 လင် ယဝ်ႉ။
