မိူဝ်ႈၼႆႉ ဝၼ်းတီႈ 25/11/2021 ယၢမ်းၵၢင်ၼႂ် မွၵ်ႈ 10 မူင်း ၽၵ်းတူမိူင်း ၵျိၼ်ႊသၢၼ်ႊၵျေႃႊ လႅၼ်လိၼ်တး – ၶႄႇ တီႈဝဵင်းပၢင်ႇသၢႆး ၸႄႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ တႄႇၸၢမ်းပိုတ်ႇတူၺ်း ပၼ်ၵႃးတၢင်ႇၶူဝ်းၵုၼ်ႇ (ၶွၼ်ႊထဵၼ်ႊၼိူဝ်ႊ) လုၵ်ႉမိူင်းၶႄႇၶဝ်ႈမႃး 5 လမ်း ဝႃႈၼႆ။
ၸဝ်ႈၵႃး ၵေႃႉၼိုင်ႈ တီႈပၢင်ႇသၢႆး လၢတ်ႈတီႈၽူႈတွႆႈႁွၵ်ႈဝႃႈ– “မိူဝ်ႈၼႆႉ ၶဝ်ပိုတ်ႇၽၵ်းတူၵမ်းၼိုင်ႈ ၵႃးလူင်တၢင်ႇၶူဝ်းၵုၼ်ႇ လုၵ်ႉမိူင်းၶႄႇၶဝ်ႈမႃး တီႈၽၵ်းတူၵျိၼ်ႊသၢၼ်ႊၵျေႃႊ ၼႆႉ 5 လမ်းၶႃႈ။ ၼႂ်း 5 လမ်းၼၼ်ႉ မႃးၽႅဝ်ဝႆႉတီႈမူႇၸေႊ 3 လမ်း တီႈ ၵျိၼ်ႊသၢၼ်ႊ ၵျေႃႊ 2 လမ်း”- ဝႃႈၼႆ။
မိူဝ်ႈၽုၵ်ႈဝၼ်းတီႈ 26/11/2021 ယၢမ်းၵၢင်ၼႂ် 8:30 မူင်းၼႆႉ တေပိုတ်ႇထႅင်ႈၵမ်းၼိုင်ႈ မိူဝ်ႈၽွင်းၼၼ်ႉ ၵႃးလူင်တၢင်ႇၶူဝ်းၵုၼ်ႇ (ၶွၼ်ႊထဵၼ်ႊၼိူဝ်ႊ) တၢင်းမိူင်းတႆးၼႆႉ တေၶဝ်ႈၵႂႃႇ တၢင်းမိူင်းၶႄႇ 5 လမ်း။ ၵႃးလူင် (Container) တၢင်းမိူင်းၶႄႇ တေၶဝ်ႈမႃးတၢင်းမိူင်းတႆးၼႆႉ 5 လမ်း တေပဵၼ်ၵႃးၶူဝ်းၵုၼ်ႇ ၵွၼ်ႇတႅင်ႇၼႃႇၵူၺ်း ဝႃႈၼႆ။
“သင်ၸိူဝ်ႉဝႃႈ ႁဵတ်းၼႆ ၽုၺ်ႇၵႂႃႇၽုၺ်ႇမႃးသေ ငဝ်းလၢႆးမၼ်းလီၼႆႉတႄႉ ၽၵ်းတူၼႆႉ မၼ်းတေ ၸၢင်ႈပိုတ်ႇၵႂႃႇပဵၼ်တၢင်းၵၢၼ်ယူႇ”- ၸဝ်ႈၵႃး လူင် ပၢင်ႇသၢႆး လၢတ်ႈၼႄၼင်ႇၼႆထႅင်ႈ။
ၶွမ်ႊပၼီႊဢၼ်ၵွင်ႉတၢင်းမိူင်းၶႄႇလႄႈ တၢင်းလူင်ပွင်ၸိုင်ႈမိူင်းၶႄႇ တႃႇတေၶဝ်ႈဢွၵ်ႇၵႂႃႇမႃးလႆႈၼႆႉ ပဵၼ်ၶွမ်ႊပၼီႊမၢၵ်ႇႁိၼ်ၶမ်း ၼႆယဝ်ႉ ။
ၵမ်ႈၼမ် ၶူဝ်းၵုၼ်ႇ ဢၼ်လုၵ်ႉတၢင်မိူင်းတႆး မိူင်းႁူမ်ႈတုမ် တေႃႉၶဝ်ႈ တၢင်းၽၵ်းတူၵျိၼ်ႊသၢၼ်ႊၵျေႃႊ ၼႆႉသမ်ႉ တေပဵၼ်မၢၵ်ႇမႆႉ၊ ၶဝ်ႈ၊ ထူဝ်ႇ၊ ၶဝ်ႈၵၢပ်ႇ ၸဵမ်ၸိူဝ်းၼႆႉ။
ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းလႄႈ လူင်ပွင်ၸိုင်ႈၶႄႇ သင်ႇပိၵ်ႉၽၵ်းတူလႅၼ်လိၼ်တႆး – ၶႄႇ တီႈမူႇၸေႊ ၸိုင်ႈတႆးပွတ်း ႁွင်ႇ ၵူႈႁူး တႄႇပိၵ်ႉဢိုတ်းမႃး မိူဝ်ႈဝၼ်းတီႈ 1/4/2020 မႃးတေႃႇ ထိုင်ယၢမ်းလဵဝ် ပႆႇပိုတ်ႇပၼ်ၵူၼ်းၶဝ်ႈဢွၵ်ႇၵႂႃႇမႃးၶိုၼ်း မီးၶၢဝ်းတၢင်းပီပၢႆယဝ်ႉ ပႆႇပိုတ်ႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ