ၽွင်းၶၢဝ်းလူဝ်ႇလူင်းႁႆႈလူင်းၼႃး ၸိူင်ႉၼႆ ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း ၸုမ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်း ၵၼ် တၢင်းထုင်ႉမိူင်းယေႃ ၸႄႈဝဵင်းလႃႈသဵဝ်ႈ ထပ်းၵၼ်လၢႆဝၼ်း၊ ၵူၼ်းၵႂႃႇၼႃး ပၢတ်ႇၶဝ်ႈယၢပ်ႇ။
တႄႇဢဝ် ႁၢင်လိူၼ်ဢွၵ်ႊထူဝ်ႊပိူဝ်ႊမႃး တေႃႇထိုင် ဝၼ်းတီႈ 24/11/2021 ၼႆႉ သိုၵ်းမၢၼ်ႈ တပ်ႉမ 99 တင်း ၸုမ်း ဢူၺ်းလီ ပွတ်းႁွင်ႇ ပဵၼ်ပၢင်တိုၵ်းၵၼ် ၸွမ်းသၢပ်ႇၼမ်ႉယၢဝ် ထုင်ႉမိူင်းယေႃ ၸႄႈဝဵင်းလႃႈသဵဝ်ႈ လၢႆလၢႆၵမ်း။ ႁဵတ်းႁႂ်ႈ ၵူၼ်းမိူင်းၼႂ်းပိုၼ်ႉတီႈ ၵႂႃႇမႃး သိုဝ်ႉၶၢႆယၢပ်ႇ၊ လူင်းႁႆႈ လူင်းၼႃးယၢပ်ႇ။ ဢၼ်ပဵၼ် ထပ်းၵၼ်မႃး လၢႆဝၼ်းတႄႉ ၼႂ်းၵႄႈ မိူင်းယေႃ တင်း မိူင်းယၢင်း ၾၢႆႇဢွၵ်ႇ ဝဵင်းလႃႈသဵဝ်ႈ။
“မိူဝ်ႈဝႃး တင်း မိူဝ်ႈၼႆႉတႄႉ သဵင်ၵွင်ႈၶႂ်ႈႁႅင်းဝႆႉၶႃႈဢေႃႈ။ သိုၵ်းမၢၼ်ႈတႄႉ ပဵၼ်တပ်ႉမ 99 ဢေႃႈ။ ၶဝ်ယိုဝ်းၵၼ် ၼႂ်းထိူၼ်ႇ ႁိမ်းသၢပ်ႇႁႆႈ သၢပ်ႇသူၼ်လႄႈ ၵူၼ်းႁဵတ်းႁႆႈ တႄႉ ဢမ်ႇႁတ်းၵႂႃႇႁႆႈၶႃႈ။ ၵူၼ်းႁဵတ်းၼႃး ႁိမ်းႁွမ်း မိူင်းယေႃ ၼႆႉတႄႉ ၵႂႃႇယူႇၶႃႈ။ ပေႃးသဵင်ၵွင်ႈတႅၵ်ႇႁႅင်းၵေႃႈ ၼႅတ်ႈပွၵ်ႈမႃးႁိူၼ်းၶိုၼ်းၼၼ်ႉၶႃႈၼႃႇ”- ၵူၼ်း မိူင်းယေႃ လၢတ်ႈၽူႈတွႆႇႁွၵ်ႈၼင်ႇၼႆ။
ၼႂ်းထုင်ႉမိူင်းယေႃၼႆႉ မီးၸုမ်းဢူၺ်းလီပွတ်းႁွင်ႇ ဢၼ်မီး သိုၵ်းၶၢင် KIA၊ သိုၵ်းရၶႅင်ႇ AA၊ သိုၵ်းၵူဝ်းၵၢင်ႉ MNDAA၊ သိုၵ်း SSPP/SSA လႄႈ သိုၵ်းလွႆ TNLA ၸိူဝ်းၼႆႉတူင်ႉၼိုင်ယူႇသဝ်းဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ