ၽွင်းၵူၼ်းဝၢၼ်ႈ ဢွၼ်ၵၼ်ပၢႆႈၽေးသိုၵ်းယူႇၼၼ်ႉ ပၢင်တိုၵ်းသိုပ်ႇပဵၼ်တၢင်းဝၢၼ်ႈ ၶျွင်းသူင်ႇ ၸႄႈဝဵင်းသီႇပေႃႉ မၢၵ်ႇလူင်တူၵ်းသႂ်ႇႁိူၼ်းၵူၼ်းဝၢၼ်ႈလင်ၼိုင်ႈ ၾႆးမႆႈ လူႉၵွႆ။
တႄႇဢဝ် ဝၼ်းတီႈ 7-14/11/2021 ၼႆႉမႃး ၵူၼ်းဝၢၼ်ႈၶျွင်းသူင်ႇ၊ ႁၢတ်ႇလႅၼ်ႈ၊ သူၼ်လူင်၊ တႃႈတေႈ၊ မိူင်းတဵမ်၊ ဝၢၼ်ႈမႂ်ႇ၊ ၵုင်းၸၢင်ႈလဵၵ်း ႁူဝ်ၵူၼ်း 400 ပၢႆ ဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉ ဝတ်ႉဢွင်ႇမင်ႇၵလႃႇ ၽူဝ်းတေႃႇ ၼႂ်းဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ။ မိူဝ်ႈၽွင်းၵူၼ်းဝၢၼ်ႈပၢႆႈဢွၵ်ႇမႃးၼၼ်ႉ မၢၵ်ႇလူင် တူၵ်းသႂ်ႇႁိူၼ်းပႃႈသႃႇ ဝၢၼ်ႈၶျွင်းသူင်ႇ တူဝ်ႁိူၼ်းလႄႈ သိုင်ႇ လူႉၵွႆ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇလူင်တူၵ်းသႂ်ႇ ႁိူၼ်းၵူၼ်းဝၢၼ်ႈ လင်ၼိုင်ႈ လူႉၵွႆ ၊ သိုင်ႇလင်ၼိုင်ႈၵေႃႈလူႉၵွႆၶႃႈ။ ၸဝ်ႈႁိူၼ်းတႄႉပဵၼ်ၸႂ်ဢမ်ႇလီသေ ႁႆႈယူႇတင်းဝၼ်းၶႃႈဢေႃႈၼႆႉ။ ၶိုၼ်ႈလႆႁိူၼ်း၊ ၽႃႁိူၼ်း၊ လဵၵ်းမုင်းႁိူၼ်း ၸိူဝ်းၼႆႉၵွႆႁႅင်းၶႃႈဢေႃႈ”- ဝႃႈၼႆ။
မၢၵ်ႇၼၼ်ႉပဵၼ်ၶွင်ၸုမ်းလႂ်ယိုဝ်းမႃးတူၵ်းသႂ်တႄႉဢမ်ႇႁူႉ၊ ယွၼ်ႉဝႃႈ ၽွင်းမၢၵ်ႇတူၵ်းသႂ်ႇႁိူၼ်းၼၼ်ႉ ၵူၼ်းဝၢၼ်ႈဢမ်ႇမီးတီႈဝၢၼ်ႈသေၵေႃႉ ဢွၼ်ၵၼ်ပၢႆႈၽေးသိုၵ်းမႃးသွၼ်ႈတီႈဝတ်ႉၽူဝ်းတေႃႇမူတ်း ၼႆယဝ်ႉ။
တႄႇဢဝ် ႁူဝ်ပီၼႆႉမႃး ယွၼ်ႉ SSPP တင်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း တၢင်းပွတ်းတွၼ်ႈၼၼ်ႉသေ ၵူၼ်းဝၢၼ်ႈႁၢတ်ႇလႅၼ်ႈ၊ ၶျွင်း သူင်ႇ၊ သူၼ်လူင် ၸိူဝ်းၼႆႉ လႆႈပၢႆႈၽေးသိုၵ်းဢွၵ်ႇမႃးယဝ်ႉၵမ်းၼိုင်ႈ။ ဝၢႆးလင်ပၢင်တိုၵ်းယဵၼ် ၵူၼ်းဝၢၼ်ႈပွၵ်ႈမိူဝ်းယူႇဝၢၼ်ႈၶိုၼ်းၼၼ်ႉ ၵူၼ်းဝၢၼ်ႈၶျွင်းသူင်ႇတႄႉ ဢမ်ႇၸၢင်ႈပွၵ်ႈမိူဝ်း ယူႇၶိုၼ်းႁိူၼ်းယေး ယွၼ်ႉသိုၵ်းတူင်ႉၼိုင်ယူႇဝႆလႄႈ လႆႈမႃးသွၼ်ႈယူႇဝႆႉၸွမ်းႁိူၼ်းပီႈၼွင်ႉ/ သိမ်ႇ ဝၢၼ်ႈႁၢတ်ႇလႅၼ်ႈ။ ထိုင် ဝၼ်းတီႈ 7 လိူၼ်ၼႆႉ ၵူၼ်းဝၢၼ်ႈတၢင်းပွတ်းတွၼ်ႈၼၼ်ႉ လႆႈပၢႆႈပၢင်တိုၵ်းဢွၵ်ႇမႃးထႅင်ႈ။ ထိုင်မႃးဝၼ်းတီႈ 14 ၸင်ႇဢွၼ်ၵၼ် ပွၵ်ႈ ၶိုၼ်း။ ၵူၺ်းၵႃႈ ၵူၼ်းဝၢၼ်ႈၶျွင်းသူင်ႇတႄႉ ပႆႇၸၢင်ႈပွၵ်ႈၶိုၼ်းဝၢၼ်ႈၸိူင်ႉပိူၼ်ႈ။ လႆႈၵႂႃႇသွၼ်ႈယူႇၸွမ်းဝၢၼ်ႈႁၢတ်ႇလႅၼ်ႈ ထႅင်ႈ ၶိုၼ်းမိူၼ်ၵဝ်ႇ ၼႆယဝ်ႉ။
ၸွမ်းၼင်ႇ သဵၼ်ႈသၢႆမၢႆ လူင်ပွင်ၸိုင်ႈၵဵပ်းဝႆႉတႄႉ ဝၢၼ်ႈၶျွင်းသူင်ႇၼႆႉ တင်းမူတ်း မီးလင်ၶႃႈႁိူၼ်း 12 လင် ႁူဝ်ၵူၼ်း 41 ၵေႃႉ ။ ပေႃးဢဝ် ၸွမ်းၼႂ်း ပိုၼ်ႉတီႈဝႃႈတႄႉ လင်ႁိူၼ်းမီး 14 လင် ႁူဝ်ၵူၼ်း မွၵ်ႈ 50 ၵေႃႉ ၼႆယဝ်ႉ။
ပွတ်းတွၼ်ႈဝၢၼ်ႈၶျွင်းသူင်ႇ၊ ဝၢၼ်ႈႁၢတ်ႇလႅၼ်ႈလႄႈ ဝၢၼ်ႈသူၼ်လူင် ၼႆႉ သဵၼ်ႈတႃႈ သၢႆတၢင်းရူတ်ႉၵႃး ဢမ်ႇထိုင် ၵူၺ်းပဵၼ်သဵၼ်ႈ တၢင်းၼမ်ႉ တၢင်းႁိူဝ်းၵူၺ်း။ လွင်ႈၵႂႃႇမႃး ၵူၼ်းမိူင်းၼႂ်းပိုၼ်ႉတီႈၵေႃႈ ပဵၼ်ဢၼ်ယၢပ်ႇၽိုတ်ႇၵိၼ်းၸႂ်ႁႅင်း။ မိူဝ်ႈပဵၼ်ပၢင်တိုၵ်း ပွၵ်ႈၼႆႉ ၵူၼ်း ဝၢၼ်ႈ မၢင်ဝၢၼ်ႈ ၸိူဝ်းဢမ်ႇၸၢင်ႈပၢႆႈဢွၵ်ႇမႃးမူတ်း ၵေႃႈမီး။ ယွၼ်ႉပၢႆႈဢွၵ်ႇမႃးယၢပ်ႇ ၼႆယဝ်ႉ။
