ၼႂ်းၸႄႈဝဵင်းမိူင်းၵိုင် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 မီးၵႂႃႇ 295 ၵေႃႉ၊ လူႉတၢႆ 6 ၵေႃႉ ၊ လုၵ်ႈႁဵၼ်းၸၼ်ႉ 7 ၵေႃႈတိတ်းၸပ်းၵေႃႉၼိုင်ႈ။

မိူဝ်ႈဝႃး ဝၼ်းတီႈ 11/11/2021 ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း တင်းမူတ်း 11 ၵေႃႉ ၼႂ်းၼၼ်ႉ ပႃးၽူႈၸၢႆး 5 ၵေႃႉလႄႈ ၽူႈယိင်း 6 ၵေႃႉ ယူႇတီႈႁွင်ႈၵၢၼ်ပၢႆးယူႇလီ မိူင်းၵိုင် ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ၵူၼ်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ ယၢမ်းလဵဝ်ၼႂ်းဝဵင်းမိူင်းၵိုင်တႄႉ လႆႈမႆႈၸႂ်ဝႆႉၶႃႈဢေႃႈ။ ၵူၼ်းပဵၼ်သမ်ႉ ထူပ်းႁၼ် ယူႇၵူႈဝၼ်း၊ ၼိုင်ႈဝၼ်းလႂ် 4-5 ၵေႃႉၶႃႈ” –  ဝႃႈၼႆ။

  ၽွင်းတၢင်းပဵၼ်တိုၵ်ႉလၢမ်းၽႄႈၼမ်ယူႇၼႆႉသိုၵ်းမၢၼ်ႈသမ်ႉ ပိုၼ်ၽၢဝ်ႇပိုတ်ႇႁူင်းႁဵၼ်းၶိုၼ်းလႄႈ   တင်းပေႃႈမႄႈလႄႈ လုၵ်ႈႁဵၼ်း ပဵၼ်ဢၼ်ၸႂ်သုၵ်ႉယုင်ႈ ၾၢႆႇၼိုင်ႈသမ်ႉဢမ်ႇလႆႈႁဵၼ်းလိၵ်ႈမႃးၶၢဝ်းတၢင်း 2 ပီ၊ ၾၢႆႇၼိုင်ႈၵေႃႈ ၵူဝ်ၸပ်းတၢင်းပဵၼ်။ 

ပေႃႈလုၵ်ႈႁဵၼ်း ၵေႃႉၼိုင်ႈ မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈသိုၼ်းၼႆႉ တီႈႁူင်းႁဵၼ်း ၸၼ်ႉသုင် မိူင်းၵိုင် လုၵ်ႈႁဵၼ်းၸၼ်ႉ 7 ၵေႃႉၼိုင်ႈ ၵူတ်ႇထတ်းႁၼ် တိတ်းၸပ်း ၸိူဝ်ႉမႅင်းၶႃႈဢေႃႈ။ ႁဝ်းၶႃႈ ပွႆႇလုၵ်ႈဢွၼ်ႇၵႂႃႇၶိုၼ်ႈႁဵၼ်းၼႆႉၵေႃႈ လႆႈမႆႈၸႂ်ယူႇၶႃႈဢေႃႈ။ သင်ဢမ်ႇၵႂႃႇၶိုၼ်ႈ သမ်ႉ တေႁၢမ်းသုၼ်ႇသမ်းယႃႁႄႉၵင်ႈၶူဝ်ႊဝိတ်ႉ။ တီႈႁူင်းႁဵၼ်းသမ်ႉၶဝ်သမ်းၶဵမ်ပၼ် လုၵ်ႈဢွၼ်ႇ ဢႃယု 12 ပီ ၶိုၼ်ႈၼိူဝ်  ။ ပေႃးဝႃႈ တေပႂ်ႉ သမ်းတၢင်းၼွၵ်ႈ  ဢႃယု ဢမ်ႇတဵမ် 18 ပီ သမ်ႉသမ်းပႆႇလႆႈ  ပဵၼ်ဝႆႉၸိူင်ႉၼႆ။ ၵွပ်ႈၼႆလႄႈ လႆႈသူင်ႇလုၵ်ႈဢွၼ်ႇၶိုၼ်ႈႁဵၼ်းၶႃႈဢေႃႈ”- ဝႃႈၼႆ။

ဢိင်ၼိူဝ် တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်းၼႆႉသေ ယူႇတီႈၾၢႆႇပၢႆးယူႇလီ မိူင်းၵိုင်ၵေႃႈ လူင်းပိုၼ်ႉ ၵူတ်ႇထတ်းၵူၼ်းမိူင်း ၸွမ်းၼႂ်းၵိဝ်ႇ ၸွမ်းသဵၼ်ႈတႃႈသၢႆတၢင်းမႃး ၼင်ႇႁိုဝ် တၢင်းပဵၼ်ပေႃး ဢမ်ႇၽႄႈလၢမ်းႁႅင်းၼၼ်ႉ ဝႃႈၼႆ။

ၽူႈၸွႆႈထႅမ် ၸုမ်းပရႁိတ မိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈဝႃး – မိူဝ်ႈၼႆႉမႃး ယူႇတီႈၾၢႆႇပၢႆးယူႇလီ ၽူႈမီးပုၼ်ႈၽွၼ်းၶဝ် ၵူတ်ႇထတ်းၸီးၶူးၼင် ၵူၼ်းၶၢႆႁၢၼ်ႉၶႃႈဢေႃႈ။ လႆႈၸႅတ်ႈၵူႈႁၢၼ်ႉၶႃႈ။ သင်ဢမ်ႇပၼ်ၸႅတ်ႈ ၸီးၶူးၼင်ၸိုင် ဢမ်ႇပၼ်ၶၢႆ ႁဵတ်းၼၼ်ၶႃႈဢေႃႈ။ တႃႇၵႅတ်ႇၶႄႁႄႉၵင်ႈတၢင်းပဵၼ်ပေႃးတေဢမ်ႇၽႄႈႁႅင်းၼၼ်ႉ”- ဝႃႈၼႆ။

ယၢမ်းလဵဝ်ၼႂ်းၸႄႈဝဵင်းမိူင်းၵိုင်ၵေႃႈ သမ်ႉမီးဝႆႉ ၵူၼ်းပၢႆႈၽေးသိုၵ်း တၢင်းဢိူင်ႇပၢင်ႇၵေႇတု၊ တူင်ႇလၢဝ်းလႄႈ ႁၢမ်းငၢႆး ၸိူဝ်းၼႆႉ ၵူၼ်းမိူင်းမႆႈၸႂ်တႃႇၵူၼ်းပၢႆႈၽေး ထႅင်ႈလွင်ႈၼိုင်ႈ ၼႆယဝ်ႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “တႃႇၵူၼ်းပၢႆႈၽေးတႄႉ မႆႈၸႂ်ယူႇၶႃႈဢေႃႈ ၵူၺ်းဢမ်ႇပေႃးလႆႈမႆႈၸႂ် ႁႅင်း။ ယွၼ်ႉယူႇၵႆဝဵင်းဝႆႉဢိတ်းၼိုင်ႈၶႃႈ။ ၵူၼ်းပဵၼ်ၶူဝ်ႊဝိတ်ႉသမ်ႉ ၵမ်ႈၼမ် ပဵၼ်ၼႂ်းဝဵင်းလႄႈ သင်ဝႃႈ ၽႄႈလၢမ်းထိုင်ၸွမ်းဝၢၼ်ႈၼွၵ်ႈၼႃး ပၢင်ႇႁဝ်းၶႃႈႁၢဝ်ႈႁႅင်းတႄႉ လႆႈမႆႈၸႂ်ၶႃႈဢေႃႈ”- ဝႃႈၼႆ။

တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ဢၼ်ၽႄႈလၢမ်းႁႅင်း ၼႂ်းၸႄႈဝဵင်းမိူင်းၵိုင် ႁၢၼ်ႉတေႃႇထိုင် ဝၼ်းတီႈ 11/11/2021 ၼႆႉ ၵူၼ်းတိတ်း ၸပ်း တင်းမူတ်းမီးၵႂႃႇ 295 ၵေႃႉ၊ လူႉတၢႆ 6 ၵေႃႉ၊ ယႃၶႅၼ်း 237 ၵေႃႉလႄႈ တိုၵ်ႉယူတ်းယႃ 52 ၵေႃႉ ၼႆယဝ်ႉ။