ပီၼႆႉ ၸဝ်ႈသူၼ်ၽၵ်း တီႈဝဵင်းမိူင်းၵိုင် ဢမ်ႇပဵၼ်ၵၢၼ် ယွၼ်ႉၾိင်ႈၾႃႉဢမ်ႇပေႃးလီ ၾူၼ်လိူင်ႇလိူဝ် ၵူႈပီ ႁဵတ်းႁႂ်ႈ ၽၵ်းၶဵဝ် ဢမ်ႇဢွၵ်ႇလီ ဝႃႈၼႆ။

ယၢမ်းလဵဝ် ပဵၼ်ၶၢဝ်းၸဝ်ႈသူၼ်ၶဝ် ၼႂ်းဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း လူဝ်ႇတေႃႉ ဢဝ်ၽၵ်း ၶဵဝ် ၼႂ်းသူၼ်ၼႂ်းႁိူၵ်ႈ သူင်ႇၶၢႆၸွမ်းၵၢတ်ႇၸွမ်းသႃးလႄႈ ပီၼႆႉ ယွၼ်ႉၾူၼ်လိူင်ႇၼမ်သေ ၽၵ်းၶဵဝ်ဢမ်ႇဢွၵ်ႇလီ ႁဵတ်းႁႂ်ႈၸဝ်ႈသူၼ်ၽၵ်း ထူပ်းတၢင်းယၢပ်ႇၽိုတ်ႇႁႅင်း။

ၼၢင်းလိုၼ်း ၸဝ်ႈသူၼ်ၽၵ်းၵၢတ်ႇမွၵ်ႇ လၢတ်ႈၽူႈတွႆႇႁွၵ်ႈဝႃႈ – “ပီၼႆႉ ၽၵ်းၵၢတ်ႇမွၵ်ႇ ဢမ်ႇပေႃးဢွၵ်ႇ ယွၼ်ႉၾူၼ် ႁႅင်းၼႃႇလႄႈ တူၼ်ႈမၼ်းၶေႃႉပႅတ်ႈဢေႃႈ။ ၽိူဝ်ႇတူၼ်ႈမၼ်းယႂ်ႇမႃးၵေႃႈ ၽႄးသမ်ႉမႃးၵိၼ်လႄႈ ႁဵတ်းႁႂ်ႈဝႂ်မၼ်း ႁႅင်ႈလူင်ၵႂႃႇၵမ်းၼိုင်ႈ။ ယၢမ်းလဵဝ် ထိုင်ၶၢဝ်းဢဝ်ၶၢႆယဝ်ႉ ၽၵ်းၵၢတ်ႇမွၵ်ႇၼႆႉ မၢင်ဢၼ်ၵေႃႈလဵၵ်ႉ၊ မၢင်ဢၼ်ၵေႃႈယႂ်ႇ၊ မၢင်ဢၼ်ပႆႇမွၵ်ႇၵေႃႈ မီးဢေႃႈ”- ဝႃႈၼႆ။

ပီၼႆႉ ၼွၵ်ႈလိူဝ်ၵၢၼ်ၽုၵ်ႇသွမ်ႈယၢပ်ႇယဝ်ႉ ၶၼ်ၸိူဝ်ႉၾၼ်း ၶၼ်ၾုၼ်ႇ ၸိူဝ်းၼႆႉၵေႃႈ ပုင်ႈၶိုၼ်ႈႁႅင်းထႅင်ႈ။ ယွၼ်ႉ ၼၼ်လႄႈ ၸဝ်ႈသူၼ်ၶဝ်ထူပ်းလွင်ႈယၢပ်ႇ လႆႈလူင်းတိုၼ်းလၢင်းၼမ်လိူဝ်ၵူႈပီသေ လႆႈလုမ်းလႃးလိူဝ်ၵူႈပီ ဝႃႈၼႆ။

“ၸိူဝ်ႉမၼ်းၵေႃႈ ၵႃႈၼႃႇ လႆႈၽုၵ်ႇသွမ်ႈပဵၼ်သွင်ပွၵ်ႈဢေႃႈ။ ၸိူဝ်ႉမၼ်းၼႆႉ သိုဝ်ႉၼိုင်ႈပွၵ်ႈ ၵႃႈၸွမ်းၼိုင်ႈဢိတ်း။ ပေႃးမႃးၽုၵ်ႇသွမ်ႈၵေႃႈ တူၼ်ႈမၼ်းတၢႆပႅတ်ႈ ၼႆႉၵူၺ်းသမ်ႉပေႃးမီးလွင်ႈၽိုတ်ႇၼႅၼ်ႇယဝ်ႉ။ ၵမ်းၼႆႉ ၶၼ်ၾုၼ်ႇ ၵေႃႈ ၵႃႈထႅင်ႈ။ မိူၼ်ၼင်ႇ ၸိူဝ်ႉမၼ်းၼႆႉ ပီၵႆ လႆႈသိုဝ်ႉထူင်လူင် 3,500 ပျႃး ပီၼႆႉ လႆႈပၼ် 8,500 ပျႃး။ ပေႃးဝႃႈ ၽုၵ်ႇသွမ်ႈယဝ်ႉၵေႃႈ တေလႆႈသႂ်ႇၾုၼ်ႇလမ်/ ၾုၼ်ႇၶၢဝ် ၸိူဝ်းၼႆႉထႅင်ႈ”- ၼၢင်းလိုၼ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ယွၼ်ႉသိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်း ၼႂ်းမိူင်းတႆးလၢႆသဵၼ်ႈလႄႈ ႁဵတ်းႁႂ်ႈၸဝ်ႈသူၼ်ၶဝ် ထူပ်းတၢင်းယၢပ်ႇ တႃႇတေတၢင်ႇၶၢႆ။ လိူဝ်ၼၼ်ႉ ၶၼ်ၽၵ်းၶဵဝ် ဢၼ်ဢွၵ်ႇၼႂ်းသူၼ်ၼႂ်းၼႃးၵေႃႈ လႆႈၵႃႈၶၼ်ပေႃး ၼႆယဝ်ႉ။   

“မိူဝ်ႈလဵဝ်ၼႆႉ ယွၼ်ႉပိူဝ်ႈတၢင်းပိၵ်ႉလႄႈ တႃႇတေၵႂႃႇသိုဝ်ႉၵႂႃႇၶၢႆၵေႃႈ ယၢပ်ႇၼႃႇ။ ၵုၼ်ႇၵႃႉတၢင်းၶၢႆၵေႃႈ ၵႃႈၵူႈမဵဝ်းမဵဝ်းယဝ်ႉ။ ၼႂ်းၵႄႈၼႆႉ ၶူဝ်းဢၼ်ဢွၵ်ႇၼႂ်းသူၼ် ဢၼ်ႁဝ်းၶၢႆၼႆႉ လႆႈၵႃႈပေႃးႁႅင်းၼႃႇ။ ၵွပ်ႈၼႆလႄႈ တႃႇတေၵႂႃႇမႃးၵႃႉ ၶၢႆၵေႃႈယၢပ်ႇ။ တႃႇၵႂႃႇၵၢတ်ႇၵေႃႈ မၢင်ဝၼ်း ႁႃသိုဝ်ႉၼမ်ႉမၼ်းရူတ်ႉ ယင်းဢမ်ႇၶႂ်ႈမီးယဝ်ႉ။ ၸူးၸႂ်တႄႉ ၶႂ်ႈႁႂ်ႈဝၢၼ်ႈမိူင်းၵတ်းယဵၼ် ဢမ်ႇမီးပၢင်တိုၵ်းသင်သေ တေၵႂႃႇမႃးငၢႆႈ သိုဝ်ႉငၢႆႈၶၢႆၶၢတ်ႇၶႃႈဢေႃႈ”- ၸဝ်ႈသူၼ်ၽၵ်း မိူင်းၵိုင် လၢတ်ႈၽူႈတွႆႇႁွၵ်ႈၼင်ႇၼႆ။

ပီၼႆႉ ၶၼ်ၽၵ်းၵၢတ်ႇမွၵ်ႇ လူင်ႇလဵၵ်ႉ 1 လူင်ႇ 800 ပျႃး၊ လူင်ႇယႂ်ႇ 2,500 ပျႃး။ ပီၵၢႆသမ်ႉ လူင်ႇလဵၵ်ႉ 700 ပျႃး၊ လူင်ႇယႂ်ႇ 2,000 ပျႃး ၼႆယဝ်ႉ။

ၸဝ်ႈသူၼ်ၽၵ်းၶဵဝ် တီႈဝဵင်းမိူင်းၵိုင်ၼႆႉ ၵူႈပီ ပေႃးထိုင်ၶၢဝ်းလိူၼ်ၼႆႉ လႆႈဢဝ်ၽၵ်းၶဵဝ် သူင်ႇၶၢႆၸွမ်းဝဵင်းၵေးသီး၊ လၢႆး ၶႃႈ၊ မိူင်းသူႈလႄႈ ၼမ်ႉလၼ်ႈ ၸိူဝ်းၼႆႉ။ လိူဝ်ၼၼ်ႉ ၶဝ်ႈဢၼ်ဢွၵ်ႇ ၼႂ်းဝဵင်းမိူင်းၵိုင်ၵေႃႈ လႆႈသူင်ႇၶၢႆၵႂႃႇတၢင်ႇတီႈတၢင်ႇဝဵင်း။ ၵူၺ်းၵႃႈ ယၢမ်းလဵဝ် ယွၼ်ႉသိုၵ်းမၢၼ်ႈ ၵူတ်ႇထတ်းၸွမ်းသဵၼ်ႈတၢင်း ၵႂႃႇမႃးႁၢဝ်ႈႁႅင်းလႄႈ ႁဵတ်းႁႂ်ႈတုမ်ႉတိူဝ်ႉ ၸဝ်ႈသူၼ်ၸဝ်ႈၼႃးၶဝ် ဢမ်ႇၸၢင်ႈၵႂႃႇႁႃၵႃႉၶၢႆၶူဝ်းၶွင်၊ ထူပ်းလွင်ႈယၢပ်ႇ တႃႇႁႃၵိၼ်လဵင်ႉတွင်ႉ ၵႂႃႇၶၢဝ်းမိူဝ်း ၼႃႈထႅင်ႈ ၼႆယဝ်ႉ။