ၵူၼ်းမိူင်းၵူဝ်းၵေႃႉၼိုင်ႈ ၵႂႃႇတူၺ်းသူၼ် ၺႃးသိုၵ်းမၢၼ်ႈ တီႉၺွပ်းယိုဝ်းတၢႆပႅတ်ႈ ဝႃႈၼႆ။
မိူဝ်ႈဝၼ်းတီႈ 1/11/2021 ပူၼ်ႉမႃးၼႆႉ ၽူႈၸၢႆးၵူၼ်းဝၢၼ်ႈပွၵ်ႉ 4 ၸႄႈဝဵင်းမိူင်းၵူဝ်း ၵေႃႉၼိုင်ႈ ၵႂႃႇ တူၺ်းသူၼ် ထူပ်းၺႃး သိုၵ်းမၢၼ်ႈ ၸွမ်းတၢင်း ၺႃးတီႉၺွပ်းၵုမ်းတူဝ်ၵႂႃႇသေယိုဝ်းတၢႆပႅတ်ႈ ။
ၵူၼ်း မိူင်းၵူဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းၼၼ်ႉ မွၵ်ႈဝၢႆးဝၼ်း 3 မူင်းၼႆႉ မၼ်းၸၢႆးဝႃႈ တေၵႂႃႇတူၺ်းသူၼ်ၼႆသေ ဢွၵ်ႇႁိူၼ်းၵႂႃႇ။ ၵႂႃႇႁူပ်ႉသိုၵ်းမၢၼ်ႈပွတ်းတၢင်းသေ ၺႃးသိုၵ်းမၢၼ်ႈတီႉၺွပ်းၵုမ်းတူဝ်ၵႂႃႇၼႆ ၵူၼ်းဝၢၼ်ႈဢၼ်ယူႇၼႂ်းသူၼ်သေႁၼ်မႅၼ်ႈယဝ်ႉမႃးလၢတ်ႈၼႄၶိုၼ်း။ ထိုင်မႃးဝၼ်းတီႈ 8 ၼႆႉ လႆႈၵႂႃႇႁၼ်ၶၢပ်ႈတူဝ်တၢႆမၼ်းၸၢႆး တီႈႁိမ်းသူၼ်မၼ်းၼၼ်ႉၶႃႈဢေႃႈ”- ဝႃႈၼႆ။
ၽူႈၸၢႆး ဢၼ်ထုၵ်ႇသိုၵ်းမၢၼ်ႈ တီႉၺွပ်းၵႂႃႇၼၼ်ႉ ပဵၼ်ၵူၼ်းမိူင်းၵူဝ်း ယူႇပွၵ်ႉ 4။ ပဵၼ်ၵူၼ်းမိူင်းၽၵ်းၵႃႇၵေႃႉၼိုင်ႈ ။ တီႈတူဝ်တၢႆမၼ်းၼၼ်ႉၼွၵ်ႈလိူဝ်ႁွႆးမၢၵ်ႇၵွင်ႈယဝ်ႉယင်းမီးပႃးႁွႆးပေႃႉထုပ်ႉမၢတ်ႇၸဵပ်းဝႆႉ။
“ၸွမ်းတူဝ်မၼ်းၸၢႆးၼၼ်ႉ လႆႈႁၼ်ႁွႆးမၢတ်ႇၸဵပ်းဝႆႉၶႃႈဢေႃႈ။ ယဝ်ႉၵေႃႈၶႃၾၢႆႇသၢႆႉမၼ်းႁၵ်းဝႆႉ။ မိူဝ်ႈသိုၼ်းၼႆႉ ယူႇတီႈၸုမ်းပရႁိတလႄႈ ၵူၼ်းၼႂ်းဝၢၼ်ႈႁူမ်ႈၵၼ်ၵႂႃႇဢဝ်တူဝ်တၢႆမၼ်း မႃးၽဝ် ပူၼ်ႉၶၢပ်ႈတူဝ်ၵႂႃႇၶႃႈဢေႃႈ”- ၵူၼ်းပိုၼ်ႉတီႈသိုပ်ႇလၢတ်ႈၼႄၼင်ႇၼႆ။
ၼႂ်းၸႄႈဝဵင်းမိူင်းၵူဝ်းၼႆႉ ၶွင်ႇသီႇသိုၵ်းမၢၼ်ႈမိူၵ်ႈမႂ်ႇတင်း သိုၵ်းၵူဝ်းၵၢင်ႉ MNDAA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ ထႅမ်ႁႅင်းသိုၵ်း တူင်ႉၼိုင်ယူႇဝႆႉတင်းၼမ် ၼႆယဝ်ႉ။