ၵူၼ်းပၢႆႈၽေးသိုၵ်း ၸႄႈဝဵင်းသီႇပေႃႉ ႁူဝ်ၵူၼ်း 300 ပၢႆ လူဝ်ႇတၢင်းၸွႆႈထႅမ် တၢင်းၵိၼ်တၢင်းယႅမ်ႉ ဝႃႈၼႆ။
ဝၼ်းတီႈ 7/11/2021 သိုၵ်းဢူၺ်းလီပွတ်းႁွင်ႇတင်း သိုၵ်း RCSS ပဵၼ်ပၢင်တိုၵ်း ႁိမ်းဝၢၼ်ႈႁၢတ်ႇလႅၼ်ႈ၊ သူၼ်လူင်၊ ၶျွင်းသူင်ႇ ၸိူဝ်းၼႆႉသေ ၵူၼ်းဝၢၼ်ႈတူၵ်းၸႂ်ၵူဝ် လႆႈဢွၼ်ၵၼ်ပၢႆႈ မႃးသွၼ်ႈဝႆႉတီႈဝတ်ႉၽူဝ်းတေႃႇ ဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁူဝ်ၵူၼ်း 300 ပၢႆ ယၢမ်းလဵဝ် လူဝ်ႇ တၢင်းၸွႆႈထႅမ်ၶူဝ်းၶွင်ၵိၼ်ယႅမ်ႉ ႁၢဝ်ႈႁႅင်း ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ဢၼ်လူဝ်ႇတၢင်းၸွႆႈထႅမ်ႁႅင်းတႄႉ ပဵၼ်ၶဝ်ႈၼမ်ႉတၢင်း ၵိၼ် ၽၵ်းၶဵဝ် ၸိူဝ်းၼႆႉၶႃႈဢေႃႈ။ ၵူၼ်းပၢႆႈၽေးသိုၵ်း ဢၼ်ပၢႆႈမႃးၼႆႉ တေမီးႁူဝ်ၵူၼ်း 300 ပၢႆ ယွၼ်ႉဝႃႈ ႁိမ်းႁွမ်းဝၢၼ်ႈၵူၼ်းပၢႆႈၽေး ႁဝ်းၶႃႈ ၼၼ်ႉ ပဵၼ်ပၢင်တိုၵ်းၵၼ်ႁႅင်းသေ ၸင်ႇဢွၼ်ၵၼ်ပၢႆႈဢွၵ်ႇမႃးၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈဢွၵ်ႇမႃးၼႆႉ ပဵၼ်ၵူၼ်းဝၢၼ်ႈၸိူဝ်းယူႇၸွမ်းသၢပ်ႇၼမ်ႉမ မိူဝ်ႈလိူၼ်မၢတ်ႊၶျ် ပူၼ်ႉမႃးၼၼ်ႉၵေႃႈ ၸုမ်းယိပ်း ၵွင်ႈၵၢင်ႇၸၢဝ်းၶိူဝ်းၼႆႉၵူၺ်း ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၵူၼ်းမိူင်းပိုၼ်ႉတီႈပွတ်းတွၼ်ႈၼၼ်ႉ လႆႈပၢႆႈၽေးသိုၵ်း ဢွၵ်ႇမႃးၵမ်းၼိုင်ႈယဝ်ႉ ဝႃႈၼႆ။
“ၵူၼ်းမိူင်းတၢင်းသၢပ်ႇၼမ်ႉမၼၼ်ႉ ဢွၼ်ၵၼ်တုၵ်ႉၶ ႁႅင်းၶႃႈဢေႃႈ။ တႄႇၸဵမ်မိူဝ်ႈၸုမ်းယိပ်းၵွင်ႈ ၵၢင်ႇၸၢဝ်းၶိူဝ်းၼႆႉ ပဵၼ်ပၢင်တိုၵ်းၵၼ်မႃးၵေႃႈ လႆႈပၢႆႈဢွၵ်ႇမႃးၶႃႈယဝ်ႉ။ လႆႈပၢႆႈဢွၵ်ႇမႃးသေ ငိုၼ်းၵေႃႈ ဢမ်ႇမီးၶႃႈ။ ယဝ်ႉၵေႃႈ လွင်ႈၵႂႃႇမႃးၸိူဝ်းၼႆႉသမ်ႉ ၸႂ်ႉႁိူဝ်းဢဝ်ၵူၺ်းလႄႈ ၼႆႉၵေႃႈ ပဵၼ်ဢၼ်ယၢပ်ႇၽိုတ်ႉတႄႉၶႃႈဢေႃႈ။ မိူဝ်ႈပၢႆႈမႃးသေ ပွၵ်ႈမိူဝ်းၵမ်းၼၼ်ႉ ႁဝ်းၶႃႈ လႆႈႁႃၶွင်ၵိၼ်ယႅမ်ႉသေ လႆႈၸွႆႈထႅမ်မိူဝ်းထႅင်ႈၶႃႈဢေႃႈ။ ယၢမ်း လဵဝ် လႆႈဢွၼ်ၵၼ်ပၢႆႈမႃးထႅင်ႈၸိူင်ႉၼႆ တေလႆႈဝႃႈ ပဵၼ်ဢၼ်ယၢပ်ႇၽိုတ်ႇတႃႇၵူၼ်းပၢႆႈၽေးထႅင်ႈၵမ်းသွင်ၶႃႈ”- ၽူႈၸွႆႈထႅမ်ၵူၼ်းပၢႆႈၽေး သိုပ်ႇလၢတ်ႈၼင်ႇၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း ႁူဝ်ၵူၼ်း 300 ပၢႆၼႆႉ ပၢႆႈမႃးသွၼ်ႈဝႆႉ တီႈဝတ်ႉၽူဝ်းတေႃႇ (ဢွင်ႇမင်ႇၵလႃႇၽူဝ်းတေႃႇ) ၼႆယဝ်ႉ။
“မိူဝ်ႈၽွင်း ၵူၼ်းဝၢၼ်ႈႁဝ်းၶႃႈ ပၢႆႈမႃးၼႆႉ ယၢပ်ႇၽိုတ်ႇႁႅင်းၶႃႈဢေႃႈ။ ယွၼ်ႉဝႃႈ လႆႈၶီႇႁိူဝ်းမႃးလႄႈ လႆႈပၢႆႈမႃး ၵမ်ႈဢေႇ လႆႈၵၼ်မႃးၵမ်းဢိတ်းဢိတ်းၵူၺ်း။ ဢၼ်ၶမ်ၵိုတ်းဝႆႉတီႈဝၢၼ်ႈ ဢမ်ႇၸၢင်ႈပၢႆႈမႃးၵေႃႈမီးဢေႃႈ။ ၸိူဝ်းၵူၼ်းဝၢၼ်ႈပၢႆႈႁွတ်ႈထိုင်မႃးၼႆႉသမ်ႉ ဢမ်ႇတၼ်းလႆႈသင်မႃးၶႃႈ”- ၽူႈၸွႆႈ ထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။
ၾၢႆႇၼိုင်ႈ ၵူၼ်းပဵၼ်ၶူဝ်ႊဝိတ်ႉသမ်ႉ ၼမ်၊ ၵူၼ်းပၢႆႈၽေးသိုၵ်းၵေႃႈ ၼမ်လႄႈ ၼႂ်း 2-3 ဝၼ်းၼႆႉ ၾၢႆႇပၢႆယူႇလီ လူင်းၵူတ်ႇထတ်းတၢင်းပဵၼ်ၵူၼ်းပၢႆႈၽေးသိုၵ်း ၵူႈဝၼ်းလႆႈႁူႉၼင်ႇၼႆ။
ၼွၵ်ႈလိူဝ်ၼၼ်ႉ တၢင်းၸႄႈဝဵင်းၵျွၵ်ႉမႄးၵေႃႈ ယွၼ်ႉၸုမ်းဢူၺ်းလီပွတ်းႁွင်ႇလႄႈ RCSS ပဵၼ်ပၢင်တိုၵ်းၵၼ်ထႅင်ႈႁၢဝ်ႈႁႅင်းသေ ၵူၼ်းမိူင်း ပိုၼ်ႉတီႈပႃးၸဵမ် ၵူၼ်းပၢႆႈၽေးသိုၵ်း တီႈဢိူင်ႇႁူးသူၼ် လႆႈဢွၼ်ၵၼ်ပၢႆႈၽေးမႃးသွၼ်ႈဝႆႉတီႈဝဵင်း ႁူဝ်ၵူၼ်း 1,000 ပၢႆ ၼႆယဝ်ႉ။
