ၸုမ်းဢူၺ်းလီပွတ်းႁွင်ႇလႄႈ RCSS ပဵၼ်ပၢင်တိုၵ်းႁၢဝ်ႈႁႅင်း တၢင်းပွတ်းသီႇပေႃႉသေ ၵူၼ်းမိူင်းပိုၼ်ႉတီႈ လႆႈပၢႆႈၶဝ်ႈဝဵင်းမွၵ်ႈ 300 ဝႃႈၼႆ။
မိူဝ်ႈဝႃး ဝၼ်းတီႈ 7/11/2021 သိုၵ်းဢူၺ်းလီပွတ်းႁွင်ႇတင်း သိုၵ်း RCSS ပဵၼ်ပၢင်တိုၵ်း ႁိမ်းဝၢၼ်ႈႁၢတ်ႇလႅၼ်ႈ၊ သူၼ်လူင်၊ ၶျွင်းသူင်ႇ ၸိူဝ်းၼႆႉသေ ၵူၼ်းဝၢၼ်ႈတူၵ်းၸႂ်ၵူဝ် လႆႈဢွၼ်ၵၼ်ပၢႆႈ မႃးသွၼ်ႈဝႆႉတီႈဝတ်ႉၽူဝ်းတေႃႇ ဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁူဝ်ၵူၼ်း မွၵ်ႈ 300 ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃႈတႄႉ မီးႁူဝ်ၵူၼ်း 298 ၵေႃႉ။ မိူဝ်ႈၼႆႉ တေမႃး ထႅင်ႈၵႃႈႁိုဝ်တႄႉ ပႆႇႁူႉ။ ပၢင်တိုၵ်းတႄႉ တိုၵ်ႉပဵၼ်ယူႇ ၵူၼ်းပိုၼ်ႉတီႈမၢင်ၵေႃႉၵေႃႈ ပႆႇၸၢင်ႈမႃး ယွၼ်ႉႁိူဝ်းမေႃႇတေႃႇ ဢမ်ႇတေႃႉလႆႈၵူၼ်းတင်း မူတ်းလႄႈ ၵမ်ႈၽွင်ႈၵိုတ်းၶမ်ဝႆႉ ၸိူင်ႉၼႆႉၵေႃႈမီးဢေႃႈ။ မၢင်ဝၢၼ်ႈၵေႃႈ ၵိုတ်းဝႆႉ တႃႇတူၺ်းဝူဝ်းၵႂၢႆး ဢမ်ႇမႃးလႆႈမူတ်း ၸိူဝ်းၼႆႉၵေႃႈမီး”- ဝႃႈၼႆ။
ယူႇတီႈၵူၼ်းမိူင်း၊ သင်ၶၸဝ်ႈ၊ ၸုမ်းတူင်ႇဝူင်းၵူၼ်းလႄႈ ပႃႇတီႇတႆး ယၢမ်ႈတုၵ်းယွၼ်းမႃးလၢႆပွၵ်ႈ ယဝ်ႉ ႁႂ်ႈၵိုတ်းတိုၵ်းၵၼ် ၵူၺ်းၵႃႈ ႁၢၼ်ႉတေႃႇထိုင်ဝၼ်းမိူဝ်ႈၼႆႉ သိုၵ်းတင်းသွင်ၾၢႆႇ တိုၵ်ႉသိုပ်ႇပဵၼ်ပၢင်တိုၵ်းၵၼ်ယူႇ ၶိူဝ်းယႂ်း ၼႆယဝ်ႉ။
“မၢင်ၵေႃႉၵေႃႈၼႄးဝႃႈ ပႃႇတီႇတႆးဢမ်ႇႁဵတ်းၵၢၼ်သင် ၵူၺ်းၵႃႈ ပိူၼ်ႈဢမ်ႇႁၼ်ၼႃႇၼေႃႈ ႁဵတ်းႁဵတ်းႁူဝ်ပေႃးဢမ်ႇငွၵ်ႈလႆႈၶႃႈဢေႃႈ။ တီႈ ငဝ်ႈငုၼ်းၵေႃႈ တုၵ်းယွၼ်းယူႇ ႁႂ်ႈၵိုတ်းပၢင်တိုၵ်းၵၼ် ၸိူဝ်းၼႆႉ။ တုၵ်းယွၼ်းယူႇတႃႇသေႇၵေႃႈ မိူၼ်ၼႆၵူၺ်း။ ဢၼ်ယၢပ်ႇတႄႉ ပဵၼ်ၵူၼ်း မိူင်းၵူၺ်းၶႃႈဢေႃႈ ယၢပ်ႇၵူႈလွင်ႈလွင်ႈၶႃႈ။ ဢၼ်ၶႂ်ႈလၢတ်ႈတႄႉၵေႃႈ ၶႂ်ႈႁႂ်ႈၵိုတ်းပၢင်တိုၵ်းၵၼ် ၵူႈတီႈ ယဝ်ႉၵေႃႈ ယႃႇပေဢဝ်မႃႇၼ ဢတ်ႉတ ပဵၼ်ယႂ်ႇ ယႃႇပေႁိမ်ၼႃႈတီႈၵၼ် ၵဵဝ်ႇလူၺ်ႈႁိမ်းၼႃႈတီႈၵၼ်သေ မၼ်းပဵၼ်မႃးၼၼ်ႉၼႃႇ ႁဝ်းၶႃႈတႄႉ ငိၼ်းဝႃႈၸိူင်ႉၼႆၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်မႃးမီးဝႆ့တီႈၵျွင်းၽူဝ်းတေႃႇ ဝဵင်းသီႇပေႃႉၼႆ့ ၵမ်ႈၼမ် ပဵၼ်ၵူၼ်းထဝ်ႈ၊ ၽူႈယိင်းလႄႈ လုၵ်ႈဢွၼ်ႇ ၸိူဝ်း ၼႆ့။ ၵူၼ်းဝၢၼ်ႈမၢင်ၸိူဝ်း ဢၼ်ပႆႇၸၢင်ႈ ဢွၵ်ႇမႃး တိုၵ့်ၶမ်ဝႆ့ၼႂ်းဝၢၼ်ႈၵေႃႈတိုၵ့်မီးယူႇ ဝႃႈၼႆ။
မိူဝ်ႈဝၼ်းတီႈ 5-6 ၼႆႉၵေႃႈ ၼႂ်းၸႄႈဝဵင်းၵျွၵ်ႉမႄး ဢိူင်ႇႁူးသူၼ် ၼၼ်ႉၵေႃႈ ယွၼ်ႉသိုၵ်းဢူၺ်းလီပွတ်းႁွင်ႇတင်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်းသေ ၵူၼ်းမိူင်းၼႂ်းပိုၼ်ႉတီႈ ဢိၵ်ႇလူၺ်ႈ ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈဢိူင်ႇႁူးသူၼ်ၼၼ်ႉ လႆႈၶၢႆႉပၢႆႈမႃးသွၼ်ႈ ဝႆႉတီႈ ဝတ်ႉမၢၼ်ႈၶႃႇ၊ ၵေႃလိၵ်ႈလၢႆး၊ ႁူင်းႁေႃ(ႁူင်းထမ်းလူင်) ပွၵ်ႉ 8 လႄႈ ဝတ်ႉတွင်ၼဝ်ႈ ၸိူဝ်းၼႆႉ ႁူဝ်ၵူၼ်းမီးႁဵင်ပၢႆ ၼႆယဝ်ႉ။
