ၽွင်းၶဵင်ႈၶႅင်ၵၢၼ်သိုၵ်းတေႃႇၸုမ်းသိုၵ်းမၢၼ်ႈယူႇၼႂ်းထုင်ႉမိူင်းယေႃၼၼ်ႉသိုၵ်းဢူၺ်းလီသမ်ႉပိုတ်ႇပၢင်တေႃႇလွင်း ၊ ဢမ်ႇမီးၽႂ်ၵႂႃႇလဵၼ်ႈ ၵူၼ်းမိူင်းသုၵ်ႉယုင်ႈၸႂ်။
တႄႇဢဝ်ႁူဝ်လိူၼ်ဢွၵ်ႊထိူဝ်ႊပိူဝ်ႊ 2021 ၼႆႉမႃး သိုၵ်း TNLA ဢၼ်ပဵၼ်လုၵ်ႈၸုမ်း ၸုမ်းဢူၺ်းလီပွတ်းႁွင်ႇ ဢၼ်တူင်ႉၼိုင် တၢင်းပွတ်းထုင်ႉမိူင်းယေႃ ၸႄႈဝဵင်း လႃႈသဵဝ်ႈ ၸိုင်ႈတႆးပွတ်းႁွင်ႇ ပိုတ်ႇပၢင်တေႃႇလွင်း ၼႂ်းဝၢၼ်ႈၼမ်ႉၼူမ်း ။
ယွၼ်ႉပိူဝ်ႈၽႄးၶူဝ်ႊဝိတ်ႉၽႄႈလၢမ်း၊ သိုၵ်းမၢၼ်ႈလႄႈၸုမ်းဢူၺ်းလီ MNDAA , AA သမ်ႉပိုတ်းယိုဝ်းၶဵင်ႈၶႅင်ၵၢၼ်သိုၵ်းၵၼ် ၊ ၵူၼ်းမိူင်းပိုၼ်ႉတီႈ ဢမ်ႇလႆႈၸႂ်ဢၼ်မီးပၢင်တေႃႇလွင်းၵၢင်ဝဵင်း ။
ၵူၼ်း မိူင်းယေႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၶဝ်တႄႇပိုတ်ႇယဝ်ႉၶႃႈ ပၢင်တေႃႇလွင်း ၵူၺ်းၵႃႈ ဢမ်ႇမီးၵူၼ်းၵႂႃႇလဵၼ်ႈ။ ၼႂ်းငဝ်းလၢႆးၸိူင်ႉၼႆ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ၊ ယႃႇဝႃႈတေလဵၼ်ႈ တႃႇၵိၼ်ၵူၺ်းယင်းယၢပ်ႇ။ၵွပ်ႈၼႆ ယၢမ်းလဵဝ်တႄႉ ၵူၼ်းမိူင်းပိုၼ်ႉတီႈတႄႉတႄႉၼႆႉ ဢမ်ႇမီးၽႂ်ၵႂႃႇလဵၼ်ႈၶႃႈ။ ”- ဝႃႈၼႆ။
ပၢင်လွင်းၼႆႉ ႁၢင်ႈႁႅၼ်းမႃးၸဵမ်မိူဝ်ႈၵၢင်ပီ 2021 ၼႆႉသေ ယၢမ်းလဵဝ်တႄႉပိုတ်ႇဝႆႉတီႈပၢင်ႇဝၢၼ်ႈၼမ်ႉၼူမ်း ဢၼ်မီးၵၢင်ဝဵင်းမိူင်းယေႃ။ ပွၵ်ႉၼၼ်ႉပဵၼ်ပီႈၼွင်ႉၶႄႇ ယူႇသဝ်းၼမ်။ ပဵၼ်ပွၵ်ႉဢၼ်မီးလုမ်းသိုၵ်းပျီႇတူႉၸိတ်ႉ မၢၼ်ႈပၢင်ႇ တၵသၽ ။ၵူၺ်းၵႃႈဢၼ်ဢဝ်ႁူမ်ႇလူမ်ႈ ပၢင်လွင်းသမ်ႉပဵၼ်သိုၵ်း TNLA ၵူၼ်းမိူင်းယေႃလၢတ်ႈၼင်ႇၼႆ။
“မီးၽၢႆႇၵိဝ်း၊ မၢၵ်ႇၵိင်ႈလွႆ၊ လေးၵွင်ႇၵျိၼ်ႇ၊ ၵဵမ်းပႃ မီးၸေးၶႃႈဢေႃႈ။ တလဵဝ်ဝၢၼ်ႈမိူင်းဢမ်ႇလီလႄႈ ဢမ်ႇမီးၵူၼ်းၵႂႃႇ လဵၼ်ႈ။ ပေႃးငဝ်းလၢႆးၼမ်/ယဵၼ်မႃးဢိတ်းၼိုင်ႈတႄႉ တေဢွၼ်ၵၼ်ၵႂႃႇလဵၼ်ႈ ယဝ်ႉၶႃႈ။ပေႃးလဵၼ်ႈတေႃႇလွင်း သမ်ႉတိူဝ်ႉ ဢၵျၢင်ႉတၢင်းယၢမ်ႈၵူၼ်းၼုမ်ႇ။ ၶီႈလၵ်ႉၵူၼ်းၸူၼ်ၵေႃႈတေလိူင်ႇၼမ်။ ယၢပ်ႇၸႂ်ၵူၼ်းမိူင်းတႄႉယဝ်ႉၶႃႈ။ ”- ၵူၼ်းပိုတ်ႇလၢၼ်ႉၶၢႆၶူဝ်း ၵူၼ်းမိူင်းယေႃၵေႃႉၼိုင်ႈၵေႃႈလၢတ်ႈၼင်ႇၼႆ။
ငဝ်းလၢႆးၵၢၼ်မိူင်း ၵၢၼ်သိုၵ်းဢမ်ႇၼိမ်သဝ်းၼႆႉတႄႉ ပႆႇထုၵ်ႇပိုတ်ႇပၢင်လွင်းၵၢင်ဝဵင်း ၵူၼ်းမိူင်းယေႃၵေႃႉၼိုင်ႈၵေႃႈပိုတ်ႇဢူၵ်းပိုတ်ႇၸႂ်ၼင်ႇၼႆ။
ၼႂ်းထုင်ႉမိူင်းယေႃၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ယူႇဝႆႉ မိူၼ်ၼင်ႇ သိုၵ်းမၢၼ်ႈ၊ သိုၵ်းၶၢင် KIA၊ သိုၵ်းရၶႅင်ႇ AA၊ သိုၵ်းၵူဝ်းၵၢင်ႉ MNDAA၊ သိုၵ်းဝၢၼ်ႈႁႆး SSPP လႄႈ သိုၵ်းတဢၢင်း TNLA ၸိူဝ်းၼႆႉ။
တီႈမိူင်းယေႃၼႆႉ မိူဝ်ႈဝၼ်းတီႈ 27/10/2021 ၼၼ်ႉၵေႃႈ သိုၵ်းမၢၼ်ႈ လုၵ်ႉတီႈဝၢၼ်ႈႁူၺ်ႈႁူင်းသေ ယိုဝ်းၵွင်ႈလူင်/ ၵွင်ႈဢွၼ်ႇ ၸူးၾၢႆႇၸၢၼ်းမိူင်းယေႃ ၊ လုၵ်ႉလႃႈသဵဝ်ႈထႅမ်ႁႅင်းသိုၵ်းၶိုၼ်ႈမိူင်းယေႃ ဢမ်ႇထၢတ်ႇ ။
