သဵင်ၵွင်ႈတႅၵ်ႇႁၢဝ်ႈႁႅင်း ႁိမ်းဢိူင်ႇႁူးသူၼ် လႄႈ ၵူၼ်းပၢႆႈၽေးပၢင်တိုၵ်း ဢၼ်ပၢႆႈမႃးသွၼ်ႈဝႆႉ တီႈဢိူင်ႇႁူးသူၼ် ႁဵင်ပၢႆၼၼ်ႉ လႆႈသိုပ်ႇၶၢႆႉပၢႆႈၶဝ်ႈဝဵင်း၊ ထိုင်ၼႂ်း ဝဵင်းၵျွၵ်ႉမႄးထႅင်ႈ 800 ပၢႆ။
ၼႂ်းဝူင်ႈၼႆႉ သိုၵ်းဢူၺ်းလီပွတ်းႁွင်ႇ ဢၼ်မီး SSPP, TNLA တင်း သိုၵ်း RCSS ပဵၼ်ပၢင်တိုၵ်းၵၼ်ထႅင်ႈ ႁိမ်းႁွမ်းဢိူင်ႇႁူးသူၼ် ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ႁၢဝ်ႈႁႅင်း။ ႁဵတ်းႁႂ်ႈၵူၼ်းပၢႆႈၽေးသိုၵ်း ဢၼ်ပၢႆႈမႃး သွၼ်ႈဝႆႉ တီႈဢိူင်ႇႁူးသူၼ် ၶၢဝ်းတၢင်း 2 လိူၼ်ပၢႆႈၼၼ်ႉ လႆႈသိုပ်ႇၶၢႆႉပၢႆႈ၊ ယၢမ်းလဵဝ် ထိုင်မႃးၼႂ်းဝဵင်းၵျွၵ်ႉမႄးထႅင်ႈ 800 ပၢႆ။
လုင်းလႅင်းႁၢၼ် ႁူဝ်ပဝ်ႈၵေႃလိၵ်ႈလၢႆး ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “တၢင်းဢိူင်ႇႁူးသူၼ်ၼႆႉ ဢၼ်ပၢႆႈၽေး သိုၵ်း မႃးယူႇဝႆႉ မီးၵူၼ်း 1,500 ။ ၶဝ်ယူႇတီႈၼၼ်ႈမႃးမီး 2 လိူၼ်ပၢႆယဝ်ႉ။ ၵူၺ်းၵႃႈ မိူဝ်ႈလဵဝ်သမ်ႉ သၢႆငၢႆပၢင်တိုၵ်း ႁၢဝ်ႈႁႅင်းမႃးလႄႈ ၶဝ်ယူႇဢမ်ႇလႆႈ ၸင်ႇဢွၼ်ၵၼ်ပၢႆႈလူင်းမႃး ၼႂ်းဝဵင်းၶႃႈဢေႃႈ။ ၸင်ႇဝႃႈ လႆႈၵႂႃႇႁပ်ႉမႃးဝႆႉတီႈ ၵျွင်းမၢၼ်ႈၶႃႇလႄႈ ႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆးၶႃႈဢေႃႈ”- ဝႃႈၼႆ။
ရူတ်ႉၵႃး ဢၼ်ၵႂႃႇႁပ်ႉၵူၼ်းပၢႆႈၽေးသိုၵ်း တီႈဢိူင်ႇႁူးသူၼ် တင်းမူတ်းမီးမွၵ်ႈ 20 လမ်း။ ပေႃးၵႂႃႇႁပ်ႉမႃးၼိုင်ႈၵမ်း တၢင်ႇမႃးလႆႈ 200 ပၢႆ ။ ယၢမ်းလဵဝ်တႄႉ ၵူၼ်းပၢႆႈၽေးသိုၵ်း ႁွတ်ႈဝႆႉတီႈ ႁူင်းႁေႃ ၵေႃလိၵ်ႈလၢႆး လႄႈ ၵျွင်းမၢၼ်ႈၶႃႇ ၼပ်ႉႁူဝ်ပၢၵ်ႇၵေႃႉ။
“လူဝ်ႇတၢင်းၵိၼ်တၢင်းယမ်ႉၶႃႈဢေႃႈ။ ပိူင်လူင်တႄႉ ၶဝ်ႈသၢၼ်၊ ၽၵ်းမီႇ ၼမ်ႉမၼ်း ၼၼ်ႉၶႃႈၼႃႇ။ ၵူၼ်းမႃးၸွႆႈၵေႃႈ သမ်ႉၵူဝ် တၢင်းပဵၼ်ၶူဝ်ႊဝိတ်ႉလႄႈ ယွမ်းမႃးၵူႈၾၢႆႇၵူႈတၢင်းၶႃႈဢေႃႈတေႃႈလဵဝ်။ လွင်ႈၵိၼ်လွင်ႈယႅမ်ႉ သမ်ႉ ၵိၼ်ယူႇၵူႈဝၼ်းလႄႈ ပေႃးၵူၼ်းမႃးၸွႆႈထႅမ် ဢေႇလူင်း။ သမ်ႉလႆႈၸႂ်ယႂ်ႇႁႅင်းၼႂ်းပိုၼ်ႉတီႈ။ ပေႃးၶၢဝ်းယၢဝ်းတႄႉ မႆႈၸႂ်ဢေႃႈ ”- လုင်းလႅင်းႁၢၼ် သိုပ်ႇလၢတ်ႈၼႄၼင်ႇၼႆ။
ၸုမ်းဢူၺ်းလီ ပွတ်းႁွင်ႇ ဢၼ်မီး SSPP, TNLA ၼၼ်ႉ ၶွၼ်ႈႁႅင်းၵၼ်သေ လေႃႇတိုၵ်း တပ်ႉပၢင်သဝ်း RCSS ဢၼ်ပၵ်းသဝ်းတူင်ႉၼိုင် တင်း ဢိူင်ႇႁူးသူၼ် ႁူးၵွတ်ႈ ၶၢဝ်းတၢင်း လိူၼ်ပၢႆ။ ယၢမ်းလဵဝ် ၵေႃႈ သွင်ၾၢႆႇ တိုၵ်ႉထႅမ် ႁႅင်းသိုၵ်း မုင်ႈၸူးၵၼ်ယူႇၵူႈဝၼ်း။ ၵူၼ်းမိူင်းၸိူဝ်းၺႃး ၽေးပၢင်တိုၵ်းၵေႃႈ တိုၵ်ႉလႆႈပၢႆႈ ပႆႇၸၢင်ႈ ပွၵ်ႈႁိူၼ်း ၵဵပ်းၶဝ်ႈ သႂ်ႇယွင် သႂ်ႇယေး။
