တၢင်းပဵၼ်ၶူဝ်းဝိတ်ႉၽႄႈႁႅင်း ၽၵ်းတူၵႃႉၶၢႆ လႅၼ်လိၼ် တႆး – ၶႄႇ ပိၵ်ႉႁပ်း ၵူၼ်းမိူင်းႁႃၵိၼ်ယၢပ်ႇလႄႈ ပီႈၼွင်ႉတႆး ၾၢႆႇတၢင်းမိူင်းၶႄႇ ဢွၵ်ႇၼႄၵၢင်ၸႂ် တေႃႇလူင်ပွင်ၸိုင်ႈၶႄႇ 3 ဝၼ်းထပ်းၵၼ်။
ဝၼ်းတီႈ 4/11/2021 ၵူၼ်းဝၢၼ်ႈႁူဝ်ႁၢတ်ႇ၊ ဝၼ်းတီႈ 3 ၵူၼ်းဝၢၼ်ႈ ႁူဝ်မူၼ်ႇ၊ ဝၼ်းတီႈ 2 ၼၼ်ႉပဵၼ်ၵူၼ်း ဝၢၼ်ႈ တူၼ်ႈႁူင်း ၸိူဝ်းပဵၼ်ဝၢၼ်ႈတႆး ၼႂ်းၸႄႈဝဵင်းမိူင်းမၢဝ်း ၼႃႈလိၼ်ၽွင်းငမ်းတူဝ်ၵဝ်ႇ တႆးတႂ်ႈၶူင်း ၸိုင်ႈမိူင်းၶႄႇ ဢွၵ်ႇ ၼႄၵၢင်ၸႂ် တုၵ်းယွၼ်း လူင်ပွင်ၸိုင်ႈမိူင်းၶႄႇ ၵႄႈလိတ်ႈပၼ် တၢင်းယၢပ်ႇၽိုတ်ႇၵိၼ်းၸႂ် ၵၢၼ်ႁႃၵိၼ်လဵင်ႉတွင်ႉ ။
ၵူၼ်းမိူင်းမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ဢမ်ႇပၼ်ႁဵတ်းသင်သေမဵဝ်းၼၼ်ႉၶႃႈယဝ်ႉ။ ၵႂႃႇႁႆႈၵႂႃႇသူၼ် ၵႂႃႇၼႃး ၸိူဝ်းၼႆႉ ၵေႃႈဢမ်ႇလႆႈ၊ သိုဝ်ႉၶၢႆၵႃႉၶၢႆသင်ၵေႃႈ ဢမ်ႇလႆႈ တုမ်ႉယွၼ်ႈ ၵၢၼ်ႁႃၵိၼ်လဵင်ႉတွင်ႉႁဝ်းၶႃႈ ၵူၼ်းမိူင်းတႄႉ တႄႉၶႃႈဢေႃႈ။ ၵွပ်ႈၼႆလႄႈ ႁဝ်းၶႃႈ ၸင်ႇဢွၵ်ႇမႃးၼႄၵၢင်ၸႂ် တုၵ်းယွၼ်းလူင်ပွင်ၸိုင်ႈၸိူင်ႉၼႆၶႃႈ”- ဝႃႈၼႆ။
တႄႇ လိူၼ်မၢတ်ႉၶျ် ပီ 2020 မႃး လႅၼ်လိၼ် တႆး- ၶႄႇ ပိၵ်ႉ၊ ပိုတ်ႇၶိုၼ်း ပဵၼ်ၵမ်းသေတႃႉ ဢၼ်ပိၵ်ႉၶိုၼ်းပိၵ်ႉၶိုၼ်း ၵမ်းၼႆႉ ႁိုင်မႃး 7 လိူၼ်ပၢႆ ။ ၵူၼ်းမိူင်း ၵႂႃႇမႃးႁႃၵိၼ်လဵင်ႉတွင်ႉယၢပ်ႇ၊ ၵႂႃႇႁႆႈၵႂႃႇသူၼ်ဢမ်ႇလႆႈ၊ ၵႂႃႇၵႃႉၶၢႆ တၢင်ႇမိူင်း ၶႅၼ်းဢမ်ႇလႆႈ လႄႈ ၵူၼ်းဝၢၼ်ႈၵူၼ်းသူၼ်ၸင်ႇ ၶွၼ်ႈႁႅင်းၵၼ်ဢွၵ်ႇၼႄၵၢင်ၸႂ်။
“ဝၢႆးသေ ပီႈၼွင်ႉႁဝ်းၶႃႈ တၢင်းဝၢၼ်ႈတူၼ်ႈႁူင်း ဢွၵ်ႇၼႄၵၢင်ၸႂ်ၵႂႃႇယဝ်ႉၼၼ်ႉ ၽူႈမီးပုၼ်ႈၽွၼ်း ၾၢႆႇလူင် ပွင်ၸိုင်ႈ ၶႄႇ ၶဝ် မႃးၽႅဝ်ၼႂ်းဝၢၼ်ႈသေ ၶိုၼ်းႁိူၼ်းလူင်းႁိူၼ်း တွင်ႈထၢမ် လွင်ႈယၢပ်ႇၽိုတ်ႇ ၵူႈႁိူၼ်းႁိူၼ်း ယဝ်ႉၵေႃႈ တႅမ်ႈမၢႆဢဝ်ၶေႃႈ မုလ်းၵႂႃႇ ဝႃႈ တေတၢင်ႇထိုင် ၵူၼ်းလူင်တၢင်းၼိူဝ်ၼႆၶႃႈဝႃႇ။ ၶဝ်ထတ်းပႃးၼႂ်းၾူၼ်း ၸွင်ႇတၢင်ႇၶၢဝ်ႇ ၼႂ်း Wechat ၼႆဝႃႇ”- ၵူၼ်းထုင်ႉမၢဝ်း ထႅင်ႈၵေႃႉၼိုင်ႈလၢတ်ႈၼႄၼင်ႇၼႆ။
မိူင်းမၢဝ်းၼႆႉ ၶဝ်ႈပႃးၼႂ်းၼႃးလိၼ်ၽွင်းငမ်းတူဝ်ၵဝ်ႇ တႆးတႂ်ႈၶူင်း ၸႄႈမိူင်းယုၼ်ၼၢၼ် မိူင်းၶႄႇ။ ပဵၼ်ဝဵင်းလႅၼ်လိၼ်တိတ်းၸပ်း မူႇၸေႊ ၼမ်ႉၶမ်း မိူင်းတႆးပွတ်းႁွင်ႇ၊ ပဵၼ်ဝဵင်းၵႃႉငၢႆႈ ၶၢႆလီ၊ ယွၼ်ႉလႅၼ်လိၼ် ပိၵ်ႉဝႆႉႁိုင် ၵၢၼ်ၵႃႉၶၢႆ ဢမ်ႇပဵၼ် ႁႃၵိၼ်လဵင်ႉတွင်ႉယၢပ်ႇ မႃးၵူႈဝၼ်းလႄႈ ပၼ်ႁႃ လႅပ်ႈတေ ပႆႇယဝ်ႉ၊ ပၢင်ၼႄ ၵၢင်ၸႂ်ၵေႃႈ လႅပ်ႈတေ ၵိူတ်ႇၶိုၼ်ႈထႅင်ႈယူႇ ၼႆ ၵူၼ်းပိုၼ်ႉတီႈ လၢတ်ႈၼႄ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ