ၶွင်ႇသီႇသိုၵ်းမၢၼ်ႈ ယိုတ်းမိူင်း ထႅမ်ႁႅင်းသိုၵ်း မုင်ႈၸူးတၢင်းမိူင်းၵူဝ်း ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ထႅင်ႈတင်းၼမ်။  

တႄႇဢဝ် ႁၢင်လိူၼ်ဢွၵ်ႊထိူဝ်ႊပိူဝ်ႊမႃးတေႃႇထိုင် ႁူဝ်လိူၼ်ၼူဝ်ႊဝႅမ်ႊပိူဝ်ႊ 2021 ၼႆႉ ၶွင်ႇသီႇသိုၵ်းမၢၼ်ႈ ယိုတ်းမိူင်း တင်း သိုၵ်းၵူဝ်းၵၢင်ႉ MNDAA ပၢင်တိုၵ်းၵၼ် ပွတ်းဝဵင်းပၢင်ႇသၢႆး၊ မိူင်းၵူဝ်းလႄႈ ၽွင်းသႅင် ၸွမ်းလႅၼ်လိၼ်တႆး – ၶႄႇ ၼႂ်းၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈလႆႈပၢႆႈၽေးသိုၵ်း ၼပ်ႉႁူဝ်ပၢၵ်ႇ  ၾၢႆႇၼိုင်ႈသိုၵ်းမၢၼ်ႈ တိုၵ်ႉထႅမ်ႁႅင်းသိုၵ်းမုင်ႈၸူး ပွတ်းမိူင်းၵူဝ်း ထႅင်ႈတင်းၼမ်။

ၵူၼ်း  မိူင်းၵူဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ငဝ်းလၢႆးပၢင်တိုၵ်းယဵၼ်ဝႆႉသေတႃႉ  ၼႂ်းဝၼ်းသွင်ဝၼ်းပူၼ်ႉ မႃးၼႆႉ လႆႈႁၼ်သိုၵ်းမၢၼ်ႈ  ထႅမ်ႁႅင်းသိုၵ်းမႃးတၢင်းမိူင်းၵူဝ်းၼႆႉ ၵႃးၼပ်ႉပၢၵ်ႇၶႃႈ။ ၵူၼ်းမိူင်းၸိူဝ်းယူႇၼႂ်းၵႄႈ ၽွင်းသႅင်တင်း မိူင်းၵူဝ်းၼႆႉ လႆႈ ပၢႆႈၽေးသိုၵ်းမႃးသွၼ်ႈဝႆႉ တီႈမိူင်းၵူဝ်းၼႆႉ ၼပ်ႉပၢၵ်ႇမၼ်းၶႃႈဢေႃႈ”- ဝႃႈၼႆ။

ယၢမ်းလဵဝ် တီႈမိူင်းၵူဝ်းၼႆႉ ၵူၼ်းမိူင်းပိုၼ်ႉတီႈ ဢွၼ်ၵၼ်ပၢႆႈမႃးသွၼ်ႈဝႆႉ မွၵ်ႈ 700 ၵမ်ႈၼမ် ပဵၼ်ၵူၼ်းမိူင်း ၼႂ်းၵႄႈမိူင်းၵူဝ်း လႄႈ ၽွင်းသႅင် လႆႈႁူႉၼင်ႇၼႆ။

“မိူဝ်ႈဝႃးၼႆႉ ၵႃးသိုၵ်းမၢၼ်ႈ ထုၵ်ႇၵၢင်ႁၢင်ႈမၢၵ်ႇသႂ်ႇ ၼႂ်းၵႄႈမိူင်းၵူဝ်း – ၽွင်းသႅင် လႆႈလူႉၵွႆ 3 လမ်းၶႃႈဢေႃႈ။ ၵူၼ်းသိုၵ်းၶဝ်တႄႉ တၢႆၵႃႈႁိုဝ် မၢတ်ႇ ၸဵပ်းၵႃႈႁိုဝ်တႄႉ ဢမ်ႇလႆႈႁူႉၶႃႈ။ လႆႈႁူႉဝႃႈ တၢင်းပွတ်းတွၼ်ႈမိူင်းၵူဝ်းၼႆႉ တူဝ်ပိဝ်ႇႁႃႇမူးၶဝ် မႃးၸီႉသင်ႇပၵ်းယူႇဝႆႉ မွၵ်ႈ 6 ၵေႃႉၼႆႉ။ ယွၼ်ႉဝႃႈ ၾၢႆႇသိုၵ်းမၢၼ်ႈ တပ်ႉမ 99 ၶဝ်ၼၼ်ႉ လႆႈလူႉတၢႆၼမ်လႄႈ ၶဝ်ဢဝ်တပ်ႉမ 77 မႃးပုတ်ႈႁဵတ်းၵၢၼ်ၶႃႈဢေႃႈ ”- ၵူၼ်းပိုၼ်ႉတီႈ မိူင်းၵူဝ်း လၢတ်ႈ ၼႄထႅင်ႈၼင်ႇၼႆ။

ထႅင်ႈၾၢႆႇၼိုင်ႈ တၢင်းၾင်ႇမိူင်းၶႄႇၵေႃႈဝႃႈ ၸွမ်းသၢပ်ႇၼမ်ႉလႅၼ်လိၼ် တႆး – ၶႄႇၼႆႉ ယႃႇႁႂ်ႈသဵင်ၵွင်ႈတႅၵ်ႇၼႆသေတႃႉ  ၾၢႆႇသိုၵ်းမၢၼ်ႈ သမ်ႉထႅမ်ႁႅင်းသိုၵ်းၶဝ်ႈတူင်ႉၼိုင် ထႅင်ႈႁၢဝ်ႈႁႅင်းလႄႈ သဵင်ၵွင်ႈတေတႅၵ်ႇထႅင်ႈမိူဝ်ႈလႂ်ဢမ်ႇၸၢင်ႈႁူႉလႆႈဝႃႈၼႆ။

“မိူင်းၶႄႇတႄႉဝႃႈတီႈသိုၵ်းမၢၼ်ႈ ယႃႇႁႂ်ႈသဵင်ၵွင်ႈတႅၵ်ႇၸွမ်းလႅၼ်လိၼ်ၼႆလႄႈ ၼႂ်းၶၢဝ်းတၢင်း ဝၼ်းသွင်ဝၼ်းၼႆႉ ယဵၼ်ဝႆႉၶႃႈဢေႃႈ။ ၵူၺ်းၵႃႈ ၶဝ် သမ်ႉထႅမ်ႁႅင်းသိုၵ်းၶဝ်ႈၸူးထႅင်ႈတင်းၼမ်လႄႈ လွင်ႈၼႆႉ သဵင်ၵွင်ႈတေဢမ်ႇတႅၵ်ႇထႅင်ႈဢၼ်ဝႃႈၼၼ်ႉ ဢမ်ႇယုမ်ႇလႆႈၶႃႈ”- ၵူၼ်းပိုၼ်ႉတီႈ လၢတ်ႈၼႄထႅင်ႈၼင်ႇၼႆ။

တႄႇဢဝ် ၶွင်ႇသီႇသိုၵ်းမၢၼ်ႈ ယိုတ်းမိူင်းမႃးၼႆႉ ၼႂ်းၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၸွမ်းဝဵင်းပၢင်ႇသၢႆး မိူင်းၵူဝ်း ၸိူဝ်းၼႆႉ သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း တပ်ႉသိုၵ်းၵူဝ်းၵၢင်ႉ MNDAA မႃးႁၢဝ်ႁႅင်း ယွၼ်ႉၼၼ်လႄႈ လႆႈပဵၼ်ပၢင်တိုၵ်းၵၼ်မႃး ဢမ်ႇထတ်ႇဢမ်ႇဝၢႆးႁၢၼ်ႉတေႃႇ ထိုင် ဝၼ်းမိူဝ်ႈၼႆႉ။