ၵဵတ်ႉ/ လၢၼ်ႇသၢႆးၶၢဝ် ၵဵပ်းၶွၼ်ႇ ၸဝ်ႈၵုၼ်ႇ မိူင်းသၢတ်ႇ ႁၢဝ်ႈႁႅင်း

ႁွင်ႈၵၢၼ်ၾၢႆႇၵဵပ်းၶွၼ်ႇ တႂ်ႈသိုၵ်းမၢၼ်ႈ ၵုမ်းၵမ် တီႈၵဵတ်ႉ/ လၢၼ်ႇ တၢင်းၶဝ်ႈဢွၵ်ႇ ဝဵင်းမိူင်းသၢတ်ႇ ၵဵပ်းၶွၼ်ႇၸဝ်ႈၵုၼ်ႇ ပီၼႆႉ တိူဝ်းၶိုၼ်ႈႁႅင်း  လိူဝ်ၵူႈပီ မွၵ်ႈ 4-5 ပုၼ်ႈလႄႈ ၸဝ်ႈၵုၼ်ႇမိူင်းသၢတ်ႇ ဢွၼ်ၵၼ်ၶၢင်းပွင်ႉ ထူပ်းတၢင်းယၢပ်ႇ။

မိူဝ်ႈပၢၼ်လူင်ပွင်ၸိုင်ႈၼူၵ်ႉယုင်း NLD ၼၼ်ႉတႄႉ တီႈၵဵတ်ႉ/ လၢၼ်ႇသၢႆးၶၢဝ် တၢင်းၶဝ်ႈဢွၵ်ႇဝဵင်း မိူင်းသၢတ်ႇ ၼႂ်းၵႄႈမိူင်းသၢတ်ႇ – တႃႈၶီႈ လဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ ၵဵပ်းၶွၼ်ႇၸဝ်ႈၵုၼ်ႇ မိူင်းသၢတ်ႇ ၼိုင်ႈပီ 15 သႅၼ် – 20 သႅၼ် ။ ပီၼႆႉ ပၢၼ်သိုၵ်းယိုတ်းမိူင်း ၵဵပ်းၶွၼ်ႇၶိုၼ်ႈႁႅင်း ထိုင် 100 သႅၼ်ပျႃး ၼႆယဝ်ႉ။

ၸဝ်ႈၵုၼ်ႇ မိူင်းသၢတ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၵူႈပီၼႆႉ ႁဝ်းၶႃႈ ၸဝ်ႈၵုၼ်ႇ မိူင်းသၢတ်ႇ ႁူမ်ႈၵၼ်သေ သႂၢင်းပၼ်ၶွၼ်ႇတီႈ လူင်ပွင်ၸိုင်ႈ ၾၢႆႇၵဵပ်းၶွၼ်ႇၶဝ် 15 သႅၼ် ထိုင် 20 သႅၼ်ၵႃႈၼႆႉၵူၺ်းၶႃႈ။ ပီၼႆႉသမ်ႉ ႁႂ်ႈသႂ်ႇ 100 သႅၼ်ၶႃႈဢေႃႈ ႁဝ်းၶႃႈ ၸဝ်ႈၵုၼ်ႇ ဢမ်ႇပွင်ပဵၼ်လႆႈၶႃႈ။ သင်ဝႃႈ ႁဝ်းၶႃႈ ဢမ်ႇသႂ်ႇၼႆၵေႃႈ ၶဝ်သိမ်းဢဝ်ၶူဝ်းၵုၼ်ႇႁဝ်းၶႃႈ ႁဵတ်းၼႆၶႃႈဢေႃႈ”- ဝႃႈၼႆ။

တႄႇဢဝ် ဝၼ်းတီႈ 1/11/2021 ၼႆႉမႃး တီႈၵဵတ်/ လၢၼ်ႇ သၢႆးၶၢဝ် သိမ်းဢဝ်ပုၼ် (ၽိလပ်ႉမျေႇ) 100 ထူင် တႃႇၵႃးလူင် ၼိုင်ႈလမ်း   ဢၼ်လုၵ်ႉ တၢင်ႈတႃးၶီႈလဵၵ်း မႃးမိူင်းသၢတ်ႇ။လိူဝ်ၼၼ်ႉ ပီႊယိူဝ်ႊ တႃႇ 200 တိူၵ်ႈ ၼႆႉၵေႃႈ ထုၵ်ႇယိုတ်းဢဝ်ဝႆႉ ဢမ်ႇပၼ်ၶဝ်ႈဝဵင်း ၼႆယဝ်ႉ။

“ႁဵတ်းသင်လႄႈ ၶဝ်သမ်ႉ ပွႆႇဢွၵ်ႇတႃႈၶီႈလဵၵ်းမႃးယူႇလႃႇ ၶူဝ်းၵုၼ်ႇၸိူဝ်းၼႆႉ သင်ဝႃႈၶဝ် တေယိုတ်းဢဝ်ၸိူင်ႉၼႆ ဢမ်ႇလူဝ်ႇပၼ်ဢွၵ်ႇတႃႇၶီႈ လဵၵ်းမႃးယဝ်ႉ။ ပေႃးႁွတ်ႈထိုင်မိူင်းသၢတ်ႇသမ်ႉ မႃးယိုတ်းဢဝ်ၸိူင်ႉၼႆ မၼ်းဢမ်ႇထုၵ်ႇလီပဵၼ်ၶႃႈ။ ၶဝ်ၸႂ်ႉႁဝ်းၶႃႈသႂ်ႇၶွၼ်ႇပၼ်ၶဝ်ၼႆႉ မိူဝ်ႈႁၢင် လိူၼ်ပူၼ်ႉမႃးၼႆႉ ယွၼ်ႉႁဝ်းၶႃႈ ၸဝ်ႈၵုၼ်ႇ ပႆႇတူၵ်းလူင်းၵၼ်လႆႈလႄႈ ၶဝ်ၸင်ႇႁဵတ်း ၸိူင်ႉၼႆၶႃႈဢေႃႈ”- ၸဝ်ႈၵုၼ်ႇ သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် ႁွင်ႈၵၢၼ်ၾၢႆႇၵဵပ်းၶွၼ်ႇ တႂ်ႈၵုမ်းၵမ် သိုၵ်းမၢၼ်ႈၼႆႉ တိူဝ်းၵဵပ်းၶွၼ်ႇႁႅင်းၶိုၼ်ႈမႃး ၸိူင်ႉၼႆ ႁဵတ်းႁႂ်ႈတုမ်ႉတိူဝ်ႉၵူၼ်းမိူင်းပိုၼ်ႉတီႈ ႁူပ်ႉ တၢင်းယၢပ်ႇၽိုတ်ႇမႃးထႅင်ႈႁၢဝ်ႈႁႅင်း ၼႆယဝ်ႉ။

ၵူၼ်းပိုၼ်ႉတီႈ မိူင်းသၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၵူႈပွၵ်ႈ ၸဝ်ႈၵုၼ်ႇ တီႈမိူင်းသၢတ်ႇၼႆႉ ၶဝ်ႁူမ်ႈၵၼ်တင်းမူတ်းသေ သႂ်ႇပၼ်ၶွၼ်ႇၵႂႃႇၵူႈ ပီ။ ယၢမ်းလဵဝ် မၼ်းတုမ်ႉတိူဝ်ႉၸဝ်ႈၵုၼ်ႇၵူၺ်းဢမ်ႇၵႃး မၼ်းတုမ်ႉတိူဝ်ႉပႃးၵူၼ်းမိူင်းႁဝ်းထႅင်ႈၶႃႈဢေႃႈ။ သင်ဝႃႈ လႆႈပၼ်ၶွၼ်ႇၼမ်ၵေႃႈ ၶၼ် ၶူဝ်းၵုၼ်ႇၼႆႉ ၶိုၼ်ႈမူတ်းၶႃႈယဝ်ႉ။ ၵူႈပွၵ်ႈ ပုၼ် (ၽိလပ်ႉမျေႇ) ၼိုင်ႈထူင် 5-6 ႁဵင်။ ယၢမ်းလဵဝ် ပဵၼ်ၵႂႃႇ မိုၼ်ႇပၢႆ ၶိုၼ်ႈပဵၼ်ၶိုင်ႈၶႃႈဢေႃႈ။ ၶူဝ်းၵုၼ်ႇ တင်းမူတ်းၼႆႉ ပုင်ႈၶိုၼ်ႈပဵၼ်ၶိုင်ႈ ပဵၼ်ၶိုင်ႈႁဵတ်းၼႆၶႃႈ။ သင်လႆႈပၼ်ၶွၼ်ႇၼမ်ၵေႃႈ ၶူဝ်းၵုၼ်ႇၶိုၼ်ႈၼမ်ၼၼ်ႉၶႃႈယဝ်ႉ”- ဝႃႈၼႆ။

ၶူဝ်းၵုၼ်ႇ ဢၼ်လုၵ်ႉမႃးတၢင်းတႃႈၶီႈလဵၵ်း မိူၼ်ၼင်ႇ ၼမ်ႉယႃ/ ၵွၼ်ႈဢၢပ်ႇၼမ်ႉ၊   ပီႊယိူဝ်ႊ၊ ၼမ်ႉသူမ်ႈၼမ်ႉၸဵမ်းၼမ်ႉဝၢၼ် ၸိူဝ်းၼႆႉ ၵမ်ႈၼမ် သင်ဝႃႈ ဢမ်ႇသႂ်ႇၶွၼ်ႇပၼ်ၸိုင် ထုၵ်ႇႁွင်ႈၵၢၼ် ၾၢႆႇၵဵပ်းၶွၼ်ႇ တႂ်ႈသိုၵ်းမၢၼ်ႈ ယိုတ်းဢဝ်လၢႆ တႄႇဢဝ်ဝၼ်းတီႈ 1 လိူၼ် ၼႆႉမႃး။