ၸဝ်ႈၼိူဝ်ႉသူမ်ႈႁေႃႇၵျွၵ်ႉမႄး ၶၢင်းလွင်ႈႁႃၵိၼ်လဵင်ႉတွင်ႉယၢပ်ႇယွၼ်ႉၶူဝ်ႊဝိတ်ႉလၢမ်းၽႄႈ တိုၼ်းလၢင်းယႂ်ႇ ၵူၼ်းသိုဝ်ႉဢေႇ ဢမ်ႇပဵၼ်ၵၢၼ်။
ၼိူဝ်ႉသူမ်ႈ မိူင်းတၢင်ႈ ၵျွၵ်ႉမႄး 
ၼိူဝ်ႉသူမ်ႈႁေႃႇ မိူင်းတၢင်ႈ ၵျွၵ်ႉမႄး
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၽႄႈလၢမ်းႁၢဝ်ႈႁႅင်း ၼႂ်းမိူင်းတႆးၵူႈၸႄႈဝဵင်း တင်ႈဢဝ် လိူၼ်ၵျုၼ်ႊမႃး တေႃႇထိုင်ယၢမ်းလဵဝ် ႁူဝ်လိူၼ်ၼူဝ် ဝႅမ်ႊပိူဝ်ႊ 2021 ၶၢဝ်းတၢင်း 4 လိူၼ်ပၢႆၼႆႉ တုမ်ႉယွၼ်ႈၵၢၼ်ႁႃၵိၼ်လဵင်ႉတွင်ႉ ၸဝ်ႈသူၼ်ႁႆႈၼႃး၊ ၵူၼ်းၵႃႉၵူၼ်းၶၢႆ ပႃးၸဵမ်ၵူၼ်းႁဵတ်းတၢင်းၵိၼ်ၶၢႆဝၼ်းလႂ်ဝၼ်းၼၼ်ႉ၊ ၼိူဝ်ႉသူမ်ႈ ဢိူင်ႇမိူင်းတၢင်ႈ ၸႄႈဝဵင်းၵျွၵ်ႉမႄး ဢၼ်ၸိုဝ်ႈသဵင်လိုဝ်းလင်ဝႃႈ ပဵၼ်ၼိူဝ်ႉသူမ်ႈဢၼ်ၵိၼ်ဝၢၼ်သုတ်း ၼၼ်ႉၵေႃႈ ထိုင်တီႈလႆႈသႂ်ႇတိုၼ်းလၢင်းၼမ်သေ ၶၢႆဢမ်ႇၶၢတ်ႇလႄႈ ၸဝ်ႈၼိူဝ်ႉသူမ်ႈသုမ်းတိုၼ်း ထူပ်းတၢင်းယၢပ်ႇၽိုတ်ႇၵိၼ်းၸႂ်ၵၼ်မႃး ႁၢဝ်ႈႁႅင်း ၼႆယဝ်ႉ။
ၼၢင်းၶမ်းၸိင်ႇ ၸဝ်ႈၼိူဝ်ႉသူမ်ႈ ဢိူင်ႇမိူင်းတၢင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၵူႈပွၵ်ႈ ပူၼ်ႉမႃးၼၼ်ႉ ၼိူဝ်ႉသူမ်ႈၼႆႉ တိုၼ်းလၢင်းၵေႃႈဢမ်ႇသုင်ပဵင်းၼႆႉ ၊ ၶၢႆၼိူဝ်ႉသူမ်ႈလဵင်ႉၼႃႉႁိူၼ်းၵေႃႈၵုမ်ႇထူၼ်ႈ၊ ပုင်ႇမၢၼ်ႇၶၢႆၼိူဝ်ႉသူမ်ႈၼိုင်ႈ ဝၼ်းလႆႈငိုၼ်း 3-4 သႅၼ်ပျႃး။ ယၢမ်းလဵဝ် ၶၢႆဢမ်ႇဢွၵ်ႇ၊ ဢမ်ႇမီးၵူၼ်းသိုဝ်ႉၵိၼ်လိူင်ႇမိူၼ်ၵူႈပွၵ်ႈ ၊ ၶၢႆလႆႈၼမ်သုတ်းၵေႃႈ 3-4 မိုၼ်ႇၵူၺ်းလႄႈ ပေႃးၵိၼ်ၵႂႃႇဝၼ်းလႂ် ဝၼ်းၼၼ်ႉၵူၺ်း” ၼႆယဝ်ႉ။
သိုၵ်းယိုတ်းမိူင်း ၵၢၼ်ၵႃႉၶၢႆဢမ်ႇပဵၼ် ၊ မၢၵ်ႇၶဝ်ႈတဝ်ႈၼမ်ႉဢွၵ်ႇၼႂ်းသူၼ် ဢမ်ႇၸၢင်ႈဢဝ်ၵႂႃႇၶၢႆတၢင်းလႂ် လိူဝ်ၼၼ်ႉ ၶူဝ်ႊဝိတ်ႉသမ်ႉလၢမ်းၽႄႈၸပ်းၵၼ်ၼမ် လူႉတၢႆၵေႃႈၼမ်၊ ၾၢႆႇၼိုင်ႈ တီႈၵျွၵ်ႉမႄး ၼႆႉ သိုၵ်းၸၢဝ်းၶိူဝ်းၼင်ႇၵၼ်သမ်ႉပိုတ်းယိုဝ်းၵၼ်လႄႈ ၵူၼ်းပၢႆႈၽေးသိုၵ်းၼပ်ႉႁူဝ်ႁဵင်ဢမ်ႇၸၢင်ႈပွၵ်ႈၶိုၼ်းႁိူၼ်းယေးတီႈယူႇ။ ၶၢင်ႉၶမ်ဝႆႉတီႈပၢင်သဝ်းၵူၼ်းပၢႆႈၽေးသိုၵ်း တေႃႇထိုင်ဝၼ်းမိူဝ်ႈၼႆႉလႆႈမႃးၶၢဝ်းတၢင်း 5-6 လိူၼ် ။ ယၢပ်ႇၽိုတ်ႇၶဝ်ႈၼမ်ႉတၢင်းၵိၼ်။ ၵူၼ်းၼႂ်းမိူင်းၵေႃႈ လႆႈၽိမ်းၵိၼ်ၽိမ်းၸၢႆႇ လႄႈ ၵၢၼ်ၵႃႉၶၢႆ တၢင်းၵိၼ်တၢင်းယႅမ်ႉ ယၢပ်ႇယၢၵ်ႈမႃးၵူႈဝၼ်း ၵူၼ်းမိူင်းၵျွၵ်ႉမႄးၵေႃႉၼိုင်ႈလၢတ်ႈၼင်ႇၼႆ။
ယၢမ်းလဵဝ်ၶၢဝ်းၶူဝ်ႊဝိတ်ႉၼႆႉ ၼိူဝ်ႉမူ 1 ၸွႆႉ 15000 ပျႃး၊ ၶဝ်ႈသၢၼ်ၼိုင်ႈပေႇ 1500 ပျႃးတေႃႇထိုင် 2000 ပျႃး။ ၼိူဝ်ႉမူၼိုင်ႈၸွႆႉ လႆႈၸႂ်ႉၶဝ်ႈ ၼိုင်ႈၶၵ်ႉ( 2 ၵွၵ်းၼမ်ႉၼူမ်းၶိုင်ႈ) လႆႈၼိူဝ်ႉသူမ်ႈမွၵ်ႈ 30 ႁေႃႇထိုင် 40 ႁေႃႇ။ ၼိူဝ်ႉသူမ်ႈတုမ်း 10 ႁေႃႇသမ်ႉၶိုၼ်းၶၢႆ 5000 ပျႃး။ ၵွၼ်ႇၼႃႈသိုၵ်းပႆႇယိုတ်းမိူင်း ၶူဝ်ႊဝိတ်ႉပႆႇၶဝ်ႈမႃးၼၼ်ႉ ၼိူဝ်ႉသူမ်ႈၼိုင်ႈႁေႃႇ 300 ပျႃး 2 ႁေႃႇ 500 ပျႃး ၸဝ်ႈၼိူဝ်ႉသူမ်ႈဝဵင်းလႃႈသဵဝ်ႈၵေႃႉၼိုင်ႈလၢတ်ႈၼင်ႇၼႆ။
ၼၢင်းၶမ်းၸိင်ႇလၢတ်ႈတီႈၽူႈတွႆႇႁွၵ်ႈဝႃႈ မၼ်းၼၢင်း ပဵၼ်ၵူၼ်းႁဵတ်းၶၢႆ ၼိူဝ်ႉသူမ်ႈမႃး ၸဵမ်မိူဝ်ႈပၢၼ်ပေႃႈမႄႈၶၢဝ်းတၢင်းမီး 30 ပီပၢႆယဝ်ႉ။ ၶၢႆၼိူဝ်ႉသူမ်ႈလဵင်ႉၼႃႈႁေႃတေႃႇႁိူၼ်းမႃး၊ လႆႈ ၵမ်ႉၸွႆႈ လုၵ်ႈလၢင်း ႁဵၼ်းလိၵ်ႈလၢႆးမႃးလီငၢမ်း။ ၵူၺ်းၵႃႈ ယၢမ်းလဵဝ် ၼိူဝ်ႉသူမ်ႈၵေႃႈ ဢမ်ႇၶၢႆလီလႄႈ တႃႇတေလႆႈ တိုၼ်းလၢင်းတႃႇမိူဝ်းၼႃႈ ၵေႃႈ ၶၢၼ်ၸႂ်မႃးၵူႈမိုဝ်ႉၵူႈဝၼ်း ၼႆယဝ်ႉ။
