ၵူၼ်းမိူင်းမၢဝ်း ႁူမ်ႈၵၼ် တုၵ်းယွၼ်း ဢွၵ်ႇၼႄၵၢင်ၸႂ် တေႃႇလူင်ပွင်ၸိုင်ႈၶႄႇ ယွၼ်ႉပိၵ်ႉဢိုတ်း Lockdown မႃး မီးၶၢဝ်းတၢင်းၸမ် 7 လိူၼ် ထူပ်းတၢင်းယၢပ်ႇၽိုတ်ႇလွင်ႈၵိၼ်ယႅမ်ႉ။
မိူဝ်ႈၼႆႉ ဝၼ်းတီႈ 2/11/2021 ၵူၼ်းမိူင်းမၢဝ်း ၼႂ်းၸိုင်ႈမိူင်းၶႄႇ လႅၼ်လိၼ်တႆး – ၶႄႇၼၼ်ႉ ႁူမ်ႈၵၼ်သေ တုၵ်းယွၼ်း ဢွၵ်ႇၼႄၵၢင် ၸႂ် တေႃႇလူင်ပွင်ၸိုင်ႈၶႄႇ ၊ လွင်ႈပိၵ်ႉဢိုတ်း Lockdown မိူင်းမၢဝ်းမႃးၸမ် 7 လိူၼ် ယွၼ်ႉၶူဝ်ႊဝိတ်ႉ 19 ၼၼ်ႉ ႁဵတ်းႁႂ်ႈၵူၼ်း မိူင်း ထူပ်းလွင်ႈယၢပ်ႇၽိုတ်ႇၵိၼ်းၸႂ် လွင်ႈၶဝ်ႈၼမ်ႉတၢင်းၵိၼ် ၼႆယဝ်ႉ။
ၵူၼ်းမိူင်းမၢဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ– “မိူင်းမၢဝ်းၼႆႉ ထုၵ်ႇသင်ႇပိၵ်ႉ Lockdown မႃးၸမ် 7 လိူၼ် ယဝ်ႉ။ ၵွပ်ႈဝႃႈ ၵူၼ်း မိူင်းၼႂ်းပိုၼ်ႉတီႈ ႁူပ်ႉလွင်ႈယၢပ်ႇၽိုတ်ႇ။ ႁႃၵိၼ်လဵင်ႉတွင်ႉယၢပ်ႇ လိူဝ်ႁႅင်း ။ ၵွပ်ႈၼႆၸင်ႇ ဢွၵ်ႇၼႄၵၢင်ၸႂ် တုၵ်းယွၼ်း ႁႂ်ႈၸွႆႈၵႄႈလိတ်ႈပၼ်၊ ယႃႇႁႂ်ႈလႆႈၵမ်းၵမ်းသေႇတမ်ၶူႈၼင် ၼႆဢေႃႈ”- ဝႃႈၼႆ။
ဢိင်ၼိူဝ် လွင်ႈၵူၼ်းမိူင်းမၢဝ်း ဢွၵ်ႇၼႄၵၢင်ၸႂ် တုၵ်းယွၼ်းၸိူင်ႉၼႆသေ ယူႇတီႈၾၢႆႇၽူႈမီးပုၼ်ႈၽွၼ်းလူင်ပွင်ၸိုင်ႈၶႄႇ ႁူပ်ႉဢုပ်ႇဢူဝ်းငူပ်ႉငီႉၸွမ်း ၵူၼ်းမိူင်းသေလၢတ်ႈဝႃႈ တေဢဝ်တၢင်ႇထိုင်တၢင်းၼိူဝ် တႃႇၸွႆၵႄႈလိတ်ႈပၼ် ဝႃႈၼႆ။
“ ၽွင်း Lockdown ယူႇၼႆႉ ႁဝ်းၶႃႈ လႆႈၵႂႃႇၵူတ်ႇထတ်းတၢင်းပဵၼ် ၶူဝ်ႊဝိတ်ႉ 19 ၊ သေႇၶူႈၼင် ၼိုင်ႈဝူင်ႈၼိုင်ႈၵမ်း ဢမ်ႇၼၼ် 2 ဝၼ်းၼိုင်ႈပွၵ်ႈ ။ ၵႃႈၸူဝ်ႈ Lockdown မႃးၼႆႉ ႁဝ်းၶႃႈ ၵူတ်ႇ ထတ်းယဝ်ႉ မွၵ်ႈ 100 ပွၵ်ႈၼႆႉယဝ်ႉၶႃႈ ၊ မၼ်းၵိၼ်းၸႂ်ၶႃႈဢေႃႈ”- ၵူၼ်းပိုၼ်ႉတီႈမိူင်းမၢဝ်း သိုပ်ႇလၢတ်ႈၼႄၼင်ႇၼႆ။
မိူင်းမၢဝ်းၼႆႉ ပဵၼ်ၼႃးလိၼ်ၽွင်းငမ်းတူဝ်ၵဝ်ႇတႂ်ႈၶူင်း လူင်ပွင်ၸိုင်ႈမိူင်းၶႄႇ၊ ပဵၼ်ဝဵင်းလႅၼ်လိၼ်တိတ်းၸပ်း မိူင်းတႆးပွတ်းႁွင်ႇ၊ ပဵၼ်ဝဵင်းၵႃႉၶၢႆ ၸွမ်းလႅၼ်လိၼ်ဝဵင်းၼိုင်ႈ ။
