သိုၵ်းမၢၼ်ႈ ၶဝ်ႈဝဵင်းၾၢႆၶုၼ်တီႉၺွပ်းၵူၼ်းမိူင်း ၵူၼ်းလုမ်းလႃးၵူၼ်းထဝ်ႈ ၸိူဝ်းဢမ်ႇၸၢင်ႈပၢႆႈၽေးပၢင်တိုၵ်း တီႉဢဝ် ၵႂႃႇ 19 ၵေႃႉ။
မိူဝ်ႈဝႃး ဝၼ်းတီႈ 28/10/2021 သိုၵ်းမၢၼ်ႈ ၾၢႆၶုၼ် ၶဝ်ႈသွၵ်ႈတဝ် ၼႂ်းပွၵ်ႉသူၺ်ႇပျီႇဢေးသေ တီႉမတ်ႉဢဝ်ၵူၼ်းၼုမ်ႇၵူၼ်းၸၢႆးၼႂ်းပွၵ်ႉ ၸိူဝ်းပႂ်ႉပွၵ်ႉလႄႈ ပႂ်ႉလုမ်းလႃးၵူၼ်းထဝ်ႈ ဢဝ်ၵႂႃႇၸွမ်းသၢႆသိုၵ်းၶဝ် သေ ဢဝ်ၵႂႃႇၶင်ဝႆႉ။
ၵူၼ်းၾၢႆၶုၼ် လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်တီႉမတ်ႉသေဢဝ်ၵႂႃႇမွၵ်ႈ 20 ၵေႃႉၼႆႉဢေႃႈ ။ပႃးတင်းၵူၼ်းထဝ်ႈသေဢေႃႈ။ ၶဝ်ဢမ်ႇၸႂ်ႈၵူၼ်းၼုမ်ႇၸုမ်း PDF ၶႃႈလေႃႇ။ သိုၵ်းမၢၼ်ႈႁဵတ်းႁၢႆႉႁင်းၶဝ်ၼႃႇ မတ်ႉမိုဝ်း ပိၵ်ႉတႃ။ မတ်ႉၸွမ်းၵၼ်ပဵၼ်သွႆႉသေဢဝ်ၵႂႃႇ။ ပိူၼ်ႈပေႃးထဝ်ႈယဝ်ႉဢမ်ႇၸၢင်ႈလႅၼ်ႈပၢႆႈယဝ်ႉဢမ်ႇလူဝ်ႇႁဵတ်းထိုင်ၼၼ်ႉၵေႃႈလႆႈ။” – ဝႃႈၼႆ။
သိုၵ်းမၢၼ်ႈၼႆႉ ယူႇၸွမ်းၼႂ်းၵိဝ်ႇၼႂ်းဝၢၼ်ႈ ၊ ပႂ်ႉႁွင်ႉဢဝ်ၵူၼ်းၵႂႃႇမႃးၸိူဝ်းၼၼ်ႉသေၵူတ်ႇထတ်းထဵတ်ႈထၢမ် ။ ၵူၼ်းမိူင်းဢမ်ႇလႆႈယူႇလီၸႂ် ၵူၼ်းၾၢႆၶုၼ်လၢတ်ႈ။
တီႈဝဵင်းၾၢႆၶုၼ်ၼႆႉသိုၵ်းမၢၼ်ႈ တၢင်းသိုၵ်းၵူၼ်းမိူင်း PDF ပိုတ်းယိုဝ်းၵၼ်။ သိုၵ်းမၢၼ်ႈမၢတ်ႇၸဵပ်းလူႉတၢႆၼမ်လႄႈ တင်ႈၸႂ် တဵၵ်းတဵင်ပေႉၵိၼ် ႁဵတ်းႁၢႆႉၸႃႉ တေႃႇၵူၼ်းမိူင်း ။ ယိုဝ်းၵွင်ႈလူင်ၵွင်ႈဢွၼ်ႇၶဝ်ႈဝၢၼ်ႈၶဝ်ႈဝဵင်း ၵူၼ်းမိူင်းဢၼ်မၢတ်ႇၸဵပ်းလူႉတၢႆၸွမ်းၵေႃႈမီး။
“တႄႇဢဝ် ဝၼ်းတီႈ 23 ၼၼ်ႉမႃး တေႃႇထိုင်မိူဝ်ႈဝႃး ယၢမ်းဝၢႆးဝၼ်းၼႆႉ ၾၢႆႇသိုၵ်းမၢၼ်ႈ ယိုဝ်းမၢၵ်ႇၶဝ်ႈၼႂ်းဝၢၼ်ႈ ၼႂ်းဝဵင်း ၸိူဝ်းၼႆႉ။ ႁဵတ်းႁႂ်ႈမၢၵ်ႇၼႆႉ တိူဝ်ႉၺႃးၵူၼ်းမိူင်းလႆႈမၢတ်ႇၸဵပ်း လႆႈပၢႆႈယၢၼ်ႁိူၼ်းယေးၵႂႃႇၶွၼ်ႈၵၼ် ယူႇတီႈထိူၼ်ႇတီႈလွတ်ႈၽေး။ၵူၼ်းမိူင်းယူႇယၢပ်ႇၵိၼ်းၸႂ်လိူဝ်ႁႅင်းဢေႃႈ။ ၸဝ်ႈတႃႇၼ တၢင်ႇတီႈ ၶႂ်ႈမႃးၸွႆႈၵူၼ်းပၢႆႈၽေးယူႇၵေႃႈ ယွၼ်ႉပိူဝ်ႈငဝ်းလၢႆးလႄႈ ဢမ်ႇမီးၽႂ်ႁတ်းမႃးၸွႆႈထႅမ်ၶႃႈ”- ၵူၼ်းပိုၼ်ႉ တီႈ သိုပ်ႇလၢတ်ႈၼႄၼင်ႇၼႆ။
ဝၼ်းတီႈ 23/10/2021 ပူၼ်ႉမႃး သိုၵ်း PDF ဝဵင်းၾၢႆၶုၼ် ၶဝ်ႈလူမ်ႇတပ်ႉမၢၼ်ႈ 336 ပိုတ်းယိုဝ်း သိုၵ်းမၢၼ်ႈတၢႆ 5 ၵေႃႉ ယိုတ်း ၵွင်ႈၵၢင်ႇသိုၵ်းမၢၼ်ႈ ၵႂႃႇပႃး။ဝၢႆးၼၼ်ႉသိုၵ်းမၢၼ်ႈၶဝ်ႈဝဵင်းၸႂ်ႉလၢႆးႁုၵ်ႉႁၢႆႉၵူႈလၢႆးတေႃႇၵူၼ်းမိူင်းဝဵင်းၾၢႆၶုၼ် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ