ၸၢႆးဢွင်ႇၺုၼ်ႉ ၵူၼ်းမိူင်းယႆ ႁႅင်းၵၢၼ်တႆး ၼႂ်းၵဵင်းမႆႇ ၺႃးရူတ်ႉၵႃးၽႃႇသႂ်ႇ မၢတ်ႇၸဵပ်းႁၢဝ်ႈႁႅင်း ယၢမ်းလဵဝ် လူဝ်ႇတၢင်းၸွႆႈထႅမ် လိူတ်ႈၶၼ်ၽႂ်း ဝႃႈၼႆ။

မိူဝ်ႈဝႃး ဝၼ်းတီႈ 27/10/2021 ယၢမ်းႁူဝ်ၶမ်ႈ 5 မူင်းပၢႆ ၸၢႆးဢွင်ႇၺုၼ်ႇ ဢႃယု 22 ပီ  ထူပ်းၽေးၵိုင်ႉၵၢင်ႉ ရူတ်ႉၶိူင်ႈဢၼ်မၼ်းၶပ်းမႃး ၽႃႇၺႃးၵၼ်တင်းရူတ်ႉၵႃးလမ်းၼိုင်ႈ   တီႈၼႃးႁူင်းပလိၵ်ႈမႄႈၾႅၵ်ႇ ၸႄႈဝဵင်းမႄႈရိမ်း ၸႄႈတွၼ်ႈၵဵင်းမႆႇ ၸိုင်ႈထႆး တွၼ်ႈၼိူဝ် ယၢမ်းလဵဝ် လႆႈယူတ်းယႃတူဝ်ဝႆႉ တီႈ ႁူင်းယႃၼၶွၼ်းၽိင်း(ပႃႇငႄႉ) သေ လူဝ်ႇ လိူတ်ႈၶၼ်ၽႂ်း ၼႆယဝ်။

ၵေႃႉပဵၼ်မႄးၼၢင်း ၸၢႆးဢွင်ႇၺုၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် ဢၼ်လူဝ်ႇႁႅင်းတီႈသုတ်းတႄႉ ပဵၼ်လိူတ်ႈၶႃႈဢေႃႈ။ ပဵၼ်လိူတ်ႈၵုပ်ႉ သင်ၵေႃႈယဝ်ႉ ႁပ်ႉမူတ်းၶႃႈ။ မိူဝ်ႈၵႆႈၼႆႉ လႆႈၽႃႇတတ်းၵႂႃႇထႅင်ႈ ပွၵ်ႈၵမ်းသွင် တေႃႇထိုင်ယၢမ်းလဵဝ် မၼ်း ပႆႇႁူႉတူဝ်ၶႃႈ။ လႆႈတိူဝ်ႉမၢတ်ႇၸဵပ်း ႁၢဝ်ႈႁႅင်းၶႃႈဢေႃႈ ႁဝ်းၶႃႈ ဢွၼ်ၵၼ်ပႂ်ႉတူၺ်းငဝ်းလၢႆးမၼ်း ဝႆႉယူႇ ၶႃႈ”- ဝႃႈၼႆ။

 မိူဝ်ႈဝႃး ဝၼ်းတီႈ 27 ယၢမ်းႁူဝ်ၶမ်ႈ  မၼ်းၸၢႆး ၵႂႃႇတၢင်းၼွၵ်ႈသေ ဢၢၼ်းတေပွၵ်ႈႁိူၼ်းၶိုၼ်း၊ ၽွင်းထိုင်တီႈၼႃႈႁူင်းပလိၵ်ႈမႄႈၾႅၵ်ႇ ၼၼ်ႉ မၼ်းဢၢၼ်းႁေႃႈရူတ်ႉၶိူင်ႈၶၢမ်ႈရူတ်ႉတၢင်းၼႃႈ။ ၵူၺ်းၵႃႈသမ်ႉမီးရူတ်ႉလမ်းၼိုင်ႈမႃးႁေႃႈတတ်းၼႃႈရူတ်ႉမၼ်းလႄႈ လႆႈၽႃႇၺႃးၵၼ် မေးၼၢင်းမၼ်းလၢတ်ႈၽူႈတွႆႇႁွၵ်ႈၼင်ႇၼႆ။  

ယၢမ်းလဵဝ် ၸၢႆးဢွင်ႇၺုၼ်ႇၼႆႉ လႆႈယူတ်းယႃတူဝ်ဝႆႉတီႈ ႁူင်းယႃပႃႇငႄႉ သင်ဝႃႈ ၽူႈလႂ် ၶႂ်ႈၸွႆႈထႅမ် လူႇလိူတ်ႈၼႆၸိုင် ၵပ်းသိုပ်ႇလႆႈတီႈ မၢႆၾူၼ်း 063 297 6547 လႆႈယူႇ ဝႃႈၼႆ။

ၸၢႆးဢွင်ႇၺုၼ်ႇၼႆႉ ပဵၼ်ၵူၼ်းၸႃတိ ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ လႆႈႁူႉၼင်ႇၼႆ။