ၶွင်ႇသီႇသိုၵ်းမၢၼ်ႈ ယိုတ်းမိူင်း/ မိူၵ်ႈမႂ်ႈ လၢမ်းလိမ်းယိုဝ်းၵွင်ႈ ပွႆႇမၢၵ်ႇသႂ်ႇ ႁိူၼ်းယေးၵူၼ်းဝၢၼ်ႈထႅင်ႈ တီႈဝဵင်းၾၢႆၶုၼ်သေ တိူဝ်ႉၺႃး ၵူၼ်းမိူင်း ပိုၼ်ႉတီႈ လႆႈမၢတ်ႇၸဵပ်းၸွမ်း ၵေႃႉၼိုင်ႈ ဝႃႈၼႆ။

တႄႇဢဝ် ဝၼ်းတီႈ 26/10/2021 ယၢမ်းႁူဝ်ၶမ်ႈ 5 မူင်းပၢႆ တေႃႇထိုင် မိူဝ်ႈၼႆႉ ဝၼ်းတီႈ 27/10/2021 ယၢမ်းၵၢင်ၼႂ်ၸဝ်ႉ 3 မူင်းပၢႆ ၶွင်ႇသီႇ သိုၵ်းမၢၼ်ႈ ယိုတ်းမိူင်း ဢဝ်ၵွင်ႈ/ မၢၵ်ႇလူင် လၢမ်းလိမ်းယိုဝ်း/ ပွႆႇသႂ်ႇ ၼႂ်းပွၵ်ႉသူၺ်ႇၽီႇဢေး ဝဵင်းၾၢႆၶုၼ် ၸႄႈတွၼ်ႈတူၼ်ႈတီး ၸိုင်ႈတႆး ပွတ်းၸၢၼ်း တိူဝ်ႉၺႃး ၵူၼ်းမိူင်းပိုၼ်ႉတီႈ ၽူႈၸၢႆး ဢႃယု 60 ပၢႆ ၵေႃႉၼိုင်ႈ လႆႈမၢတ်ႇၸဵပ်းတီႈၶႅၼ် ၼႆယဝ်ႉ။

ၵူၼ်းပိုၼ်ႉတီႈ ဝဵင်းၾၢႆၶုၼ် လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းတႄႉ ဢမ်ႇၸႂ်ႈၶႃႈ သိုၵ်းမၢၼ်ႈတင်ႈၸႂ်သေ လၢမ်းလိမ်းယိုဝ်းၵွင်ႈ ပွႆႇမၢၵ်ႇၶဝ်ႈ ၼႂ်းမူႇဝၢၼ်ႈၵူၺ်း။ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းထဝ်ႈ ၽူႈၸၢႆး ဢႃယု 60 ပၢႆ ၵေႃႉၼိုင်ႈ လႆႈတိူဝ်ႉၺႃးမၢတ်ႇၸဵပ်းၸွမ်း တီႈၶႅၼ်မၼ်းၸၢႆး ၶႃႈ ဢေႃႈ”- ဝႃႈၼႆ။

ယွၼ်ႉၶွင်ႇသီႇသိုၵ်းမၢၼ်ႈ လၢမ်းလိမ်းယိုဝ်းၵွင်ႈ/ ပွႆႇမၢၵ်ႇ သႂ်ႇၼႂ်းပွၵ်ႉသူၺ်ႇၽီႇဢေးသေ တုမ်ႉတိူဝ်ႉၵူၼ်းဝၢၼ်ႈမၢတ်ႇၸဵပ်း ၸွမ်းသေဢမ်ႇၵႃး ၶူဝ်းၶွင်ႁိူၼ်းယေး ၵူၼ်းဝၢၼ်ႈလႆႈလူႉၵွႆ/ သုမ်းၸွမ်းတင်းၼမ်။ ထိုင်မႃး မိူဝ်ႈၼႆႉ ဝၼ်းတီႈ 27 ယၢမ်းၵၢင်ၼႂ်ၸဝ်ႉ 5 မူင်း ၵူၼ်းဝၢၼ်ႈ ၼႂ်းပွၵ်ႉၼၼ်ႉ ဢွၼ်ၵၼ်ပၢႆႈမႃးသွၼ်ႈဝႆႉ တီႈဝတ်ႉမုၼ်ၸဝ်ႈ ႁၢၼ်ႉတေႃႇထိုင်ယၢမ်းလဵဝ် ပႆႇႁတ်းပွၵ်ႈ မၢင်ၵေႃႉ ပႆႇလႆႈၵိၼ်ၶဝ်ႈ ၸိူဝ်းၼႆႉၵေႃႈ မီး ၼႆယဝ်ႉ။

မိူဝ်ႈဝႃးဝၼ်းတီႈ 26 ယၢမ်းၵၢင်ၼႂ် 10 မူင်းၼၼ်ႉ တီႈပွၵ်ႉၺွင်ႇပိၼ်ႇတႃႇ ဝဵင်းၾၢႆၶုၼ်ၵေႃႈ သိုၵ်းမၢၼ်ႈဢဝ်ၵွင်ႈ/ မၢၵ်ႇလူင် လၢမ်းလိမ်းယိုဝ်းသႂ်ႇ ၵူႈႁူးၵူႈတၢင်းသေ တိူဝ်ႉၵူၼ်းၼႂ်းပွၵ်ႉ လႆႈမၢတ်ႇၸဵပ်း ၸွမ်း 2 ၵေႃႉ ယၢမ်းလဵဝ် သူင်ႇယူတ်းယႃတူဝ်ဝႆႉတီႈ ႁူင်းယႃတူၼ်ႈတီး ၼႆယဝ်ႉ။

ပူၼ်ႉမႃး 2-3 ဝၼ်း ပၢင်တိုၵ်းပဵၼ်ၸွမ်းၵွင်းလွႆ ႁိမ်းဝဵင်းၾၢႆၶုၼ်ယူႇသေတႃႉ မိူဝ်ႈၼႆႉတႄႉဢမ်ႇမီးပၢင်တိုၵ်း။ ၵူၺ်းၵႃႈသိုၵ်းမၢၼ်ႈမႃးဢဝ်တီႈ ယူႇၼႂ်းဝဵင်း ၼႂ်းပွၵ်ႉသေမိူၼ်တင်ႈၸႂ်ၶႆႈႁဵတ်းတေႃႇၵူၼ်းမိူင်းၵမ်းသိုဝ်ႈဝႆႉ ၵူၼ်းၾၢႆၶုၼ်လၢတ်ႈၼင်ႇၼႆ။

ၵူၺ်းၵႃႈဝၢႆးလင် သိုၵ်း PDF ၶဝ်ႈလူမ်ႇတပ်ႉမၢၼ်ႈ 336 ဝဵင်းၾၢႆၶုၼ် ၊ ပိုတ်းယိုဝ်းသိုၵ်းမၢၼ်ႈတၢႆ 5 ၵေႃႉ ယိုတ်းဢဝ်ၵွင်ႈၵၢင်ႇသိုၵ်းမၢၼ်ႈမႃး မိူဝ်ႈဝၼ်းတီႈ 23/10/2021 ၼၼ်ႉသေ သိုၵ်းမၢၼ်ႈၶိုၼ်းဢဝ်လၢႆးမိူၵ်ႈၶဝ်ႈယိုဝ်းၼႂ်းပွၵ်ႉၼႂ်းဝဵင်းၾၢႆၶုၼ်မႃးၼင်ႇၼႆ။