သိုၵ်းမၢၼ်ႈယိုဝ်းၵွင်ႈလဵၵ်ႉၵွင်ႈယႂ်ႇသႂ်ႇၼႂ်းဝဵင်းၾၢႆၶုၼ် ၸိုင်ႈတႆးပွတ်းၸၢၼ်း တိူဝ်ႉႁိူၼ်းယေးၵူၼ်းဝၢၼ်ႈ ၵူၼ်းမိူင်းမၢတ်ႇၸဵပ်းၸၢၵ်ႇမၢၵ်ႇ။
ဝၼ်းတီႈ 24/10/2021 ယၢမ်းၵၢင်ဝၼ်းတဵင်ႈ သိုၵ်းမၢၼ်ႈလႄႈသိုၵ်း PDF ၾၢႆၶုၼ်၊ သိုၵ်းယၢင်းလႅင် KNDF ပဵၼ်ပၢင်တိုၵ်းၵၼ်တီႈၵွင်းမူးၵုင်းသႃႇ၊ ဝဵင်းၾႆၶုၼ် ၸိုင်ႈတႆးပွတ်းၸၢၼ်း ဢၼ်မီးတီႈလႅၼ်လိၼ်မိူင်းတႆး လႄႈမိူင်းယၢင်းလႅင်။ သိုၵ်းမၢၼ်ႈယိုဝ်းၵွင်ႈလူင်ၵွင်ႈဢွၼ်ႇလူင်ၵႂႃႇၵူႈႁူးၵူႈတၢင်း။
ၽူႈၸၢႆးၵူၼ်းဝဵင်းၾၢႆၶုၼ်လၢတ်ႈတီႈၽူႈတွႆႇႁွၵ်ႈဝႃႈ-“ ၶဝ်ယိုဝ်းၵၼ်ၼိူဝ်လွႆၵုင်းသႃႇ၊ၶဝ်ယိုဝ်းၵၼ်ဢမ်ႇပေႃးႁိုင် သိုၵ်းမၢၼ်ႈယိုဝ်းၵွင်ႈလူင် လူင်ၵႂႃႇၵူႈႁူးၵူႈတၢင်း။တိူဝ်ႉၺႃးႁိူၼ်းၵူၼ်း 2 လင်လႄႈ ႁၢၼ်ႉၶၢႆတၢင်းၶၢႆ ႁၢၼ်ႉၼိုင်ႈ။ ၵူၼ်းမိူင်းၵေႃႈ မၢတ်ႇၸၢၵ်ႇမၢၵ်ႇၵွင်ႈလူင်မီးလၢႆလၢႆၵေႃႉ။ ပၢင်တိုၵ်းႁိုင်မွၵ်ႈ ႞ၸူဝ်ႈမူင်း။ ၾၢႆႇသိုၵ်းမၢၼ်ႈၵူၼ်းလူႉတၢႆမီးၼမ်။ လၢႆၵေႃႉတႄႉႁဝ်းၶႃႈၵေႃႈဢမ်ႇႁူႉတႅတ်ႈတေႃး ”- ဝႃႈၼႆ။
ၸၢၵ်ႇမၢၵ်ႇၵွင်ႈလူင်တိူဝ်ႉသႂ်ႇႁိူၼ်းၵူၼ်းဝၢၼ်ႈ လင်ၶႃးပွင်ႇပဵဝ်၊ တီႈၽၵ်းတူႁူးလႅင်း၊ တူႈသႂ်ႈၶူဝ်းၸိူဝ်းၼႆႉလူႈၵွႆတင်းၼမ်။
“ႁိူၼ်းၵူၼ်းဝၢၼ်ႈလူႉၵွႆ၊ ၸဝ်ႈႁိူၼ်းဢမ်ႇမီးတီႈယူႇလႄႈ လႆႈၵႂႃႇယွၼ်းယူႇၸွမ်းပီႈၼွင်ႉ။ မိူဝ်ႈၵူႈပွၵ်ႈ မီးၵူၼ်းဝၢၼ်ႈပၢႆႈၽေးသိုၵ်းၶဝ်ႈဝဵင်း။ ၵမ်းၼႆႉတႄႉ ၵူၼ်းၼႂ်းဝဵင်းၵေႃႈဢမ်ႇမီးလွင်ႈႁူမ်ႇလူမ်ႈ ၊ တေလႆႈပၢႆႈၽေးသိုၵ်းၵႂႃႇတၢင်းလႂ်ဢမ်ႇႁူႉယဝ်ႉၶႃႈ။ ပေႃးၶဝ်ယိုဝ်းၵွင်ႈလူင်ၵႂႃႇၵူႈႁူးၵူႈတၢင်း”- ၽူႈၸၢႆးၵူၼ်းၾၢႆၶုၼ်ၼၼ်ႉသိုပ်ႇလၢတ်ႈၼင်ႇၼႆ။
မိူၼ်ၼၼ်ၼင်ႇၵဝ်ႇ ၵွၼ်ႇၼႃႈၼၼ်ႉဝၼ်းၼိုင်ႈၵေႃႈ သိုၵ်းမၢၼ်ႈလႄႈသိုၵ်းPDF မိူင်းပၢႆးပိုတ်းယိုဝ်းၵၼ်တီႈမိူင်းပၢႆး။ ၵူၼ်းမိူင်းပၢႆးမီးလွင်ႈမၢတ်ႇၸဵပ်း၊ သိုၵ်းမၢၼ်ႈၵေႃႈလူႉတၢႆဢမ်ႇယွမ်း 10 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ