ၼႂ်းလိူၼ်ဢွၵ်ႊထိူဝ်ႊပိူဝ်ႊၼႆႉ တီႈဝဵင်းလႃႈသဵဝ်ႈ ၵႆႉလႆႈငိၼ်းသဵင်မၢၵ်ႇတႅၵ်ႇလႄႈ ၵူၼ်းမိူင်း  ဢွၼ်ၵၼ်တူၵ်းၸႂ် တိုၼ်ႇသၢၼ်ႈၵူဝ် ယွၼ်ႉ ဢမ်ႇမီးလွင်ႈႁူမ်ႇလူမ်ႈ ဝႃႈၼႆ။

မိူဝ်ႈဝၼ်းတီႈ 24/10/2021 ယၢမ်းၵၢင်ၶမ်ႈ 7 မူင်းပၢႆ ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ငိၼ်းသဵင်မၢၵ်ႇတႅၵ်ႇ 2 ၵမ်းလႄႈ ႁဵတ်းႁႂ်ႈ ၵူၼ်း မိူင်းၼႂ်းပိုၼ်ႉတီႈ တူၵ်းၸႂ် တိုၼ်ႇသၢၼ်ႇၵူဝ် ယဝ်ႉၵေႃႈ သဵင်မၢၵ်ႇတႅၵ်ႇၼၼ်ႉ ပဵၼ်ၼမ်ႉမိုဝ်းၽႂ် ၸုမ်းလႂ် ႁဵတ်းဢၼ်ဝႃႈၼၼ်ႉၵေႃႈ ဢမ်ႇလႆႈႁူႉ ၼႆယဝ်ႉ။

ၵူၼ်း လႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ၵူဝ် ဢေႃႈ ဢမ်ႇယၢမ်ႈယိၼ်းသဵင်တႅၵ်ႇႁႅင်းၸိူင်ႉၼႆၶႃႈ။ ပွၵ်ႈၼႆႉ သဵင်တႅၵ်ႇမၼ်းလင်ႁႅင်းၼႃႇ။ မၼ်းယၢၼ်ႁိူၼ်း ႁဝ်းၶႃႈယူႇၼႆႉ မွၵ်ႈလၢႆလင်ၵူၺ်းလႄႈ ဢွၼ်ၵၼ်တူၵ်းၸႂ် ၶႃႈဢေႃႈ။ ၵူဝ်ပဵၼ်ပၢင်တိုၵ်း လူင်ၼၼ်ႉၼႃႇၼေႃ။ ထႅင်ႈၾၢႆႇၼိုင်ႈၵေႃႈ ႁဝ်းၶႃႈသမ်ႉ ယူႇဝႆႉ ႁိမ်းၸမ်တပ်ႉထႅင်ႈလႄႈ ၵူဝ်ၶႃႈဢေႃႈ”- ဝႃႈၼႆ။

ဢိင်ၼိူဝ်  သဵင်မၢၵ်ႇၵႆႉတႅၵ်ႇ ၼႂ်းဝဵင်းလႃႈသဵဝ်ႈၼႆႉသေ ၵူၼ်းမိူင်းတႄႉ မႆႈၸႂ် ၵူဝ်ပဵၼ်ပၢင်တိုၵ်း သိုၵ်းသိူဝ် ၵူဝ်လႆႈပၢႆႈၽေး သိုၵ်း  ၼႆယဝ်ႉ။

ၵူၼ်းပွၵ်ႉ 12 ဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ႁဝ်းၶႃႈ လွမ်ၵူဝ် ဝႆႉၶႃႈဢေႃႈ။ မိူင်း ႁဝ်းၶႃႈ ၼႆႉ ဢမ်ႇမီး လွင်ႈႁူမ်ႇလူမ်ႈ ယဝ်ႉ။ ၵူဝ်ပဵၼ်ပၢင်တိုၵ်းၼႂ်းဝဵင်း၊  ၵူဝ်လႆႈပၢႆႈၽေးသိုၵ်း။  ပေႃးပဵၼ်မႃး တေလႆႈပၢႆႈၵႂႃႇယူႇတီႈလႂ် တေဢွၼ်ၵၼ်ယၢပ်ႇၽိုတ်ႇမူတ်းၶႃႈဢေႃႈ။ မိူဝ်ႈလဵဝ်ၼႆႉ သမ်ႉပဵၼ်ငဝ်းလၢႆးဢၼ်လီၵူဝ် လႄႈ ငိၼ်းသဵင်သင်ဢိတ်းဢွတ်းၵေႃႈ လႆႈၾၢင်ႉဝႆႉယူႇၶႃႈဢေႃႈ။  ”- ဝႃႈၼႆ။

ၼႂ်းၶၢဝ်းတၢင်း 2-3 ဝူင်ႈမႃးၼႆႉ ၼႂ်းဝဵင်းလႃႈသဵဝ်ႈ ၵႆႉလႆႈငိၼ်းသဵင်မၢၵ်ႇတႅၵ်ႇ၊ ဢမ်ႇႁူႉဝႃႈ ၽႂ်ႁၢင်ႈတေႃႇၽႂ် တၢင်းလႂ်။   

ဢၼ် မၢၵ်ႇၵႆႉတႅၵ်ႇ ၼႂ်းဝဵင်းလႃႈသဵဝ်ႈ ၸိူင်ႉၼင်ႇၼႆ ၵူၼ်းမိူင်းတႄႉဝႃႈ လႅပ်ႈပဵၼ်ႁွႆး/ ၼမ်ႉမိုဝ်း ၸုမ်းၶွင်ႇသီႇသိုၵ်းမၢၼ်ႈ ယိုတ်းမိူင်း တင်ႈၸႂ်ပွႆႇ  ႁဵတ်းႁႂ်ႈၵူၼ်းမိူင်း တူၵ်းၸႂ်ၵူဝ်ၵူၺ်း ဝႃႈၼႆ။