ဝၢၼ်ႈထႆးဢၼ်တိတ်းၸပ်းလႅၼ်လိၼ်တႆး တေႃႇၼႃႈလွႆၵေႃႇဝၼ်းၼၼ်ႉ မီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼမ်မႃးလႄႈ ၾၢႆႇၵၢင်ႉၵႄႇ ဝၢၼ်ႈၵူၼ်းပၢႆႈၽေးသိုၵ်း တီႈလွႆၵေႃႇဝၼ်း သင်ႇႁၢမ်ႈၵူၼ်းဝၢၼ်ႈၶဝ်ႈဢွၵ်ႇ ၊ ဢမ်ႇပၼ်ၵူၼ်းၼွၵ်ႈၶဝ်ႈဝၢၼ်ႈ ဝႃႈၼႆ။
ဝၼ်းတီႈ 10 တင်း 13 လိူၼ်ဢွၵ်ႊထိူဝ်ႊပိူဝ်ႊ 2021 ၼႆႉ တီႈဢိူင်ႇၽယႃးထႆး ၸႄႈဝဵင်းမႄႈၾႃႉလူင် ၸႄႈတွၼ်ႈၵဵင်းႁၢႆး ဢၼ်ဢိူမ်ႈၸမ် တိတ်းၸပ်းၵၼ်တၢင်း ၼႃႈလိၼ်သိုၵ်းမၢႆ 1 ၵဵင်းတုင် RCSS (လွႆၵေႃႇဝၼ်း) ၼၼ်ႉ လႆႈၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်း ပဵၼ် ၶူဝ်ႊဝိတ်ႉ 19 တင်းမူတ်း 33 ၵေႃႉလႄႈ ဢွင်ႈတီႈပၢင်သဝ်းၵူၼ်းပၢႆႈၽေးသိုၵ်း ဝၢၼ်ႈပဵင်းၾႃႉ လင်ၶႃးႁိူၼ်း 400 ပၢႆ ထုၵ်ႇပိၵ်ႉ ဢိုတ်းႁၢမ်ႈ ၵူၼ်းတၢင်းၼွၵ်ႈ/ ၼႂ်း ၶဝ်ႈဢွၵ်ႇၵႂႃႇမႃး ၸူဝ်ႈၶၢဝ်း တႃႇၵႅတ်ႇၵင်ႈတၢင်းပဵၼ် ၼႆယဝ်ႉ။
လုင်းၵၢင်ႉ ဝၢၼ်ႈၵူၼ်းပၢႆႈၽေး တီႈဝၢၼ်ႈပဵင်းၾႃႉ/ လွႆၵေႃႇဝၼ်း လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈပၢင်သဝ်း ၵူၼ်းပၢႆႈၽေးႁဝ်း ၶႃႈၼႆႉ လႆႈမၵ်းမၼ်ႈ တႅပ်းတတ်းပုတ်းၶၢတ်ႇဝႆႉ ၵၢၼ်ၶဝ်ႈဢွၵ်ႇ ပၢင်သဝ်း ဝႆႉ ၵမ်ႉၼိုင်ႈၶႃႈ။ တၢင်းၾင်ႇထႆး ဢိူင်ႇၽယႃးထႆးၼၼ်ႉမီး ၵူၼ်းတိတ်းၸပ်း ၸိူဝ်ႉမႅင်းလႄႈ ၵူဝ်တၢင်းပဵၼ် ၼႆႉ ၽႄႈလၢမ်း ၶဝ်ႈမႃးထိုင်ၾၢႆႇႁဝ်းၶႃႈဢေႃႈ”- ဝႃႈၼႆ။
ဢွင်ႈတီႈပၢင်သဝ်း ၵူၼ်းပၢႆႈၽေးသိုၵ်း တီႈလွႆၵေႃႇဝၼ်းၼႆႉ တင်းမူတ်း မီးႁူဝ်ၵူၼ်း 2,600 ပၢႆ လင်ၶႃးႁိူၼ်းသမ်ႉ မီး 400 ပၢႆ ။
ၵူၼ်းတိတ်းၸပ်းတၢင်းပဵၼ်ၾင်ႇထႆး ၼႂ်းဢိူင်ႇၽယႃးထႆးၼၼ်ႉ မိူဝ်ႈဝၼ်းတီႈ 10/10/2021 ၵူတ်ႇထတ်း ၵူၼ်းပဵၼ် 3 ၵေႃႉ။ ထိုင်မႃး ဝၼ်းတီႈ 13 ၼႆႉ လႆႈၵူတ်ႇထတ်းႁၼ် ထႅင်ႈ 30 ၵေႃႉ။ ၼႂ်းၵူၼ်း 30 ၵေႃႉၼၼ်ႉ ပဵၼ်ၵူၼ်းဝၢၼ်ႈလဝ်ႉၸေႃး/ ဝၢၼ်ႈၶႄႇ 16 ၵေႃႉ၊ ၵူၼ်းဝၢၼ်ႈ လဝ်းမႃး 8 ၵေႃႉ၊ ၵူၼ်းဝၢၼ်ႈလိထု 6 ၵေႃႉ။ ၼႂ်းၼၼ်ႉ ပႃးလုၵ်ႈႁဵၼ်း ႁူင်းႁဵၼ်းၶႄႇ 13 ၵေႃႉ။ ယၢမ်းလဵဝ် ၵူၼ်း ပဵၼ်ၸိူဝ်းၼၼ်ႉ လႆႈသူင်ႇယူတ်းယႃတူဝ် ဝႆႉတီႈႁူင်းယႃ မႄႈၾႃႉလူင် လုင်းၵၢင်ႉ ပၢင်သဝ်း ၵူၼ်းပၢႆႈၽေးသိုၵ်း ဝၢၼ်ႈပဵင်းၾႃႉလၢတ်ႈ။
