လၢႆးသႂ်တႆး ၽူႈတႅမ်ႈလိၵ်ႈ၊ ၽူႈတႅမ်ႈႁၢင်ႈလူၼ်ႉ ဢွၵ်ႇလိၵ်ႈပိုၼ်ၽၢဝ်ႇသုၼ်ႇတူဝ် တုၵ်းယွၼ်းထိုင် သိုၵ်း ငဝ်ႈငုၼ်းဝၢၼ်ႈႁႆး လႄႈ သိုၵ်း ငဝ်ႈငုၼ်းလွႆတႆးလႅင်း ႁႂ်ႈၵိုတ်းယိုဝ်းၵၼ် ၽွင်းၶၢဝ်းၾိင်ႈထုင်းတႆး ဢွၵ်ႇဝႃႇ ဢွၵ်ႇသႃ လူႇတၢၼ်း လႄႈ ၶၢဝ်းပၢတ်ႇၶဝ်ႈ သႂ်ႇယွင်သႂ်ႇယေး။
ဝၼ်းတီႈ 18/10/2021 ၼႆႉ လၢႆးသႂ်တႆး တႅမ်ႈ ၽိုၼ်လိၵ်ႈတုၵ်းယွၼ်းထိုင်ဝႃႈ – “ၸဝ်ႈႁဝ်းၶဝ် ဝၢၼ်ႈႁႆး၊ ၸဝ်ႈႁဝ်းၶဝ်လွႆတႆးလႅင်း – ၶႅၼ်းတေႃႈဝႆႉၸႂ်ငိုၼ်းၸႂ်ၶမ်းသေ ၵိုတ်းလိုဝ်ႈပၼ် ၵၢၼ်တိုၵ်းတေႃးၵၼ် ႁႂ်ႈပီႈၼွင်ႉ ၵူၼ်းမိူင်း လႆႈပွၵ်ႈႁိူၼ်း ႁဵတ်းၵၢၼ်လူႇ ၵၢၼ်တၢၼ်း ၶၢဝ်းဢွၵ်ႇဝႃႇသေ လႆႈ ပၢတ်ႇၶဝ်ႈ သိမ်းၼႃး သေၵမ်း” – ဝႃႈၼႆ။
လၢႆးသႂ်တႆး လၢတ်ႈတီႈၽူႈတွႆႇႁွၵ်ႈဝႃႈ – “ ယၢမ်းလဵဝ် ဢၼ်ပဵၼ်ယူႇၸိူဝ်းၼႆႉ ၼႆ ၵူၼ်းသိုၵ်းဢွၼ်ႇၶဝ်ၵေႃႈယၢပ်ႇ၊ ၾၢႆႇလႂ်တၢႆၵႂႃႇၵေႃႈဢမ်ႇလီ။ ဢၼ်ယၢပ်ႇ ၸွမ်းၼႆႉ ပဵၼ်ၵူၼ်းမိူင်း၊ လႆႈပၢႆႈယူႇတီႈၼိုင်ႈ ယဝ်ႉတီႈၼိုင်ႈ။ တေႃႈလဵဝ် ပဵၼ်ၶၢဝ်း ဢွၵ်ႇဝႃႇ ပေႃးဢမ်ႇယိုဝ်းၵၼ် ၵူၼ်းမိူင်းတေၵျေႃႇၵႃႈႁိုဝ်။ တေႃႈလဵဝ်သမ်ႉပဵၼ်ၶၢဝ်း ပၢတ်ႇၶဝ်ႈသိမ်းၼႃး ႁႂ်ႈၵိုတ်းယိုဝ်းၵၼ်လိူၼ်႞ တေလီယူဝ်ႉ ၼႆ မီးယိူင်းဢၢၼ်း ၸိူင်ႉၼၼ် ၵူၺ်း။တီႈတႄႉမၼ်း ၵႂၢမ်းႁဝ်းၵေႃႈ တေမွၵ်ႈမႃႁဝ်ႇလွႆၵူၺ်း ႁိုဝ် ၼႆသေတႃႉ တႃႇႁႂ်ႈၸဝ်ႈႁဝ်းၶဝ် တင်းသွင်ၾၢႆႇ ပေႃးလႆႈႁူႉငိၼ်းၵေႃႈပေႃးယဝ်ႉ” – ဝႃႈၼႆ။
တႄႇႁူဝ်ပီ 2021 ၼႆႉ မႃး သိုၵ်း RCSS/SSA ငဝ်ႈငုၼ်းလွႆတႆးလႅင်း၊ သိုၵ်း SSPP/SSA ငဝ်ႈငုၼ်းဝၢၼ်ႈႁႆး တိုၵ်း တေႃးၵၼ်၊ ႁဵတ်းႁႂ်ႈၵူၼ်းမိူင်း ၼႂ်းၸႄႈဝဵင်းသီႇပေႃႉ၊ ၵျွၵ်ႉမႄး၊ ၵေးသီး၊ မိူင်းၵိုင် ၸိူဝ်းၼႆႉ လႆႈပၢႆႈယၢၼ်ႁိူၼ်း ယေးတီႈယူႇ ၼပ်ႉႁူဝ်ႁဵင်၊ ၵူၼ်းသိုၵ်းၵေႃႈ မီးလွင်ႈလူႉတၢႆ တင်းသွင်ၾၢႆႇ၊ ယၢမ်းလဵဝ် သမ်ႉပဵၼ်ၶၢဝ်းလူႇၶၢဝ်း တၢၼ်း ဢွၵ်ႇဝႃႇ ဢွၵ်ႇသႃ ၊ ပဵၼ်ၶၢဝ်း ပၢတ်ႇၶဝ်ႈ သႂ်ႇယွင်သႂ်ႇယေး။
လၢႆးသႂ်တႆး ၼႆႉ ပဵၼ်ၽူႈႁၵ်ႉလိၵ်ႈလၢႆးတႆး၊ ႁၵ်ႉၾိင်ႈ ငႄႈ ၾိင်ႈထုင်းတႆး တႅမ်ႈၵႃႇတုၼ်ႊ ႁၢင်ႈလူၼ်ႉ ႁုၼ်ႉ ၼူဝ် မူၼ်ႈၸႂ် ပီႈၼွင်ႉတႆး၊ ႁဵတ်းပပ်ႉလိၵ်ႈ ပပ်ႉလၢႆး ၵႃႇတုၼ်းဢွၵ်ႇပၼ် ႁႂ်ႈလုၵ်ႈဢွၼ်ႇတႆး လႆႈဢၢၼ်ႇလႆႈႁဵၼ်း မႃး မီးတၢင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ