ၵူၼ်းၼုမ်ႇ ဝဵင်းတူၼ်ႈတီး ႁႃႈငိုၼ်းၸွႆႈ ၵူၼ်းပၢႆႈၽေး ထုၵ်ႇၼႄးၸွႆႈ PDF သေ ၺႃးတီႉ

135

ၵူၼ်းၼုမ်ႇ ၸိူဝ်းတူင်ႉၼိုင် ၼႂ်းဝဵင်းတူၼ်ႈတီး ႁႃငိုၼ်းၵွင်ၵၢင် ၸွႆႈထႅမ် ၵူၼ်းပၢႆႈၽေးသိုၵ်း ၼၼ်ႉ ထုၵ်ႇၼႄးဝႃႈ ႁႃငိုၼ်းၸွႆႈ ၸုမ်းၵႅတ်ႇၶႄၵူၼ်းမိူင်း PDF ၼႆသေ ၺႃး ၸုမ်းသိုၵ်းမၢၼ်ႈယိုတ်းဢႃႇၼႃႇ တီႉၺွပ်းယဵတ်ႈၶွတ်ႈ။

Photo Credit to Taunggyi Youth-သိုၵ်းမၢၼ်ႈဢဝ်ႁႅင်းသိုၵ်းၶဝ်ႈ တဝ်ၼ်ႂး ဝဵင်းတူၼ်ႈတီး မိူဝ်ႈၼႆႉ 9/3/2021

မိူဝ်ႈပူၼ်ႉမႃး ဝၼ်းတီႈ 9/10/2021 ယၢမ်းၵၢင်ၶိုၼ်း မွၵ်ႈ 10 မူင်းၶိုင်ႈ ၵူၼ်းၼုမ်ႇ ၸိုဝ်ႈႁွင်ႉ မွင်ႇမိၼ်းၶၢၼ်ႉဢွင်ႇ ထုၵ်ႇသိုၵ်းမၢၼ်ႈ တင်း ပလိၵ်ႈမၢၼ်ႈ ၶဝ်ႈတီႉၺွပ်းမၼ်းၸၢႆး ၼႂ်းႁိူၼ်း ဢၼ်မီးၾၢႆႇၼႃႈႁူင်းႁႅမ်း Cherry Queen Hotel ပွၵ်ႉၺွင်ႇၽိဝ်ႇသၶၢၼ်း/ ညောင်ဖြူစခန်း   ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။

ပီႈၼွင်ႉၸမ်ၸႂ် မွင်ႇမိၼ်းၶၢၼ်ႉဢွင်ႇ လၢတ်ႈၼႄၽူႈတွႆႇႁွၵ်ႈဝႃႈ – “ပဵၼ်ၽူႈၸွပ်ႇ (ဒလန်) ပၼ်ၶၢဝ်ႇႁႃႉဢမ်ႇႁူႉ။ ဢမ်ႇၼၼ် ၵူၼ်းတီႈ KBZ ၼၼ်ႉ ပၼ်ၶေႃႈမုလ်းႁႃႉဢမ်ႇႁူႉ။ သိုၵ်း/ပလိၵ်ႈမၢၼ်ႈ တင်းၼမ် ၶဝ်ႈမႃးတီႉၺွပ်း မၼ်းၸၢႆး ထိုင်ၼႂ်းႁိူၼ်းယၢမ်းၵၢင်ၶိုၼ်း၊ ယဝ်ႉၵေႃႈ ငိုၼ်း သုၼ်ႇတူဝ် မၼ်းၸၢႆး ဢၼ်မီးဝႆႉၸိူဝ်းၼၼ်ႉၵေႃႈ ဢဝ်ၵႂႃႇမူတ်း။ ပေႃႉထုပ်ႉမၼ်း ၸၢႆးသေ တီႉၺွပ်းၵႂႃႇပႃး”- ဝႃႈၼႆ။

ၵူၼ်းၼုမ်ႇ မွင်ႇမိၼ်းၶၢၼ်ႉဢွင်ႇၼႆႉ မိူဝ်ႈပူၼ်ႉမႃးပႆႇႁိုင် မၼ်းၸၢႆး တၢင်ႇဝႆႉၼႂ်းၾဵတ်ႉပုၵ်ႉသုၼ်ႇတူဝ်မၼ်း တုင်းႁပ်ႉလွင်ႈလူႇၶၢမ်ႇတႃႇၵူၼ်းပၢႆႈ ၽေးသိုၵ်း၊ ယဝ်ႉၵေႃႈ ၵွၼ်ႇမၼ်းၸၢႆးပႆႇထုၵ်ႇတီႉၼၼ်ႉ ဢၵွင်ႉ Kpay မၼ်းၸၢႆး ထုၵ်ႇပိၵ်ႉဢိုတ်းပႅတ်ႈသေ ထိုင်မႃး ဝၼ်းတီႈ 9 ၵေႃႈ ထုၵ်ႇသိုၵ်း ပလိၵ်ႈမၢၼ်ႈ တီႉၺွပ်းၵုမ်းၶင်တူဝ်မၼ်း ၸၢႆးၵႂႃႇ ၼႆယဝ်ႉ။

မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 3/10/2021 ပူၼ်ႉမႃးၼႆႉၵေႃႈ လုၵ်ႈႁဵၼ်းၸၼ်ႉၸွမ် ၾၢႆႇယႃႈယႃ (တောင်ကြီး ဆေးတက္ကသိုလ်) ထုၵ်ႇ သိုၵ်းမၢၼ်ႈ ယိုတ်းမိူင်း မၢပ်ႇၼႄးဝႃႈ မၼ်းၼၢင်း လူႇၶၢမ်ႇတႃႇၸွႆႈထႅမ် ၸုမ်းၵႅတ်ႇၶႄၵူၼ်းမိူင်း PDF လႄႈ ၵူၼ်းပၢႆႈၽေးသိုၵ်း ၼႆသေ ၺႃးသိုၵ်းမၢၼ်ႈတီႉၵႂႃႇ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ