ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 8 လိူၼ်ပၢႆ ၵူၼ်းမိူင်းႁႃၵိၼ် လဵင်ႉတွင်ႉ ယၢပ်ႇၽိုတ်ႇ ၵိၼ်းၸႂ် လိူဝ်ႁႅင်း ၼႂ်းၸႄႈဝဵင်းၼမ်ႉတူႈ ၽူႈလၵ်ႉၵူၼ်းၸူၼ်လိူင်ႇ။
ၼႂ်းၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ ၶူဝ်းၵုၼ်ႇၶိုၼ်ႈ၊ ၵၢၼ်ငၢၼ်း ဢမ်ႇပေႃးမီး၊ ယႃႈမဝ်းၵမ်ၵေႃႈ လိူင်ႇၼမ် ၼွၵ်ႈလိူဝ်ၼၼ်ႉ တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းထႅင်ႈလႄႈ ႁဵတ်းႁႂ်ႈ ၵူၼ်းပိုၼ်ႉတီႈ ဢွၼ်ၵၼ် ထူပ်းတၢင်းယၢပ်ႇၽိုတ်ႇၵၼ်ႁၢဝ်ႈႁႅင်း ၼႆယဝ်ႉ။
ၵူၼ်း ၼမ်ႉတူႈ လၢတ်ႈၼႄၽူႈတွႆႇႁွၵ်ႈဝႃႈ -“လွင်ႈယႂ်ႇတႄႉ ပဵၼ်ၵၢၼ်ႁႃၵိၼ်လဵင်ႉတွင်ႉၼၼ်ႉၶႃႈဢေႃႈ ယဝ်ႉၵေႃႈ တၢင်းပဵၼ်ၶူဝ်ႊဝိတ်ႉ 19 သေ ၶူဝ်းၵုၼ်ႇၸိူဝ်းၼႆႉ ပုင်ႈၶိုၼ်ႈႁႅင်းၼႃႇ ၵၢၼ်ႁႃၵိၼ်လဵင်ႉတွင်ႉၼႆႉ ယၢပ်ႇၽိုတ်ႇႁႅင်း။ ထိုင်တီႈၵူၼ်းၼုမ်ႇ ၼႂ်းပိုၼ်ႉတီႈ ပေႃးလႆႈလၵ်ႉၸူၼ် ၸိူဝ်းၼႆႉၵေႃႈမီးၼမ်မႃး။ ဢႃယုၶဝ် တေမီး မွၵ်ႈ 20 ၵႃႈၼႆႉၵူၺ်း”- ဝႃႈၼႆ။
ၸႄႈဝဵင်းၼမ်ႉတူႈ ၼႂ်းပီၼႆႉၵူၺ်း ၵူၼ်းၼုမ်ႇ ၸူၼ်ရူတ်ႉၶိူင်ႈလႄႈ ႁၢၼ်ႉၾူၼ်း ၼႂ်းဝဵင်းၼႆႉ တေမီး 3 ပွၵ်ႈယဝ်ႉ ဝႃႈၼႆ။
“မိူဝ်ႈဝၼ်းတီႈ 7 ပူၼ်ႉမႃးၼႆႉ တီႉလႆႈၵူၼ်းၼုမ်ႇ ဢၼ်ၶဝ်ႈၸူၼ်ႁၢၼ်ႉ ၾူၼ်း 5 ၵေႃႉ။ ပႃးလုၵ်ႈဢွၼ်ႇ ဢမ်ႇမီး ပေႃႈမႄႈၵေႃႉၼိုင်ႈ။ ယဝ်ႉၵေႃႈ ၵူၼ်းပွၵ်ႉ 5 ၵေႃႉၼိုင်ႈ ဢႃယု 27 ပီ ။ ၼၼ်ႉၵေႃႈ တိတ်းၸပ်းယႃႈမဝ်းၵမ် ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
ၵူၼ်းၼုမ်ႇ 5 ၵေႃႉၼၼ်ႉ ၵမ်ႈၼမ် ဢႃယု တေမီးမွၵ်ႈ 16 ထိုင် 18 ၵူၺ်း။ ၸိူဝ်းၶဝ်လၢတ်ႈဝႃႈ ၵႆႉၸူၼ်ရူတ်ႉၶိူင်ႈ လႄႈ ႁၢၼ်ႉၶၢႆၾူၼ်း ၼႂ်းဝဵင်း ဝႃႈၼႆ။
ၼွၵ်ႈလိူဝ်ၼၼ်ႉ ၼႂ်းၸႄႈဝဵင်းၼမ်ႉတူႈၵေႃႈ တေႃႇထိုင် ဝၼ်းတီႈ 10/10/2021 ၼႆႉ ၵူၼ်းတိတ်းၸပ်း ၶူဝ်ႊဝိတ်ႉ 19 မီး 657 ၵေႃႉ၊ လူႉတၢႆ 18 ၵေႃႉ၊ ယႃၶႅၼ်း 576 ၵေႃႉလႄႈ တိုၵ်ႉယူတ်းယႃ 63 ၵေႃႉ ၼႆယဝ်ႉ။