သဵၼ်ႈတၢင်း ရူတ်ႉၾႆးမႂ်ႇ ဢၼ်လုၵ်ႈလႅၼ်လိၼ်တႆးၶေႇ ဢၼ်တေႃႇၼႃႈ ဝဵင်းၼမ်ႉၽႃႈ (ၶျိၼ်ႊသူၺ်ႊႁေႃႇ) သေလႅၼ်ႈထိုင်ဝဵင်းလၢင်ႊၶျၢၼ်ႊ ၼႂ်းၸႄႈဝဵင်းယုၼ်ႊၼၼ်ႊမိူင်းၶႄႇၼၼ်ႉ ၶႄႇတႄႇပိုတ်ႇလႅၼ်ႈ တေႃႉၶူဝ်းၵႂႃႇမႃး။

သဵၼ်ႈတၢင်းရူတ်ႉၾႆးၼႆႉ ပႃးၼႂ်းၶူင်းၵၢၼ် သဵၼ်ႈတၢင်းႁွပ်ႈလူၵ်ႈ BRI ၶွင်ၶႄႇ။ တႄႇပိုတ်ႇလႅၼ်ႈတူၺ်းမိူဝ်ႈဝၼ်းတီႈ 25/8/2021 ။  တေဢၢၼ်းတေႃႉၶူဝ်းၵုၼ်ႇ ဢၼ်ၶႄႇသင်သိုဝ်ႉတီႈတၢင်ႇမိူင်းသေ သူင်ႇမႃးသိူၵ်ႈတီႈပၢၵ်ႇၼမ်ႉတႃႈႁိူဝ်းဝဵင်းလူင်တႃႈၵုင်ႈ၊ လုၵ်ႉတႃႈၵုင်ႈသေ တၢင်ႇရူတ်ႉၵႃးၶိုၼ်ႈထိုင်ဝဵင်းၼမ်ႉၽႃႈ ၊ ၸင်ႇဢဝ်ၶၢမ်ႈလႅၼ်လိၼ်လႄႇ မႃးတၢင်ႇရူတ်ႉၾႆးၼႆႉသေ တေသူင်ႇၸႅၵ်ႇၸၢႆႇပၼ်ၵူၼ်းမိူင်းယုၼ်ႊၼၼ်ႊ လႄႈတၢင်ႇၸႄႈဝဵင်း ပတ်းပိုၼ်ႉမိူင်းၶႄႇ။  

ဝဵင်းလူင်လၢင်ႊၶျၢၼ်ႊ ၸႄႈမိူင်းယုၼ်ႊၼၼ်ႊ မိူင်းၶႄႇၼႆႉ မီးတေႃႇၼႃႈၵၼ်တင်း မိူင်းတိင် လႅၼ်လိၼ် တႆးၶႄႇ- ဝဵင်းၼမ်ႉၽႃႈ။ ဢၼ်တေၸတ်းၵၢၼ်လွင်ႈသိူဝ်ႇသဵၼ်ႈတၢင်း BRI ၼႂ်းမိူင်းမၢၼ်ႈ ၊ ဢၼ်တေၵႃႉၶၢႆပၢႆးမၢၵ်ႈမီးၸွမ်းမိူင်းမၢၼ်ႈ ၼႆႉ ယူႇတီႈဝဵင်းလၢင်ႊၶျၢၼ်ႊသေ ႁပ်ႉပုၼ်ႈၽွၼ်းဝႆႉ ၾၢႆႇတၢင်းမိူင်းၶႄႇ ပိုၼ်ၽၢဝ်ႇၶၢဝ်ႇငၢဝ်းဝႆႉၼင်ႇၼႆ။

မိူင်းၶႄႇၼႆႉ ပူၼ်ႉမႃးလိူၼ်ပၢႆၼၼ်ႉၵေႃႈ ပိုၼ်ၽၢဝ်ႇဝႃႈတေပိုတ်ႇလၢၼ်ႇလႅၼ်လိၼ်မႂ်ႇထႅင်ႈဢၼ်ၼိုင်ႈ ဢၼ်မီးၼႂ်းၸႄႈဝဵင်းလၢဝ်ႇၵၢႆး တီႈမၢႆလၢၵ်း 124-125 ၼၼ်ႉ ဝႃႈၼႆလႄႈ ၸွမ်ၸိၵ်းသိုၵ်းမၢၼ်ႈ မဢလ ယင်းၸူဝ်းဢဝ်ၸွမ်ၽွင်းလူင်ၸိုင်ႈတႆး ဢၼ်မၼ်းလိူၵ်ႈတၢင်ႇဝႆႉၼၼ်ႉသေၵႂႃႇဢႅဝ်ႇယဵမ်ႈထိုင်တီႈ လူးၵွၼ်ႇ။

လိုၼ်းသုတ်းၼႆႉ ၶႄႇပိုၼ်ၽၢဝ်ႇဝႆႉဝႃႈ ဝၼ်းတီႈ 28/9/2021 ပူၼ်ႉမႃးၼႆႉၵေႃႈ ၶႄႇ တႄႇလႅၼ်ႈ ရူတ်ႉၾႆးတၢင်ႇၵုၼ်ႇတၢင်ႇၶူဝ်းလုၵ်ႉဝဵင်း သျႅၼ်ႉႁၢႆ ၵႂႃႇမိူင်းႁၢမ်ႊပၢၵ်ႉ – ၵျိူဝ်ႊမၼီႊ ။ ပဵၼ်ရူတ်ႉၾႆးသၢႆႁႅၵ်ႈ ဢၼ်လႅၼ်ႈ မိူင်းၶႄႇလႄႈ ယူႊရူပ်ႊ ဝႃႈၼႆ။ (ၶေႃႈမုၼ်းဢိင်ဢဝ်တီႈ သျိၼ်ႊႁႂႃႊ)