ၶွင်ႇသီႇသိုၵ်းမၢၼ်ႈ  တီႉၺွပ်း ၽူႈႁွင်ႉၽဵင်းၵႂၢမ်းတႆးလႅင်ၵႂႃႇၵေႃႉၼိုင်ႈ ယူႇတီႈပေႃႈမႄႈပီႈၼွင်ႉၸိူဝ်ႉၶိူဝ်း ၵပ်ႇသိုပ်ႇတိတ်းတေႃႇဢမ်ႇ လႆႈ ပဵၼ်လွင်ႈမႆႈၸႂ်  ဝႃႈၼႆ။

မိူဝ်ႈဝၼ်းတီႈ 1/10/2021 ပူၼ်ႉမႃးၼႆႉ ၸၢႆးဝေႇယၢၼ်ႇဢွင်ႇ ၽူႈႁွင်ႉၵႂၢမ်းၽဵင်းတႆးလႅင် ထုၵ်ႇၶွင်ႇသီႇသိုၵ်းမၢၼ်ႈ ယိုတ်းမိူင်း ၶဝ်ႈတီႉၺွပ်း မၼ်းၸၢႆးလႄႈ တင်းဢူၺ်းၵေႃႉမၼ်းၸၢႆးထႅင်ႈ 2 ၵေႃႉ ၼႂ်းဝဵင်းႁူမ်ႈမၢၵ်ႇလၢင်း တိူင်းၸႄႈၵႅင်း။ ၶွင်ႇသီႇသိုၵ်းမၢၼ်ႈ ၼႄလွင်ႈတၢင်းဝႃႈ ယွၼ်ႉ မၼ်းၸၢႆး တႅမ်ႈတၢင်းႁၼ်ထိုင် တၢင်ႇၼိူဝ်ၽဵတ်ႉပုၵ်ႉ သုၼ်ႇတူဝ် လွင်ႈၽွင်းလူင်ၾၢႆႇၸၢဝ်းၶိူဝ်း ၼႂ်းတိူင်းၸေႊၵႅင်း ႁူမ်ႈတင်း ၸၵၶ သိုၵ်းမၼ်ႈ ဝႃႈၼႆ။

လုင်းၸၢႆးလူင် ၵူၼ်းၸမ်ၸႂ် ၸၢႆးဝေႇယၢၼ်ႇဢွင်ႇ  လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်းၶဝ်မႃး ၺွပ်းမၼ်းၸၢႆးၼၼ်ႉ ၸဵမ်ပလိၵ်ႈ သိုၵ်း ၸႂ်ႉဢဵၼ်ႁႅင်းတင်းၼမ် ၶဝ်ႈတီႉၺွပ်း။ ၵဵဝ်ႇလူၺ်ႈ မၼ်းၸၢႆးတႅမ်ႈတၢင်ႇတင်းႁၼ်ထိုင် လွင်ႈၽွင်းလူင်ၾၢႆႇၸဝ်ႈၶိူဝ်း တိူင်းၸႄႈၵႅင်းႁူမ်ႈၵၼ် တင်းၸၵၶ သိုၵ်းမၢၼ်ႈ ၼၼ်ႉ  ။ ယၢမ်းလဵဝ် မၼ်းၸၢႆးၼႆႉ လႆႈငိၼ်းဝႃႈ ထုၵ်ႇတီႉၺွပ်းဝႆႉတီႈၼႂ်းတပ်ႉသိုၵ်းမၢၼ်ႈ ဝဵင်းႁူမ်းမၢၵ်ႇလၢင်းၼႆႉဝႆႉ”- ဝႃႈၼႆ။

ၸၢႆးဝေႇယၢၼ်ႇဢွင်ႇ ၼႆႉ ပဵၼ်ၽူႈႁွင်ႉၽဵင်းၵႂၢမ်းတႆးလႅင်ၵေႃႉၼိုင်ႈ မိူဝ်ႈၽွင်းမၼ်းၸၢႆးထုၵ်ႇတီႉၼၼ်ႉ ပဵၼ်သိုၵ်းမၢၼ်ႈ တပ်ႉၵွင် တႂ်ႈတိူင်းသိုၵ်း ၸဵင်ႇႁွင်ႇဝၼ်းတူၵ်း ဢၼ်ပၵ်းဝႆႉတီႈဝဵင်းႁူမ်ႈမၢၵ်ႇလၢင်းၼၼ်ႉ မႃးတီႉၺွပ်းၵႂႃႇ ဢိင်ၼိူဝ် လွင်ႈၼႆႉ ယူႇတီႈပေႃႈမႄႈၸိူဝ်ႉၶိူဝ်းပီႈၼွင်ႉ မၼ်းၸၢႆး ၶတ်းၸႂ် ၵပ်းသိုပ်ႇႁႃ ယွၼ်းႁူပ်ႉထူပ်းၵေႃႈ ဢမ်ႇလႆႈ ပဵၼ်ဢၼ်မႆႈၸႂ်ၵၼ် ဝႃႈၼႆ။

“တင်ႈတႄႇမၼ်းၸၢႆး ထုၵ်ႇတီႉၵႂႃႇယဝ်ႉၼၼ်ႉ ၵပ်းသိုပ်ႇၵေႃႈဢမ်ႇလႆႈ ယွၼ်းထူပ်းၵေႃႈ ဢမ်ႇလႆႈ။ မၼ်းၸၢႆးယူႇလီယူႇႁႃႉ ယူႇၵိၼ်ၸိူင်ႉႁိုဝ် ၼႆ ၸိူဝ်းၼႆႉ။ ၵူၺ်းၵႃႈ ဢၼ်လီမႆႈၸႂ်တႄႉ ၵူဝ်ၶဝ် ထၢင်ႇထိူမ်ပဵၼ်ၵူၼ်းပွႆႇၶၢဝ်ႇတႆးလႅင် ဢၼ်မီးၼႂ်းဝဵင်းႁူမ်ႈမၢၵ်ႇလၢင်းၼႆႉသေ ၺႃးၸၢၵ်ႇၸွမ်း ၼၼ်ႉၵူၺ်း။ မၼ်းၸၢႆးၼႆႉ ပဵၼ်ၽူႈႁွင်ႉၵႂၢမ်းၵေႃႉၼိုင်ႈ ယဝ်ႉၵေႃႈ ပဵၼ်ၽူႈတူင်ႉၼိုင် ၼႂ်းတူင်ႇဝူင်းၵေႃႉၼိုင်ႈ ၵေႃႈၸႂ်ႈ”- လုင်းၸၢႆးလူင် သိုပ်ႇ လၢတ်ႈၼႄၼင်ႇၼႆ။

ၼွၵ်ႈလိူဝ်ၼၼ်ႉ မိူဝ်ႈပၢင်လိူၵ်ႈတင်ႈ ပီ 2020 ၼၼ်ႉၵေႃႈ မၼ်းၸၢႆးၼႆႉ ပဵၼ်ၽူႈတူင်ႉၼိုင်ၸွႆႈထႅမ် ၼႂ်းပႃႇတီႇတႆးလႅင် ၵေႃႉၼိုင်ႈ ၊ ပဵၼ်ၽူႈတူင်ႉၼိုင်ၼႂ်းတူင်ႇဝူင်းၵေႃႈၸႂ်ႈ ၼႆယဝ်ႉ။