သိုၵ်းမၢၼ်ႈပႂ်ႉၵဵတ်ႉ/လၢၼ်ႇ တီႈၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်းၵူၼ်းၵႂႃႇမႃးၸွမ်းတႃႈၸွမ်းတၢင်း၊ ပေႃးပဵၼ်ၼၢင်းယိင်းဢွၼ်ႇ လတ်းၵႂႃႇမႃး တွင်ႈထၢမ်ဢုပ်ႇလၢတ်ႈတေႃႇႁိုင် ယွၵ်ႇလၢတ်ႈပူၼ်ႉပႅၼ်သုၼ်ႇလႆႈ တေႃႇၼႃႈတေႃႇတႃ ႁဵတ်းႁႂ်ႈၵူၼ်းမိူင်းၵႂႃႇမႃးသုၵ်ႉၸႂ်။

ဝၼ်းတီႈ 3/10/2021 သိုၵ်းမၢၼ်ႈပႂ်ႉၵဵတ်ႉ/လၢၼ်ႇတီႈ ႁူၺ်ႈလိၼ်လမ် ၼႂ်းၵႄႈ တႃႈၶီႈလဵၵ်း-မိူင်းၽူင်း ၼၼ်ႉ ယွၵ်ႇလဵၼ်ႈၵဝ်းလၢတ်ႈ ၼၢင်းယိင်း ၵူၼ်းၼုမ်ႇ ပူၼ်ႉပႅၼ်လိူဝ်ႁႅင်း ၊ တုမ်ႉတိူဝ်ႉပႃးသလေႇၼၢင်းယိင်း။

ၼၢင်းယိင်းၵေႃႉထုၵ်ႇၺႃးသိုၵ်းမၢၼ်ႈလၢတ်ႈယွၵ်ႇပူၼ်ႈပႅၼ်သူပ်းၵႂၢမ်း ၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ-“ ၶႃႈၵႂႃႇသူင်ႇ လၢၼ်ၶႃႈၵႂႃႇႁူင်းယႃသေပွၵ်ႈၶိုၼ်းႁိူၼ်း။ ၵမ်းၼႆႉသိုၵ်းမၢၼ်ႈတီႈလၢၼ်ႇၼၼ်ႉႁႄႉထၢမ်သေ ၶႃႈၵေႃႈလၢတ်ႈၼေလွင်ႈတၢင်းမၼ်း။ ဢၼ်ယူႇၼႂ်းၵဵတ်ႉၼၼ်ႉႁွင်ႉလၢတ်ႈလူင်မႃးဝႃႈ – ဢေႃႈ – ပႃးလၢၼ်ၸၢႆးမႃးၸွမ်းႁႃႉ။ ပေႃးမႃးၵေႃႉလဵဝ်ၵူၺ်းတႄႉ တေႁွင်ႉယူႇဝႆႉတီႈၵဵတ်ႉၼႆႉႁေ ၼႆၵႂႃႈ- ၼႆဝႃႇ ”ဝႃႈၼႆ။

  သိုၵ်းမၢၼ်ႈၸိူဝ်းၼႆႉ ဢမ်ႇသႂၢင်းၵိၼ် ဢမ်ႇဝႆႉၼၵ်း သုၼ်ႇလႆႈၵူၼ်း ၊  ၶႂ်ႈႁဵတ်းသင် ၶႂ်ႈလၢတ်ႈသင်ၵေႃႈဢမ်ႇၵုမ်းထိင်းပၢၵ်ႇ ထိင်းၸႂ် ၊ ဢဝ်လၢႆးၸၼ်ႉတႅမ်ႇသေ လၢတ်ႈၸႃတေႃႇၵူၼ်းမိူင်း ငဝ်းလၢႆးၶိုၼ်းမိူၼ်မိူဝ်ႈၵွၼ်ႇၼႃႈပီ 2010 ၶိုၼ်းယဝ်ႉ ၵူၼ်းတႃႉၶီႈလဵၵ်းလၢတ်ႈၼင်ႇၼႆ။

ၼၢင်းယိင်း ၵေႃႉဢၼ်သွၼ်လိၵ်ႈပၼ်လုၵ်ႈဢွၼ်ႇ ၼႂ်းဝဵင်းတႃႈၶီႈလဵၵ်းၵေႃႉၼိုင်ႈၵေႃႈလၢတ်ႈဝႃႈ – “တေဝႃႈႁိုဝ်ၵေႃႈ မဵဝ်းဢမ်ႇႁူႉလိၵ်ႈလႄႈဢမ်ႇမေႃလဵပ်ႈႁဵၼ်းဝႃႈမိူင်းပိူၼ်ႈၶိုၼ်ႈယႂ်ႇမႂ်ႇသုင်ၼၼ်ႉ ပိူၼ်ႈဝႆႉၼၵ်းသုၼ်ႇလႆႈၵူၼ်း။ ပိူၼ်ႈဢမ်ႇလႃႈလီႈလၢတ်ႈၸႃပူၼ်ႉပႅၼ်သူပ်းၵႂၢမ်းၸိူင်ႉၶဝ်။ ၶဝ်ၼႆႉမၼ်းတိုၼ်းယူႇၵိၼ်လၢတ်ႈၸႃၸၼ်ႉတႅမ်ႇမႃးၸိူင်ႉၼႆ ၸဵမ်လႂ်၊ တေႃႇထိုင်ယၢမ်းလဵဝ်ၵေႃႈယင်းတိုၵ်ႉပႆႇလႅၵ်ႈလၢႆႈၾိင်ႈယၢမ်ႈၸၼ်ႉတႅမ်ႇလူင်ၶဝ်ၼၼ်ႉ။ မိူဝ်ႈပၢၼ်လူင်ပွင်ၸိုင်ႈၵူၼ်းမိူင်းၼၼ်ႉတႄႉ ယင်းၶႅၼ်း၊ ပေႃးပဵၼ်ၸွမ်းၵဵတ်ႉ ၼႂ်းဝဵင်းၼႆ ၶဝ်ဢမ်ႇႁတ်းလၢတ်ႈတေႃႇၵူၼ်းမိူင်းသဵင်လင်သေဢိတ်း ၶဝ်ၵူဝ်မၢႆမီႈ။ ယၢမ်းလဵဝ်တႄႉ ၶဝ်ယူႇၼိူဝ်မၢႆမီႈယဝ်ႉလူး။ ၶဝ်ဢမ်ႇၵူဝ်ၵိၼ်ၽႂ်၊ ဢမ်ႇမီးတၢင်းဢၢႆ တေႃႇၽႂ်ယဝ်ႉဝႃႈ ”- ဝႃႈၼႆ။

မိူဝ်ႈဝၼ်းတီႈ 2/10/2021 ၼၼ်ႉၵေႃႈမိူၼ်ၼၼ်၊ သိုၵ်းမၢၼ်ႈဢၼ်ပႂ်ႉၵူတ်ႇထတ်းထဵတ်ႈထၢမ်ၵူၼ်းၵႂႃႇမႃးတီႈႁိမ်းတၢင်းၶွႆႈ ႁူင်းၵိၼ်ၵျေႃႇ “ၵျီးမျၢတ်ႉတေႃးသူၺ်ႇမျိၼ်း(ၵလၢပ်ႉ) ”လႄႈၵၢတ်ႇသူၺ်ႇမျေႇတႃႇယႃႇ ဢၼ်မီးတီႈသဵၼ်ႈတၢင်းၵႂႃႇပုင်ႇလူဝ်ႉၼၼ်ႉ  လၢတ်ႈၸႃပူၼ်ႉပႅၼ်သလေႇၼၢင်းယိင်းၵေႃႉၼိုင်ႈ ဢၼ်ၵႂႃႇသိုဝ်ႉယႃႈယႃမႃး။

ၼၢင်းယိင်းၼၼ်ႉၵေႃႈလၢတ်ႈတီႈၽူႈတွႆႇႁွၵ်ႈဝႃႈ –“ၽိူဝ်ႇၶဝ်ထၢမ်ယဝ်ႉ ၶႃႈၵေႃႈတွပ်ႇယဝ်ႉသေဢၢၼ်းတေဢွၵ်ႇမႃး – သိုၵ်းမၢၼ်ႈၵေႃႉၼိုင်ႈ ပႆမႃးတီႈရူတ်ႉၶိူင်ႈၶႃႈသေထၢမ်ဝႃႈ – ၼွင်ႉယိင်းတေၵႂႃႇလႂ်၊ တေလႆႈၸွမ်းသူင်ႇၼႄႇ ၼႆ။ ထႅင်ႈၵေႃႉၼိုင်ႈ  ႁွင်ႉသႅၼ်ႇလူင်မႃးဝႃႈ – မႂ်းဢမ်ႇလူဝ်ႇထၢမ်မၼ်း၊ မႂ်းၶိုၼ်ႈၶီႇၼိူဝ်ရူတ်ႉၶိူင်ႈမၼ်းၼၼ်ႉၵမ်းလဵဝ်လႃႈ – ဆိုင်ကယ်ပေါ်တခါတည်းတက်ခွလိုက်  – ၼႆဝႃႇ လိူင်းဝႃႈလိူင်း”– ဝႃႈၼႆ။

ၸူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၶၢဝ်းတၢင်း 8 လိူၼ်ပၢႆၼႆႉ သိုၵ်း ၊ ပလိၵ်ႈမၢၼ်ႈၸိူဝ်းၼႆႉ ယိပ်းတင်းၵွင်ႈပွတ်းၵွင်ႈယၢဝ်း ပႂ်ႉဝႆႉၸွမ်းၼႂ်းဝဵင်း ၸွမ်းၵိဝ်ႇ ၸွမ်းပွၵ်ႉ မီးလူင်ၵႂႃႇၵူႈတီႈ ။ လိူဝ်ၼၼ်ႉ ၶီႇၵႃးသိုၵ်းသေ ဢႅဝ်ႇတဝ်ၼႂ်းဝဵင်းၵေႃႈမီး။ ၵူၼ်းမိူင်းတႃႈၶီႈလဵၵ်းဝႃႈ  ၶဝ်ဝႃႈၶဝ်ဢဝ်ႁူမ်ႇလူမ်ႈပၼ်ၵူၼ်းမိူင်းၼႆသေတႃႉ  လၢႆးၼႆႉ ႁဵတ်းႁႂ်ႈၵူၼ်းမိူင်း  သုၵ်ႉသၢၵ်ႉၸႂ်လိူဝ်ႁႅင်း ဝႃႈၼႆ။

သိုၵ်းမၢၼ်ႈဢဝ်ႁူမ်ႇလူမ်ႈဝၼ်းဝၼ်းၶိုၼ်းၶိုၼ်း ဝႃႈၼႆသေတႃႉ ၼႂ်းၶၢဝ်းတၢင်း 4-5 လိူၼ်မႃးၼႆႉ တီႈဝဵင်းတႃႈၶီႈလဵၵ်း မီးၶီႈလၵ်ႉၵူၼ်းၸူၼ် လိူင်ႇၼမ်မႃးၵူႈဝၼ်း။ ရူတ်ႉၶိူင်ႈ ၊ ရူတ်ႉၵႃးႁၢႆၵူႈဝၼ်း၊ ဢၼ်ၽူႈလၵ်ႉလိူင်ႇၼႆႉပဵၼ်ၼႂ်းပွၵ်ႉ ဝၢၼ်ႈၵွင်း၊ ပုင်းထုၼ်၊ သၼ်သၢႆးတႆး၊ သၼ်သၢႆးလိုဝ်ႉ၊ မႄႈၶၢဝ်၊ ဝဵင်းၵႅဝ်ႈၸိူဝ်းၼႆႉ။ လိူဝ်ၼၼ်ႉ တီႈၼႂ်းဝၢၼ်ႈၼႂ်းၽၢႆႇ ၼႂ်းဢိူင်ႇမိူင်းၵူဝ်းၵေႃႈ ၶူဝ်းၶွင်ၵူၼ်းဝၢၼ်ႈ ႁၢႆၵူႈဝၼ်း- ၵူၼ်းတႃႈၶီႈလဵၵ်းဢွၼ်ၵၼ်ၶၢင်းပွင်ႉၼင်ႇၼႆ။

ၽွင်းပၢၼ်သိုၵ်းမၢၼ်ႈၽွင်းငမ်းမိူင်းလႄႈ ၽဵဝ်ႈလၢင်ႉၶိူဝ်းၵူၼ်း ၼႂ်းပီ 1996-1997 ၸိူဝ်းၼၼ်ႉ သိုၵ်းမၢၼ်ႈ ၵၼ်ႉၸၼ်လူလၢႆ ၶႃႈႁႅမ်တၢႆၼၢင်းယိင်းၼႂ်းမိူင်းတႆး ပႃးၸဵမ်ဝၢၼ်ႈၼွၵ်ႈၼႂ်းမိူင်း ပဵၼ်ႁူဝ်ႁဵင် ႁူဝ်မိုၼ်ႇ – ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး ၵဵပ်းသဵၼ်ႈမၢႆပိူင်ပဵၼ်သေ ႁဵတ်းဢွၵ်ႇပပ်ႉဝႆႉ – ထၢင်ႇႁၢင်ႈၵၼ်ႉၸၼ်- License to Rape ၼႆဝႆႉ ။