ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈမိူင်းငေႃႉ ၸႄႈဝဵင်းၵျွၵ်ႉမႄးၼၼ်ႉ ယၢမ်းလဵဝ် ႁူဝ်ၵူၼ်း 260 ပၢႆ ပဵၼ်ၵူၼ်းထဝ်ႈ လုၵ်ႈဢွၼ်ႇလႄႈ မႄႈယိင်းၵမ်ႈၼမ်၊ မႄႈမၢၼ်းပႃး 10 ၵေႃႉ ဝႃႈၼႆ။
ၸိူဝ်းၶဝ်မီးတီႈ ဝတ်ႉတႃႈလူင် ၵိင်ႇၽႄႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄး။ လိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼႆႉ ၵိူတ်ႇလုၵ်ႈဢွၼ်ႇၼႂ်းပၢင်သဝ်းၼၼ်ႉ 2 ၵေႃႉ ။ ၼႂ်းလိူၼ်ၼႆႉၵေႃႈ ဢၼ်တေၵိူတ်ႇမီးထႅင်ႈ။
မေႃယႃလုမ်းလႃး ၵူၼ်းပဵၼ် တီႈမိူင်းငေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တီႈပၢင်သဝ်း ၵူၼ်းပၢႆႈၽေးသိုၵ်း တီႈတႃႈလူင်ၼၼ်ႉ မႄႈပႃးတွင်ႉ/ ပုမ်ယႂ်ႇ လႆႈၵိူတ်ႇလုၵ်ႈဢွၼ်ႇၵႂႃႇ 2 ၵေႃႉယဝ်ႉၶႃႈ။ ၼႂ်းဝူင်ႈၼႆႉၵူၺ်း တေၵိူတ်ႇထႅင်ႈၵေႃႉၼိုင်ႈ ၵေႃႉၼႆႉသမ်ႉ တေလႆႈသူင်ႇၵႂႃႇၵိူတ်ႇ တီႈႁူင်းယႃလႃႈသဵဝ်ႈ။ တေၵႂႃႇၽႃႇၵိူတ်ႇတီႈၼၼ်ႈ ယွၼ်ႉပဵၼ်လုၵ်ႈၽႃၽႄလႄႈ”- ဝႃႈၼႆ။
မႄႈပုမ်ယႂ်ႇ သွင်ၵေႃႉ ဢၼ်လႆႈၵိူတ်ႇၵႂႃႇ မိူဝ်ႈၼႂ်းလိူၼ်သႅပ်ႊထႅမ်ႊပိူဝ်ႊ 2021 ၼၼ်ႉ ၵေႃႉၼိုင်ႈ ၵိူတ်ႇမိူဝ်ႈဝၼ်းတီႈ 3 ထႅင်ႈၵေႃႉၼိုင်ႈ ၵိူတ်ႇ မိူဝ်ႈဝၼ်းတီႈ 28 တင်းသွင်ၵေႃႉၼႆႉ ၵိူတ်ႇတီႈပၢင်သဝ်းၵူၼ်းပၢႆႈၽေး ဝတ်ႉတႃႈလူင်လႄႈ ၵေႃလိၵ်ႈလၢႆး မိူင်းငေႃႉ ၊ ပဵၼ်ၵူၼ်းဝၢၼ်ႈႁိူၼ်းဝူဝ်း တင်းသွင်၊ ယဝ်ႉၵေႃႈ ဢၼ်တေၵိူတ်ႇ ၼႂ်းဝူင်ႈၼႆႉၵေႃႈ ပဵၼ်ၵူၼ်းႁိူၼ်းဝူဝ်း ၼင်ႇၵဝ်ႇဝႃႈၼႆ။
“မႄႈပုမ်ယႂ်ႇ သွင်ၵေႃႉ ဢၼ်လႆႈၵိူတ်ႇလုၵ်ႈဢွၼ်ႇၵႂႃႇယဝ်ႉၼၼ်ႉ ပဵၼ်ၵူၼ်းပၢႆႈၽေးသိုၵ်းၵေႃႈၸႂ်ႈ ယဝ်ႉၵေႃႈ ပဵၼ်မႄႈပုမ်ယႂ်ႇသေ ယၢမ်ႈၸပ်းၶူဝ်ႊဝိတ်ႉ 19 ႁေ။ ၵူၺ်းၵႃႈ ယၢမ်းလဵဝ်တႄႉ တင်းမႄႈတင်းလုၵ်ႈ လွတ်ႈၽႄးၵၼ်တင်းမူတ်းယူႇၶႃႈ”- မေႃလုမ်းလႃး ၵူၼ်းပဵၼ် မိူင်း ငေႃႉ သိုပ်ႇလၢတ်ႈၼႄၼင်ႇၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈၵိင်ႇၽႄ မိူင်းငေႃႉၼႆႉ ၸွမ်းၼင်ႇ သဵၼ်ႈမၢႆ ဢၼ်ယူႇတီႈၽူႈၸွႆႈထႅမ်ၵူၼ်းပၢႆႈၽေးသိုၵ်းၶဝ် လႆႈ ၵဵပ်းဝႆႉ တေႃႇထိုင် ဝၼ်းတီႈ 24/9/2021 ၼၼ်ႉ တီႈမၢၼ်ႈပိုၼ်ႉ ႁူဝ်ၵူၼ်း 73 ၵေႃႉ၊ ၵုၼ်ၵွၵ်ႇ 15 ၵေႃႉ၊ ၼမ်ႉသူမ်ႈ 29 ၵေႃႉ၊ ၵေႃလိၵ်ႈလၢႆး မိူင်း ငေႃႉ 58 ၵေႃႉလႄႈ တႃႈလူင် 88 ၵေႃႉ ၼႆယဝ်ႉ။
ပေႃးႁူမ်ႈၵၼ် တင်းမူတ်း ၼႂ်းၸႄႈဝဵင်းၵျွၵ်ႉမႄးၸိုင် တေႃႇထိုင် ဝၼ်းတီႈ 24/9/2021 ၼႆႉ ဢၼ်ပၢႆႈမႃးသွၼ်ႈဝႆႉ တီႈပၢင်သဝ်း ၵူၼ်းပၢႆႈၽေး တင်းမူတ်း 2,492 ၵေႃႉလႄႈ ၸိူဝ်းပၢႆႈၵႂႃႇ ယူႇသဝ်းဝႆႉ ၸွမ်းႁိူၼ်းယေးပီႈၼွင်ႉၽႂ်မၼ်း ၸွမ်းၼႂ်းဝဵင်း တေမီးထႅင်ႈ 1,700 ပၢႆ ၼႆယဝ်ႉ။