ဝၼ်းတီႈ 30/09/2021 မိူဝ်ႈဝႃးၼႆႉသိုၵ်းမၢၼ်ႈလုၵ်ႉတၢင်းဝဵင်းလၢႆးၶႃႈမႃး တဵမ်ရူတ်ႉၵႃးလၢႆလၢႆလမ်း မႃးတူင်ႉၼိုင်တၢင်းဝဵင်းပၢင်လူင်လွႆလႅမ်။
ၵူၼ်းပၢင်လူင်ၵေႃႉၼိုင်ႈလၢတ်ႈဝႃႈ – “လုၵ်ႉတၢင်းလၢႆးၶႃႈမႃးဢေႃႈ။ မိူဝ်ႈဝႃးမႃးပၢင်လူင်။မိူဝ်ႈၼႆႉသမ်ႉသိုပ်ႇၵႂႃႇတၢင်းလွႆလႅမ်ယဝ်ႉ။ တေသိုပ်ႇၵႂႃႇတၢင်းလႂ်ထႅင်ႈဢမ်ႇႁူႉ။ ဢဵၼ်ႁႅင်းၶဝ်တႄႉၼမ်ဝႆႉဢေႃႈ။ ” ဝႃႈၼႆ။
သိုၵ်းမၢၼ်ႈဢဝ်ႁႅင်းသိုၵ်း ထူင်ႇထဵဝ်ႈၶိုၼ်ႈလူင်းၵႂႃႇမႃးလႄႈၵူၼ်းမိူင်းယုပ်းၽၢၼ်ႈၵူဝ်ႁႄ ဢမ်ႇမီးလွင်ႈႁူမ်ႇလူမ်ႈ။
“တူၵ်းၸႂ်ဢေႃႈ။ ၶဝ်မိူၵ်ႈၼႃႇ ၵူဝ်ၶဝ်မႃးႁဵတ်းသင်ၼႂ်းဝၢၼ်ႈၼႂ်းဝဵင်း။ ၵၢင်ၶိုၼ်းတမ်ႉဢမ်ႇႁတ်းၼွၼ်းလပ်းလီလီၶႃႈ။ ဢမ်ႇၸၢင်ႈဝၢင်းၸႂ်သေၼွၼ်းၶႃႈ” – ၵူၼ်းပၢင်လူင်ၼၼ်ႉသိုပ်ႇလၢတ်ႈၼင်ႇၼႆ။
တင်ႈတႄႇသိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်းမႃးၸဵမ်မိူဝ်ႈဝၼ်းတီႈ 1/2/2021 ၼၼ်ႉတေႃႇဝၼ်းမိူဝ်ႈၼႆႉ သိုၵ်းမၢၼ်ႈဢဝ်လၢႆးမိူၵ်ႈမႂ်ႈလိူင်းႁၢႆႉ ပေႃႉထုပ်ႉတီႉၺွပ်းၵူၼ်းမိူင်း ၊ ၶႃႈႁႅမ်ၵူၼ်းမိူင်း ၼႂ်းၵၢင်ဝဵင်းယႂ်ႇဝဵင်းလူင်။ ပေႃႉထုပ်ႉယႃႉႁႅမ်ၶူဝ်းႁိူၼ်းၽိူၼ်ဝၢၼ်ႇၵူၼ်းမိူင်းၸဵမ်ၼႂ်းဝဵင်းဝၢၼ်ႈၼွၵ်ႈ ၊ မိူင်းမၢၼ်ႈမိူင်းတႆး။