သိုၵ်းမၢၼ်ႈ ယိုဝ်းၵွင်ႈ သီႇႁူးႁႃႈတၢင်း ၼႂ်းဝဵင်းၾၢႆၶုၼ် ၸိုင်ႈတႆးပွတ်းၸၢၼ်း တိူဝ့်သႂ်ႇၵူၼ်းပိုၼ့်တီႈ မၢတ်ႇၸဵပ်းၸွမ်းၵေႃ့ၼိုင်ႈ ပဵၼ်ၼၢင်းယိင်း ၊ တိူဝ့်သႂ်ႇပႃးႁိူၼ်းယေး ၵူၼ်းဝၢၼ်ႈ။
Photo CJ-သိုၵ်းမၢၼ်ႈယိုဝ်းတိူဝ်ႉၵူၼ်းမိူင်း ၾၢႆၶုၼ် မၢတ်ႇၸဵပ်း ဝၼ်းတီႈ 27/9/2021 
Photo CJ-သိုၵ်းမၢၼ်ႈယိုဝ်းၺႃးႁိူၼ်းၵူၼ်းမိူင်းတီႈၾၢႆၶုၼ်လူႉၵွႆမိူဝ်ႈဝၼ်းတီႈ 27/9/2021
မိူဝ်ႈဝႃး ဝၼ်းတီႈ 27/9/2021 သိုၵ်းမၢၼ်ႈဢၼ်ပၵ်းတီႈဝဵင်းၾၢႆၶုၼ် လၢမ်းလိမ်းယိုဝ်းၵွင်ႈႁၢတ်ႇသႂ်ႇ ၸွမ်း ႁိူၼ်းၵူၼ်းဝၢၼ်ႈ လႄႈ တိူဝ့်ၺႃးၽူႈယိင်းၵေႃ့ၼိုင်ႈ မၢတ်ႇၸဵပ်း၊ ႁိူၼ်းယေးၵူၼ်း ဝၢၼ်ႈ ၵေႃႈလူႉၵွႆတင်းၼမ် ၼႆယဝ့်။
ၵူၼ်းမိူင်း ဢၼ်ၸမ်ၸႂ်ၵၼ်တင်းၸုမ်းသိုၵ်းၵႅတ်ႇၶႄၵူၼ်းမိူင်း PDF ဝဵင်းၾၢႆၶုၼ်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈယဵပ်ႇၺႃးမၢၵ်ႇဢၼ်ၵၢင်ဝႆႉ တၢင်း ၶဝ်ႈဝဵင်းၾၢႆၶုၼ် တီႈဝၢၼ်ႈၵူင်းသူင်ႇလႄႈ ဝၢၼ်ႈၵတေး ၵူၼ်းသိုၵ်း လႆႈလူ့တၢႆၼမ်။ ၵွပ်ႈၼၼ်လႄႈ ၶဝ်ၸႂ်လမ်သေ ယိုဝ်းၵွင်ႈလူင် ၵွင်ႈဢွၼ်ႇ ဢမ်ႇဝႄႈဝၢၼ်ႈဝႄႈသူၼ်၊ တိူဝ့်သႂ်ႇၼၢင်းယိင်းၵေႃႉၼိုင်ႈမၢတ်ႇၸဵပ်း၊ တိူဝ်ႉၺႃး ႁိူၼ်းယေး လူ့ၵွႆ ၼမ်”- ဝႃႈၼႆ။
ယၢမ်းၵၢင်ၼႂ် မွၵ်ႈ 10 မူင်းၶိုင်ႈ ၵွၼ်ႇၼႃႈသိုၵ်းမၢၼ်ႈတေယိုဝ်းၵွင်ႈႁၢတ်ႇၼၼ်ႉ သိုၵ်းမၢၼ်ႈ ပၢင်လွင်း – ၾၢႆၶုၼ် ဢၼ်ထႅမ်ႁႅင်းၶဝ်ႈမႃးၼႂ်းပိုၼ်ႉတီႈၼၼ်ႉ လႆႈပဵၼ်ပၢင်တိုၵ်းၵၼ် တၢင်းတပ့်ပွင်းၸူ့ ယၢင်းလႅင် (ကရင်နီပူးပေါင်းတပ်ဖွဲ့) တီႈႁိမ်း ဝၢၼ်ႈၵူင်းသူင်ႇလႄႈ ဝၢၼ်ႈၵတေး။ ၾၢႆႇၶွင်ႇ သီႇသိုၵ်းမၢၼ်ႈ လူ့တၢႆ မွၵ်ႈ 20 ၵေႃ့ KNDF ပိုၼ်ၽၢဝ်ႇဢွၵ်ႇဝႆ့။
“ပၢင်တိုၵ်းၼႆ့ တႄႇပဵၼ်ၵၢင်ၼႂ် 10 မူင်းၶိုင်ႈတေႃႇထိုင် 4 မူင်းဝၢႆးဝၼ်း တင်းသွင်ၾၢႆႇ ၸႂ့်ၶိူင်ႈၵွင်ႈလူင် ၵွင်ႈဢွၼ်ႇ ပိုတ်းယိုဝ်းၵၼ်ႁၢဝ်ႈ ႁႅင်း။ ပၢင်တိုၵ်းမိူဝ်ႈဝႃးၼၼ့် ၾၢႆႇသိုၵ်းမၢၼ်ႈ လူ့တၢႆၼမ် ”- ၵူၼ်းၾၢႆၶုၼ် လၢတ်ႈၼႄၽူႈတွႆႇႁွၵ်ႈၼင်ႇ ၼႆ။
ယၢမ်းလဵဝ် ၶွင်ႇသီႇသိုၵ်းမၢၼ်ႈ ၸၵၶ 7 ဢၼ်ပၵ်းဝႆ့ တီႈဝဵင်းၾၢႆၶုၼ်ၼႆ့ လႆႈသူင်ႇႁႅင်းသိုၵ်း ၵႂႃႇတၢင်း မိူင်းပၢႆး ဢဵၼ်ႁႅင်းမွၵ်ႈ 200 လႆႈပဵၼ်ပၢင်တိုၵ်းၵၼ်တင်း တပ့်သိုၵ်းၵႅတ်ႇၶႄၵူၼ်းမိူင်း မိူင်းပၢႆး လႄႈ တပ့်ပွင်းၸူ့ ယၢင်းလႅင် ႁၢဝ်ႈႁႅင်း တီႈႁိမ်းဝၢၼ်ႈၶွင်းမၢႆး ၼႂ်းၵႄႈ ၾၢႆၶုၼ်လႄႈ မိူင်းပၢႆး ။
