ၵူၼ်းပၢႆႈၽေးသိုၵ်းတီႈဝဵင်းၵျွၵ်ႉမႄး မီး 4000 ပၢႆ ႁိုင်မႃးၶၢဝ်းတၢင်း 7-8 လိူၼ်ယဝ်ႉၵေႃႈ တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈၶိုၼ်းႁိူၼ်းယေး ။
သိုၵ်းဢူၺ်းလီပွတ်းႁွင်ႇ ဢၼ်ပဵၼ် TNLA တင်း SSPP လႄႈတင်း RCSS ပိုတ်းယိုဝ်းၵၼ်ၼႂ်းၸႄႈဝဵင်းၵျွၵ်ႉမႄး ၸဵမ်မိူဝ်ႈလိူၼ် ၾႅပ်ႉပိဝ်ႊရီႊမႃးတေႃႇထိုင်ယၢမ်းလဵဝ် ယိုဝ်းယိုဝ်းၵိုတ်းၵိုတ်း၊ ၵူၼ်းဝၢၼ်ႈၸိူဝ်းပၢႆႈၽေးသိုၵ်းမႃးယူႇၸွမ်း ဝတ်ႉဝႃးၽႃသိူဝ်ႇလႄႈ ႁိူၼ်းယေးပီႈၼွင်ႉ ႁူဝ်ၵူၼ်းတေမီးမွၵ်ႈ 4000 ပၢႆ ၵေႃႈဢမ်ႇၸၢင်ႈပွၵ်ႈၶိုၼ်းႁိူၼ်း၊ ဢမ်ႇၸၢင်ႈမိူဝ်းႁဵတ်းၵၢၼ်ႁႆႈၵၢၼ်သူၼ်။
ၼၢင်းယိင်းၵေႃႉၼိုင်ႈ ဢၼ်ပၢႆႈၽေးသိုၵ်းမႃးမီးတီႈမိူင်းငေႃႉ လၢတ်ႈတီႈၽူႈတွႆႇႁွၵ်ႈဝႃႈ ပႆႇယုမ်ႇ ပႆႇတမ်းၸႂ်ငဝ်းလၢႆးၼႂ်းပိုၼ်ႉတီႈလႄႈဢမ်ႇၸၢင်ႈပွၵ်ႈႁိူၼ်း ဝႃႈၼႆ။
“ၶႆႈတႄႉ ၶႆႈမိူဝ်းႁိူၼ်းၼႃႇယဝ်ႉၶႃႈ။ တေလႆႈမိူဝ်းမိူဝ်ႈလႂ်ဢမ်ႇႁူႉ ။ ပေႃးပွၵ်ႈမိူဝ်းႁိူၼ်းသမ်ႉတေဢဝ်သင်ၵိၼ် ၵၢၼ်ၵေႃႈဢမ်ႇလႆႈႁဵတ်း။ သမ်ႉပေႃးဢမ်ႇၶႆႈႁတ်းဝူၼ်ႉယဝ်ႉၶႃႈ ” ၼၢင်းယိင်းၵူၼ်းမၢၼ်ႈပိုၼ်ႉ ဢၼ်ႁွတ်ႈထိုင်မိူင်းငေႃႉၼၼ်ႉလၢတ်ႈ။
တီႈမိူင်းငေႃႉတႄႉ မီးၵူၼ်းပၢႆႈၽေးသိုၵ်းမွၵ်ႈ 300 ၵေႃႉ။တီႈပၢင်သဝ်း မၢၼ်ႈၶႃႇ၊ မိူင်းတၢင်ႈ၊ ၵိဝ်ႇသႅဝ်း၊ ပဵင်းၶႃး ၊ ႁူးသူၼ် ၸိူဝ်းၼႆႉသမ်ႉမီးမွၵ်ႈ 2000 ပၢႆ လႆႈႁူႉတီႈ ၸုမ်းၸွႆႈထႅမ်ၵူၼ်းပၢႆႈၽေးသိုၵ်းၼင်ႇၼႆ။
လိူဝ်ၼၼ်ႉ ၵူၼ်းၸိူဝ်းဢၼ်မႃးပိုင်ႈႁူမ်ႈယူႇသဝ်းၸွမ်းပီႈၼွင်ႉၼႂ်းဝဵင်း မီးမွၵ်ႈ 1700 လႆႈႁူႉၼင်ႇၼႆ။
ၵူၼ်းပၢႆႈၽေးသိုၵ်းၸိူဝ်းၼႆႉ ယွၼ်ႉပိူဝ်ႈတိုၵ်ႉပဵၼ်ပၢင်တိုၵ်းယူႇလႄႈ ဢမ်ႇၸၢင်ႈမိူဝ်းႁဵတ်းၵၢၼ်ၶိုၼ်းတီႈဝၢၼ်ႈ ၊ၾၢႆႇၼိုင်ႈ ၼႂ်းဝဵင်းသမ်ႉ ယွၼ်ႉပိူဝ်ႈတၢင်းပဵၼ်ၶူဝ်ႊဝိတ်ႉၽႄႈလၢမ်းလႄႈ ဢမ်ႇၸၢင်ႈၵႂႃႇႁဵတ်းၵၢၼ် သင်။ လႆႈၸႂ်ယႂ်ႇဢၼ်ၸဝ်ႈတႃႇၼ တီႈၸမ်ၵႆ မႃးၵမ်ႉၸွႆႈလူႇတၢၼ်းပၼ်ၵူၺ်း လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ