ဝၼ်းတီႈ 20/9/2021 ထေႃႈလႃႈၵျီႈဢၼ်ၵူၼ်းပၢႆႈၽေးသိုၵ်းၶီႇသေ ဢၢၼ်းသိုပ်ႈပၢႆႈၵႂႃႇထႅင်ႈတီႈလွတ်ႈၽေးၼၼ်ႉ မႃးပိၼ်ႈၶွမ်ႈလႄႈ ၵူၼ်းပၢႆႈၽေးသိုၵ်း မၢတ်ႇၸဵပ်းႁႅင်း 3 ၵေႃႉ မၢတ်ႇၸဵပ်းလိူဝ်ႁႅင်းၵေႃႉၼိုင်ႈ ပဵၼ်ၵူၼ်းထဝ်ႈယိင်း။
သိုၵ်း RCSS လႄႈ SSPP ပိုတ်းယိုဝ်းၵၼ်ႁၢဝ်ႈႁႅင်း ႁိမ်းၸမ်ဝၢၼ်ႈၼွင်လႅဝ် ၊ မၢၵ်ႇလူင်တူၵ်းလူင်းႁိမ်းဝတ်ႉၼွင်လႅဝ် တီႈၵူၼ်းဝၢၼ်ႈပၢႆႈမႃးသွၼ်ႈၽေးသိုၵ်းၼၼ်ႉလႄႈ ၵူၼ်းပၢႆႈၽေးသိုၵ်း တိုၼ်ႇသၢၼ်ဢွၼ်ၵၼ်ပၢႆႈတၢႆထႅင်ႈ ။
ၾူၼ်တူၵ်းႁၢဝ်ႈႁႅင်း သဵၼ်ႈတၢင်းမိုၼ်ႈ ရူတ်ႉထေႃႈလႃႈၵျီႈဢၼ်တၢင်ႇၵူၼ်းပၢႆႈၽေးသိုၵ်းမႃးၼၼ်ႉ မႃးပိၼ်ႈတီႈ တၢင်းၽႄ ႁူဝ်ၶၢႆးလႄႈ ၶူဝ်သႃးတေႃး။ ၽူႈယိင်း 3 ၵေႃႉမၢတ်ႇၸဵပ်း။
ၵူၼ်းမိူင်းၵိုင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မၢၵ်ႇလူင်တူၵ်းမႃးႁိမ်းဝတ်ႉဢၼ်ၵူၼ်းပၢႆႈၽေးယူႇသဝ်းလႄႈ ဢွၼ်ၵၼ်ပၢႆႈတၢႆထႅင်ႈဢေႃႈ ။ ရူတ်ႉမႃးပိၼ်ႈလႄႈ ၵူၼ်းမၢတ်ႇၸဵပ်း 3 ၵေႃႉ ။ ၵူၼ်းထဝ်ႈၵေႃႉၼိုင်ႈမၢတ်ႇၸဵပ်းလိူဝ်ႁႅင်းလႄႈ ပိူၼ်ႈသိုပ်ႇသူင်ႇႁူင်းယႃလွႆလႅမ်ယဝ်ႉ။ တႃႇသွင်ၵေႃႉတႄႉ ႁူဝ်တႅၵ်ႇ လွၵ်ႈဢိတ်းဢွတ်းၵူၺ်း။ ယူတ်းယႃတူဝ်ဝႆႉတီႈႁူင်းယႃမိူင်းၵိုင်”- ဝႃႈၼႆ။
ၵူၼ်းထဝ်ႈၼၼ်ႉ မၢၵ်ႇၼိမ်းႁူဝ်ၶဝ်ႇတႅၵ်ႇလႄႈ လႆႈသိုပ်ႇသူင်ႇႁူင်းယႃ လွႆလႅမ် ။ ဢၼ်လူႉတၢႆတႄႉဢမ်ႇမီး လႆႈႁူႉၼင်ႇၼႆ။
သိုၵ်း 2 ၸုမ်း ပိုတ်းယိုဝ်းၵၼ်ထုင်ႉဢိူင်ႇႁူဝ်ၶၢႆး မႃးၸဵမ်မိူဝ်ႈဝၼ်းတီႈ 11/9/2021 မႃး။ ၵူၼ်းဝၢၼ်ႈထုင်ႉဢိူင်ႇႁူဝ်ၶၢႆး 2000 ပၢႆ လႆႈပၢႆႈယၢၼ်ႁိူၼ်းယေးတီႈယူႇ။ ဢွၼ်ၵၼ်ၵႂႃႇသွၼ်ႈယူႇတီႈဝတ်ႉၵျွင်းမုၼ်ၸဝ်ႈ။ ဝၼ်းတီႈ 20/9/2021 ၼႆႉသမ်ႉမႃးပိုတ်းယိုဝ်းၵၼ်ႁိမ်းၸမ်ဝတ်ႉၵျွင်းမုၼ်ၸဝ်ႈလႄႈ ႁဵတ်းႁႂ်ႈၵူၼ်းပၢႆႈၽေးသိုၵ်းလႆႈဢွၼ်ၵၼ်တူၵ်းၸႂ်တိုၼ်ႇသၢၼ်ႈပၢႆႈတၢႆထႅင်ႈၵေႃႉႁူးၵေႃႉတၢင်း။
