ၵူၼ်းဝၢၼ်ႈပၢင်ၵွၼ် ဢၼ်ပၢႆႈၽေးသိုၵ်းမႃးသွၼ်ႈဝႆ့တီႈဝၢၼ်ႈၼမ့်ၸေႃ့သေ တိတ်းၸပ်းတၢင်းပဵၼ်ၶူဝ်ႊဝိတ့် 19 မီး 20 ပၢႆၼၼ်ႉ ယၢမ်းလဵဝ်ယူတ်းယႃတူဝ် ႁၢႆၶႅၼ်းယဝ်ႉသေလႆႈပွၵ်ႈၶိုၼ်းတီႈပၢင်သဝ်းယဝ်ႉသေတႃႉ ၵူၼ်းတီႈပၢင်သဝ်း ယင်းတိုၵ်ႉလၵ်ႉလွမ်မႆႈၸႂ် ၵူဝ်တိတ်းၸပ်း လႄႈလႆႈၾၢင်ႉယူႇၾၢင်ႉၵိၼ်ၵၼ်။
ၵူၼ်းပၢႆႈၽေးသိုၵ်း တီႈဝၢၼ်ႈၼမ့်ၸေႃ့ 24 ၵေႃ့ ဢၼ်တိတ်းၸပ်းၸိူဝ့်မႅင်းတၢင်းပဵၼ်ၶူဝ်ႊ ဝိတ့် 19 သေ လႆႈ ၵႂႃႇၵၵ်းတူဝ် ယူတ်းယႃၵၼ်ဝႆ့ တီႈႁူင်းယႃၵျွၵ့်မႄးၼၼ့် ဢွၼ်ၵၼ်ယူႇလီၶႅၼ်းၸိုၼ်ႈၵၼ်မႃးမူတ်းယဝ်ႉလႄႈ ဝၼ်းတီႈ 18/9/2021 ၼႆ့ လႆႈပွၵ်ႈ ၶိုၼ်း ဢွင်ႈတီႈပၢင်သဝ်းၵူၼ်းပၢႆႈၽေးသိုၵ်း တီႈဝၢၼ်ႈၼမ့်ၸေႃ့ ဢိူင်ႇမိူင်းတင်ႈ ၸႄႈဝဵင်းၵျွၵ့်မႄး ၸိုင်ႈတႆးပွတ်းႁွင်ႇ ၼႆယဝ့်။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဢိူင်ႇမိူင်းတင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေးသိုၵ်း တီႈဝၢၼ်ႈၼမ့်ၸေႃ့ ဢၼ်တိတ်း ၸပ်း ၸိူဝ့်မႅင်းၼၼ့် ဢွၼ်ၵၼ် ၶႅၼ်းၶိုၼ်ႈမႃးမူတ်းသေ မိူဝ်ႈဝၼ်းတီႈ 18 ၼႆ့ ၶိုၼ်းပွၵ်ႈမႃးတီႈဝၢၼ်ႈၼမ့်ၸေႃ့ မူတ်းယဝ့်ၶႃႈ။ တီႈပၢင် သဝ်း ၵူၼ်းပၢႆႈၽေး တီႈၼမ့်ၸေႃ့ၼႆ့ လႆႈယႅၵ်ႈယူႇဝႆ့ 2 တီႈ။ တီႈၼိုင်ႈ တႃႇၵူၼ်းပဵၼ်ဢၼ်ယူတ်းယႃတူဝ်ၵၼ်ပွၵ်ႈမႃး။ တီႈၼိုင်ႈသမ့် ပဵၼ်ၵူၼ်းပၢႆႈၽေး ဢၼ်ဢမ်ႇပဵၼ်တိတ်းၸပ်းတၢင်းပဵၼ် ႁဵတ်းၼၼ်ယူႇဝႆ့ၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်း တီႈဝၢၼ်ႈၼမ့်ၸေႃ့ၼႆ့ ပဵၼ်ၵူၼ်းဝၢၼ်ႈပၢင်ၵွၼ်ပၢႆႈမႃးယူႇဝႆ့ မိူဝ်ႈၵမ်းဢွၼ်တၢင်း မီး 100 ပၢႆ။ ယၢမ်းလဵဝ် ၵိုတ်းလိူဝ် ဝႆ့ တင်းမူတ်း 90 ပၢႆ ။ ၸိူဝ်းဢမ်ႇတိတ်းၸပ်းတၢင်းပဵၼ်သေ ၵိုတ်းဝႆႉယူႇတီႈပၢင်သဝ်းၵူၼ်းပၢႆႈၽေးၼၼ်ႉၵေႃႈ ဢွၼ်ၵၼ်မႆႈၸႂ် ၵူဝ်ၸပ်းတၢင်းပဵၼ်၊ ယွၼ်ႉပိူဝ်ႈလႆႈယူႇႁိမ်းၸမ် လႄႈယူႇၸွမ်းၵၼ်တင်းၼမ်ဝႃႈၼႆ။
“ပၢင်သဝ်းၵူၼ်းပၢႆႈၽေးသိုၵ်း တီႈဢိူင်ႇမိူင်းတၢင်ႈႁဝ်းၶႃႈၼႆ့ ထူပ်းႁၼ်ၵူၼ်း တိတ်းၸပ်းတၢင်းပဵၼ် ၶူဝ်ႊဝိတ့် တိူဝ်းမႃးထႅင်ႈ ယၢမ်းလဵဝ် တီႈဝၢၼ်ႈပဵင်းၶႃး မီးၵႂႃႇ 31 ၵေႃ့၊ တီႈဝၢၼ်ႈၼႃးမူၼ်းသမ့် 6 ၵေႃ့လႄႈ တီႈဝၢၼ်ႈၼမ့်ၸေႃ့တႄ့ ဢမ်ႇတိူဝ်းၶႃႈ မီး 24 ၵေႃ့ၼၼ့်သေ ၶႅၼ်းမႃးၶိုၼ်းယဝ့်ၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း ဢိူင်ႇမိူင်းတင်ႈ သိုပ်ႇလၢတ်ႈၼႄၼင်ႇၼႆ။
လိူဝ်ၼၼ့် တီႈဝၢၼ်ႈတႃႇလူင် ဝဵင်းမိူင်းငေႃ့သမ့် 12 ၵေႃ့ (လူ့တၢႆ 1 ၵေႃ့)လႄႈ တီႈမၢၼ်ႈၶႃႇ မီၵူၼ်းၸပ်းတၢင်းပဵၼ်120 ၵေႃ့ ၼႆယဝ့်။
ယၢမ်းလဵဝ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵျွၵ့်မႄး ဢၼ်ၵူတ်ႇထတ်းႁၼ် တိတ်းၸပ်းၸိူဝ့်မႅင်းတၢင်းပဵၼ်ၶူဝ်ႊဝိတ့် 19 တင်းမူတ်း မီး ၵႂႃႇ 200 ပၢႆယဝ့် ဝႃႈၼႆ။
ၵူၼ်းပၢႆႈၽေးသိုၵ်းဢၼ်တိတ်းၸပ်းတၢင်းပဵၼ် ၵမ်ႈၽွင်ႈလႆႈ ၵႂႃႇၵၵ်းတူဝ်ယူႇသဝ်းတီႈသုၼ်ၵၵ်းတူဝ်ဢၼ်ၾၢႆႇၸွႆႈထႅမ်ၶိုင်ဝႆႉပၼ်၊ ၵမ်ႈ ၽွင်ႈလႆႈၶဝ်ႈႁူင်းယႃသေယူတ်းယႃတူဝ်။
ၵူၼ်းပၢႆႈၽေးသိုၵ်း တီႈၸႄႈဝဵင်းၵျွၵ့်မႄး 2,500 ပၢႆၼႆ့ လႆႈပၢႆႈၽေးပၢင်တိုၵ်းၼႂ်းၵႄႈ RCSS တင်း TNLA, SSPP ပိုတ်းယိုဝ်းၵၼ် ၼႂ်းၶၢဝ်းတၢင်း 7 လိူၼ်ပၢႆ ၵမ်ႈၽွင်ႈ ၵမ်ႈၼမ် ဢမ်ႇၸၢင်ႈပွၵ်ႈယူႇၶိုၼ်းႁိူၼ်းယေး။ တိုၵ်ႉလႆႈသွၼ်ႈယူႇႁူမ်ႈၵၼ်တီႈဝတ်ႉဝႃးၽႃသိူဝ်ႇ၊ ႁိူၼ်းယေးပီႈၼွင်ႉလႄႈ ယူႇၸွမ်းဝၢၼ်ႈ ၸွမ်းသူၼ်တီႈဢၼ်ဢမ်ႇမီးပၢင်တိုၵ်း။ ၵွပ်ႈၼႆလႄႈ ယင်းတိုၵ်ႉၸၢင်ႈတိတ်းၸပ်းလၢမ်းၽႄႈ ၸူးၵၼ်ထႅင်ႈယူႇ ၵူၼ်းၼုမ်ႇၸိူဝ်းၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈ။
