ၸွမ်ၽွင်းလူင်ၸိုင်ႈထႆး ႁူပ်ႉထူပ်းႁႅင်းၵၢၼ်ယၢၼ်မိူင်း တုၵ်းယွၼ်းႁႂ်ႈႁႅင်းၵၢၼ်ႁၵ်ႉမိူင်းထႆး

ၸွမ်ၽွင်းလူင်ၸိုင်ႈထႆး ၸွမ်သိုၵ်းလူင် ပရႃႊယုတ်ႊ ၸၼ်ႊဢူဝ်ႊၶျႃႊ ႁူပ်ႉထူပ်းႁႅင်းၵၢၼ်ယၢၼ် မိူင်းတုၵ်းယွၼ်း ႁႂ်ႈႁႅင်းၵၢၼ်ယၢၼ်မိူင်း ႁၵ်ႉမိူင်းထႆး မိူၼ်ၼင်ႇဝၢၼ်ႈၵိူတ်ႇမိူင်းၼွၼ်း။

ဝၼ်းတီႈ 05/03/2018 ၸွမ်သိုၵ်းလူင် ပရႃႊယုတ်ႊ ၸၼ်ႊဢူဝ်ႊၶျႃႊ ၸွမ်ၽွင်းလူင်ၸိုင်ႈထႆး ၊ ဢွၼ်ဢဝ်ၽွင်းလူင်ၾၢႆႇၼႂ်းမိူင်း၊ ၽွင်းလူင်ၾၢႆႇၵၢၼ်ၽုၵ်ႇသွမ်ႈ ဢိၵ်ႇၸဝ်ႈၼႃႈတီႈၾၢႆႇၵဵဝ်ႇၶွင်ႈသေ ၵႂႃႇႁူပ်ႉထူပ်းၸုမ်းတူင်ႉၼိုင်ၾၢႆႇႁႅင်းၵၢၼ်လႄႈ ႁႅင်းၵၢၼ်ယၢၼ်မိူင်း တီႈဢိူင်ႇပၢင်ယႃႈၾႅၵ်ႇ ၸႄႈဝဵင်းမိူင်း ၸႄႈတွၼ်ႈသမုတ်ႇသႃၶွၼ်း ၸိုင်ႈထႆး။

သိုဝ်ႇၶၢဝ်ႇထႆး bangkokbiznews ပိုၼ်ၽၢဝ်ႇဝႃႈ – ၼႂ်းၶၢဝ်းတၢင်းၼႆႉ ၸွမ်သိုၵ်းလူင်ပရႃႊယုတ်ႊၸၼ်ႊဢူဝ်ႊ ၶျႃႊ ဢုပ်ႇဢူဝ်းၸုမ်းတူင်ႉၼိုင်လွင်ႈႁႅင်း ၵၢၼ်လႄႈႁပ်ႉထွမ်ႇတၢင်းယၢပ်ႇၽိုတ်ႇႁႅင်းၵၢၼ် ၵဵဝ်ႇၵပ်းလွင်ႈႁဵတ်း ၵၢၼ်၊ လွင်ႈဝတ်းဝႂ်၊ လွင်ႈတီႈ ယူႇၵိၼ်ၸိူဝ်းၼႆႉသေလၢတ်ႈဝႃႈ – မီးပၼ်ႁႃသင်ၵေႃႈ ၾၢႆႇလူင်ပွင်ၸိုင်ႈ၊ ၾၢႆႇNGOs လႄႈၾၢႆႇ ႁႅင်းၵၢၼ်ၸိူဝ်းၼႆႉ မႃးဢုပ်ႇၵၼ် ၸွႆႈၵၼ်ၵႄႈလိတ်ႈၵႂႃႇ။ သိုပ်ႇၼႆႉၵႂႃႇ ႁႅင်းၵၢၼ်၊ ပေႃႈလဵင်ႉ/ မႄႈလဵင်ႉ ဢိၵ်ႇၸဝ်ႈၼႃႈတီႈၾၢႆႇၵဵဝ်ႇၶွင်ႈ တေလႆႈႁဵတ်းၸွမ်းၼင်ႇပၵ်းပိူင်မၢႆမီႈၸိုင်ႈမိူင်း ဢၼ်တမ်းဝၢင်းဝႆႉ ပေႃးဢမ်ႇၼၼ်ၸိုင် တေၺႃးတူတ်ႈတၢမ်ႇၼၵ်းၼႃ ဝႃႈၼႆ။

ၸွမ်သိုၵ်းလူင်ပရႃႊယုတ်ႊ ၾၢၵ်ႇၵႂၢမ်းထိုင်ႁႅင်းၵၢၼ်ယၢၼ်မိူင်းဝႃႈ – “ မိူဝ်ႈသူၸဝ်ႈ မႃးႁဵတ်းၵၢၼ် တီႈၼႂ်းမိူင်းထႆးၼႆႉ သူၸဝ်ႈလူဝ်ႇႁၵ်ႉမိူင်းထႆးမိူၼ် မိူင်းၵိူတ်ႇသူၸဝ်ႈ ။ တီႈမိူင်းထႆးၼႆႉ ႁဵတ်းႁႂ်ႈ သူၸဝ်ႈ မီးၵၢၼ်၊ လႆႈတိုဝ်ႉတၢင်းၵၢၼ်ႁဵၼ်း၊ လႆႈငိုၼ်းတွင်း ၵွပ်ႈၼၼ်မိူဝ်ႈတိုၵ်ႉယူႇမိူင်းထႆးၼႆႉ ႁႂ်ႈမီးၸႂ်ႁၵ်ႉမိူင်းထႆး ႁဵတ်းၸွမ်းမၢႆမီႈမိူင်းထႆး” ဝႃႈၼႆ။

သိုပ်ႇၼၼ်ႉ ၸွမ်သိုၵ်းလူင်ပရႃႊယုတ်ႊလႄႈ ၸုမ်းၸိူဝ်းႁပ်ႉထွမ်ႇလွင်ႈပဵၼ်ယူႇ ၊လွင်ႈယၢပ်ႇၽိုတ်ႇ ႁႅင်းၵၢၼ်ယၢၼ်မိူင်းသေ တေဢဝ်ၵႂႃႇဢုပ်ႇၵုမ်ၵၼ်တီႈ ပၢင်ၵုမ်လူင် ၸုမ်းႁၢပ်ႇၵၢၼ်ၽွင်းလူင် ပွၵ်ႈၵမ်းတီႈ 2/2561 တီႈၸႄႈတွၼ်ႈ ၽဵတ်ႊၿူႊရီႊ ၼႂ်းဝၼ်းတီႈ 06/03/2018 ၼႆႉ ၼႆယဝ်ႉ ။