ပၢင်ၵုမ်လူင်လွင်ႈငမ်းယဵၼ် ၸၼ်ႉမိူင်းႁူမ်ႈတုမ် (ပွၵ်ႈၵမ်း 4) ႁိုဝ် ပၢင်ၵုမ်လူင်ပၢင်လူင် ႁူဝ်ပၢၵ်ႇပီ 21 ၵမ်းထူၼ်ႈ 3 တေၸတ်းႁဵတ်း ၼႂ်းလိူၼ်မေႊ ၸွမ်းၼင်ႇပၢင်ၵုမ် JICM ပွၵ်ႈၵမ်း 7 တႅပ်းတတ်းဝႆႉ။
ၸဝ်ႈသိုၵ်းလူင်ၸၢႆးငိုၼ်း ၽူၼမ်းၼႂ်း 3 RCSS/SSA ၊ ဢၼ်ႁပ်ႉပုၼ်ႈၽွၼ်း ၼႂ်းၸုမ်းၽူႈၼမ်းၼႂ်း UPDJC လႄႈပဵၼ်ၽူႈၶဝ်ႈပႃးၼႂ်း UPDJC လၢတ်ႈဝႃႈ- ” ၼႂ်းပၢင်ၵုမ် JICM ဢၼ်ၸတ်းၵႂႃႇမိူဝ်ႈဝၼ်းတီႈ 28/02/2018 တီႈၼေႇပျီႇတေႃႇၼၼ်ႉ မီးၶေႃႈလႆႈၸႂ် ၶေႃႈမၵ်းမၼ်ႈဝႃႈ တေၸတ်းႁဵတ်းၼႂ်းလုၵ်ႈလိူၼ်မေႊ၊ တေပဵၼ်မွၵ်ႈၵၢင်လိူၼ်မေႊၵေႃႈပဵၼ်လႆႈ”-ဝႃႈၼႆ။
မၼ်းၸဝ်ႈလၢတ်ႈပႃးဝႃႈ- “ပေႃးဢဝ်ပိူင်မၼ်းဝႃႈ ပၢင်ၵုမ်ပၢင်လူင် ႁူဝ်ပၢၵ်ႇပီ 21 ၼႆႉ တေလႆႈႁဵတ်းၼိုင်ႈပီ 2 ပွၵ်ႈ၊ မိူဝ်ႈလဵဝ်ၶၢဝ်းတၢင်းၸမ်ၼိုင်ႈပီယဝ်ႉ ႁဝ်းၶႃႈပႆႇလႆႈႁဵတ်း၊ ပေႃးၸိူင်ႉၼၼ် ႁဝ်းၶႃႈၶိုၼ်းမႃးဢုပ်ႇၵၼ်ဝႃႈ ပေႃးဝႃႈႁဝ်းၸတ်းၼႂ်းလိူၼ်မေႊ။ ပေႃးမႃးတူၺ်းၾၢႆႇလူင်ပွင်ၸိုင်ႈၵေႃႈ ၽူႈၵိူဝ်းၵုမ်ၸိုင်ႈမိူင်း ယၢမ်းလၢတ်ႈဝႃႈ ၼႂ်းပီ 2019 ၼႆႉ ႁႂ်ႈမီးမႃးပိုၼ်ႉထၢၼ်ပိူင်ၾႅတ်ႊၻရႄႊ၊ ႁႂ်ႈမၼ်းပေႃးၸၢင်ႈဢွၵ်ႇၼႄၾၢင်ႁၢင်ႈမၼ်း ဢၼ်ၶႂ်ႈလႆႈ။ ၵမ်းၼႆႉၾၢႆႇၸုမ်းၸၢဝ်းၶိူဝ်း EAOs ႁဝ်းၶႃႈၵေႃႈ သမ်ႉၶႂ်ႈႁဵတ်းၼင်ႇၵဝ်ႇ၊ ၵူၺ်းၵႃႈ ဢၼ်ပႆႇၸၢင်ႈႁဵတ်းၼႆႉ မၼ်းမႃးၶမ်ၵၼ် ပၢင်ၵုမ်ၸၼ်ႉၸိူဝ်ႉၸၢတ်ႈ၊ ပၢင်ႁူပ်ႉထူပ်းၵူၼ်းမိူင်းၸိူဝ်းၼႆႉ။ ၵွပ်ႈပိူဝ်ႈမၼ်းပႆႇလႆႈႁဵတ်းလႄႈ ႁဝ်းၶႃႈပႆႇၸၢင်ႈၵႂႃႇၵူၺ်း၊ ပေႃးဢဝ် NCA ဝႃႈမၼ်းတေလႆႈႁဵတ်းတိၵ်းတိၵ်း ၼိုင်ႈပီ 2 ပွၵ်ႈ”-ဝႃႈၼႆ။
ပူၼ်ႉမႃးမိူဝ်ႈဝၼ်းတီႈ 27/02/2018 မီးၵၢၼ်ႁွင်ႉပၢင်ၵုမ် ၸုမ်းႁူမ်ႈဢုပ်ႇဢူဝ်းၼႃႈၵၢၼ်ငမ်းယဵၼ်မိူင်းႁူမ်ႈတုမ် (UPDJC ) ။ ဝၼ်းတီႈ 28 ၸတ်းထႅင်ႈပၢင်ၵုမ် ၼႃႈၵၢၼ်ၽေႃႇၼမ်ႉၼႄတူဝ် လိၵ်ႈႁူမ်ႈမၢႆၵိုတ်းတိုၵ်း (JICM) ။ ပၢင်ၵုမ်လူင် JICM မီးၶေႃႈလႆႈၸႂ်တႅပ်းတတ်း တႃႇၸတ်းႁဵတ်း ပၢင်ၵုမ်လူင်ပၢင်လူင် ၼႂ်းလိူၼ်မေႊ တၢင်းၼႃႈၼႆႉ။
ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းၼိုင်ႈၼႂ်း 8 ၸုမ်း ဢၼ်လူင်းလၢႆးမိုဝ်းလိၵ်ႈႁူမ်ႈမၢႆ ၵိုတ်းတိုၵ်းတူဝ်ႈမိူင်း (NCA) ဝႆႉတင်း လူင်ပွင်ၸိုင်ႈမၢၼ်ႈ တပ်ႉမတေႃႇမၢၼ်ႈ။ ၽွင်းၵေႃႇသၢင်ႈလွင်ႈငမ်းယဵၼ်ယူႇၼႆႉ ပၢင်ၵုမ်လူင်လွင်ႈငမ်းယဵၼ်ၸၼ်ႉ ၸိုင်ႈမိူင်းႁူမ်ႈတုမ် ႁိုဝ် ပၢင်ၵုမ်လူင်ပၢင်လူင်ႁူဝ်ပၢၵ်ႇပီ 21 ပၢင်လူင်ၵေႃႈ ၶိုၼ်ႈႁွတ်ႈၶဝ်ႈႁူမ်ႈ ဢုပ်ႇဢူဝ်းၵၢၼ်မိူင်းမႃး။ ပဵၼ်ၸုမ်းမီးသုၼ်ႇလႆႈၸတ်း ပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈ ၸၢဝ်းၶိူဝ်းၽႂ်မၼ်း ၸွမ်းၼင်ႇၶၵ်ႉတွၼ်ႈၼႂ်းလိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်းတူဝ်ႈမိူင်း NCA မီးဝႆႉ။
ၸွမ်းၼင်ႇလိၵ်ႈႁူမ်ႈမၢႆၵိုတ်းတိုၵ်းတူဝ်ႈမိူင်း NCA ၼၼ်ႉ ၸုမ်းလူင်းလၢႆးမိုဝ်း မီးသုၼ်ႇဢွၼ်ႁူဝ်ၼမ်းၼႃႈ ၸတ်းပၢင်ၵုမ်ၸၼ်ႉၸိူဝ်ႉၸၢတ်ႈၸၢဝ်းၶိူဝ်းၽႂ်မၼ်းသေတႃႉ မိူဝ်ႈ RCSS ဢွၼ်ႁူဝ်ၼမ်းၼႃႈ လူင်းပိုၼ်ႉတီႈႁူပ်ႉထူပ်းၵူၼ်းမိူင်း တႃႇႁၢင်ႈႁႅၼ်းၸတ်းပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈ ၸၢဝ်းၶိူဝ်းတႆး ပူၼ်ႉမႃးမိူဝ်ႈၽွင်းႁူဝ်လိူၼ်ၻီႊသႅမ်ႊၿိူဝ်ႊ 2017 ၼၼ်ႉ လႆႈထုၵ်ႇတပ်ႉသိုၵ်းမၢၼ်ႈႁႄႉႁၢမ်ႈ၊ ဢမ်ႇပၼ်ၸတ်းႁဵတ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ