ႁွင်ႈၵၢၼ်ၾၢႆႇႁႅင်းၵၢၼ်ထႆး ပိုၼ်ၽၢဝ်ႇႁႂ်ႈႁႅင်းၵၢၼ်ယၢၼ်မိူင်း သႂ်ႇၸႂ်တေႃႇဝတ်းဝႂ်ဝႆးဝႆး

ၾၢႆႇၸတ်းႁႃၵၢၼ်ငၢၼ်းၵဵင်းမႆႇ ၸိုင်ႈထႆး ဢွၵ်ႇလိၵ်ႈထိုင်ပေႃႈလဵင်ႉ/မႄႈလဵင်ႉလႄႈ ႁႅင်းၵၢၼ်ၸိူဝ်း ဢႃယုဝတ်းဝႂ် တေမူတ်းဝၼ်းတီႈ 31/03/2018 ၼႆႉ ႁႂ်ႈဢွၼ်ၵၼ်ၼႅတ်ႈၵႂႃႇ ႁဵတ်းၸွမ်းၼင်ႇ ၶၢဝ်းယၢမ်းဢၼ် မၵ်းမၼ်ႈဝႆႉ ဝႃႈၼႆ။

ဝၼ်းတီႈ 05/03/2018 ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ပိုၼ်ၽၢဝ်ႇႁႂ်ႈႁႅင်းၵၢၼ်ပေႃႈ လဵင်ႉ/မႄႈလဵင်ႉလႄႈ ႁႅင်းၵၢၼ်ၸိူဝ်းယိပ်းဝႂ်သီၶွင်ႇ၊ ဝႂ်ၸပ်းၵူႈ (ဢၼ်လူင်ပွင်ၸိုင်ႈ သိုၵ်းႁဵတ်းပၼ်) ဢၼ်ဝႂ်ႁဵတ်းၵၢၼ် တေမူတ်းဢႃယုဝၼ်းတီႈ 31/03/2018 ၸိူဝ်းဢၼ်ထတ်းထွင်ၵူၼ်း ၵိုၵ်းမိူင်း ယဝ်ႉလႄႈသင်၊ ပႆႇလႆႈထတ်းထွင်လႄႈသင် ၸိူဝ်းဢၼ်ထတ်းထွင်ႁဵတ်း Passport သီၶဵဝ်ဢမ်ႇ ၼၼ်ႉ သီလႅင်ၸိူဝ်းၼၼ်ႉလႄႈသင် ႁႂ်ႈဢွၼ်ၵၼ်ၵႂႃႇၶပ်းၶိုင်ဝႆးဝႆးဝႃႈၼႆ။

ၼၢင်းၽွၼ်းပဝိၼ်း ဝိၶျိတ်ႉ ႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်းၵဵင်းမႆႇ လၢတ်ႈဝႃႈ – “ ယၢမ်းလဵဝ်ႁဝ်းပိုတ်ႇ ဝႆႉ One stop Service : OSS (ႁဵတ်းတီႈလဵဝ်ၵၼ်ႁႂ်ႈယဝ်ႉတူဝ်ႈမူတ်း) ဢမ်ႇဝႃႈႁွင်ႈၵၢၼ်ၾၢႆႇတေႃးမေႃး၊ ၾၢႆႇပၢႆးယူႇလီ၊ ၾၢႆႇႁႅင်း ၵၢၼ်လိူဝ်ၼၼ်ႉ ယင်းမီးၸဝ်ႈၼႃႈတီႈမၢၼ်ႈ မႃးႁဵတ်းပၼ် CI ၸိူဝ်းၼႆႉ၊ မီးတီႈ ၼႆႈတီႈလဵဝ် ႁဵတ်းပၼ်ၵူႈဝၼ်း ၵၢင်ၼႂ် 08:30 မူင်း တေႃႇပေႃးယဝ်ႉ ။ ၵွပ်ႈၼၼ်လႄႈ ဝတ်းဝႂ်ၽႂ်တေ မူတ်း 31 /03 /2018 ၼႆႉ ဢွၼ်ၵၼ်ၼႅတ်ႈမႃးႁဵတ်းသေၵမ်း ပေႃးပူၼ်ႉၶၢဝ်းယၢမ်းယဝ်ႉတေယၢပ်ႇ ” ဝႃႈၼႆ။

ၼၢင်းမူၼ်း ႁႅင်းၵၢၼ်လၢတ်ႈဝႃႈ – “ ၸၢတ်ႈပၢၼ်ၵူၼ်းမႃးႁဵတ်းၵၢၼ်မိူင်းထႆးၼႆႉ တုၵ်ႉၶၼႃႇၶႃႈ ။ မၢင် ၵေႃႉမႃးၸဵမ်မိူဝ်ႈ 3 -4 မူင်းၵၢင်ၼႂ် မၢင်ၸိူဝ်းၸႂ်ႉၶၢဝ်းယၢမ်းပဵၼ်လၢႆဝၼ်းၸင်ႇယဝ်ႉ၊ ၵူၼ်းၼမ်တႄႉ ၊ ယူႇမိူင်းထႆးၵႃႈၸႂ်ႉ ၸၢႆႇၵေႃႈၼမ် တႃႇတေၵဵပ်းႁွမ်လႆႈငိုၼ်းမီးငိုၼ်းၼႆႉတႄႉ ဢမ်ႇငၢႆႈၶႃႈ ” ဝႃႈၼႆ။

မိူဝ်ႈလဵဝ်ႁႅင်းၵၢၼ်ယၢၼ်မိူင်း ဢၼ်ၽၢၼ်ႇပူၼ်ႉၶၵ်ႉတွၼ်ႈထတ်းထွင်ၵူၼ်းၵိုၵ်းမိူင်းယဝ်ႉမီး 988,798 ၵေႃႉ ၸႅၵ်ႇပဵၼ် ၵမ်းပူးၶျႃး 157,232၊ ၵူၼ်းလၢဝ်း 47,475 ၊ၵူၼ်းမိူင်းမၢၼ်ႈ 784,091 ၵေႃႉ ၵိုတ်းထႅင်ႈ 698,675 ၵေႃႉ ပႆႇလႆႈထတ်းထွင် ဝႃႈၼႆ။