ၵူၼ်းၵေႃႉၼိုင်ႈယိပ်းၵွင်ႈပွတ်း ၶဝ်ႈယေးငိုၼ်း ၵမ်ႇပေႃးၸ ၼႂ်းဝဵင်းၵျွၵ်ႉမႄး ၸူၼ်ဢဝ်ငိုၼ်းၵႂႃႇ။
မိူဝ်ႈၼႆႉ ဝၼ်းတီႈ 3/9/2021 ယၢမ်းဝၢႆးဝၼ်း မွၵ်ႈ 2 မူင်းၶိုင်ႈ မီးၵူၼ်းႁၢႆႉၵေႃႉၼိုင်ႈ ယိပ်းၵွင်ႈပွတ်းသေ ၶဝ်ႈၸူၼ်ၼႂ်းယေး ငိုၼ်း ၵမ်ႇပေႃးၸ ၼႂ်းဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ တၼ်းၸူၼ်ဢဝ်ၵႂႃႇငိုၼ်းၵႃႈႁိုဝ်တႄႉပႆႇႁူႉ ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵေႃႉၼိုင်ႈ တီႈၵျွၵ်ႉမႄး လၢတ်ႈၼႄၽူႈတွႆႇႁွၵ်ႈဝႃႈ – “ပၢၼ်ႇၼႆႉ ၶဝ်ဢမ်ႇပိုတ်ႇတၢင်း ၼႃႈ မိူၼ်မိူဝ်ႈၵူႈပွၵ်ႈ ၶဝ်ပိုတ်ႇပၼ်ၵူၼ်းၶဝ်ႈတၢင်းလင်ၵူၺ်း။ ႁဵတ်းႁိုဝ်လႄႈ ထုၵ်ႇၸူၼ်ဢၼ်ဝႃႈၼၼ်ႉ ဢမ်ႇလႆႈႁူႉ လွင်ႈတၢင်းမၼ်းလီၶႃႈ။ ၸူၼ်တႄႉ ၶဝ်ႈၸူၼ်တႄႉၶႃႈဢေႃႈ။ ဢၼ်ဝႃႈပႃးငိုၼ်းၵႂႃႇၵႃႈႁိုဝ်ၼၼ်ႉၵေႃႈ ဢမ်ႇလႆႈႁူႉၶႃႈ”- ဝႃႈၼႆ။
ၵူၼ်းႁၢႆႉ ဢၼ်ၶဝ်ႈၸူၼ် ၼႂ်းယေးငိုၼ်း ၵမ်ႇပေႃးၸ တီႈဝဵင်းၵျွၵ်ႉမႄး မိူဝ်ႈၼႆႉ မႃးၵေႃႉလဵဝ်မၼ်းၵူၺ်း။ ၶီႈၵႃးသႅၼ်း Mark 2 သီၶၢဝ်မႃး ။
“ယၢမ်းလဵဝ်ၼႆႉ ၵၢၼ်မိူင်းၵေႃႈသုၵ်ႉ တၢင်းပဵၼ်ၶူဝ်ႊဝိတ်ႉ ၵေႃႈၽႄႈလၢမ်းသေ ၵူၼ်းၼႆႉ ႁႃၵိၼ်လဵင်ႉတွင်ႉယၢပ်ႇၽိုတ်ႇ ၵၼ် ၵၢၼ်မိူၵ်ႈၵၢၼ်လိူင်းၵေႃႈ ၼမ်မႃးၶႃႈယဝ်ႉ။ တီႈၵျွၵ်ႉမႄးၼႆႉ ၵူၼ်းၸိူဝ်းတင်ႈၸုမ်းၶိုၼ်ႈမႃးသေ သႂ်ႇၸိုဝ်ႈၸုမ်း ယိပ်းၵွင်ႈၵၢင်ႇ ၸုမ်းၼၼ်ႉၸုမ်းၼႆႉသေ လေႇႁႃၵဵပ်းယွၼ်းငိုၼ်း ၸိူဝ်းၼႆႉ ၵေႃႈမီးမႃးတင်းၼမ်ယဝ်ႉ တီႈၵျွၵ်ႉမႄးၼႆႉ။ ယွၼ်ႉပၵ်းပိူင်မၢႆမီႈဢမ်ႇသုမ်ႇငမ်းလႆႈၶႃႈဢေႃႈ”- ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၵျွၵ်ႉမႄး လၢတ်ႈၼႄၼင်ႇၼႆ။
ဢိင်ၼိူဝ် လွင်ႈၵၢၼ်ၸူၼ်တီႈယေးငိုၼ်း/ ၵၢမ်ႇပေႃးၸႃႉၼႆႉသေ ယၢမ်းလဵဝ် ယူႇတီႈယေး/ ပလိၵ်ႈလႄႈ သိုၵ်းမၢၼ်ႈ တိုၵ်ႉ ၵူတ်ႇထတ်းလႄႈ ၸႅတ်ႈထၢမ် ၽူႈမီးပုၼ်ႈၽွၼ်း ၶဝ်ဝႆႉယူႇ ၵူၼ်းပိုၼ်ႉတီႈ ၵျွၵ်ႉမႄး လၢတ်ႈၼႄၼင်ႇၼႆ။
