ၼႂ်းဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် Lockdown ဝႆႉၸူဝ်ႈၶၢဝ်း တႃႇၶၢဝ်းတၢင်း 14 ဝၼ်း တႃႇၵုမ်းၵမ် ၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 ။
တႄႇဢဝ် ဝၼ်းတီႈ 29/8/2021 မႃး ၼႂ်းဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ပိၵ်ႉ ဢိုတ်း Lockdown ဢိူင်ႇဝႆႉ တႃႇၶၢဝ်းတၢင်း 14 ဝၼ်း။ ယွၼ်ႉဝႃႈ ယၢမ်းလဵဝ် ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 မီး 10 ပၢႆလႄႈ ၼင်ႇႁိုဝ် တၢင်းပဵၼ်ပေႃးတေ လူတ်းယွမ်းလူင်းသေ ပေႃးတေၵုမ်းၵမ်လႆႈၼၼ်ႉ ၸင်ႇလႆႈ ပိၵ်ႉဢိုတ်း ၸူဝ်ႈၶၢဝ်း ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ဢိူင်ႇတူင်ႇလၢဝ်း ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “တီႈဢိူင်ႇႁဝ်းၶႃႈၼႆႉ ယွၼ်ႉ ၵုမ်းၵမ်ၵၼ်ဢမ်ႇလႆႈၶႃႈဢေႃႈ ယဝ်ႉၵေႃႈ ဢမ်ႇမီးလွင်ႈယုမ်ႇၵၼ်သေ ၵွပ်ႈၼႆလႄႈ လႆႈ Lockdown တၢင်းဢိူင်ႇ။ ႁႂ်ႈ Stay at home ၵၼ်မူတ်းမူတ်း။ ႁၢမ်ႈၵူၼ်းတၢင်းၼွၵ်ႈ တၢင်းၼႂ်း ၶဝ်ႈဢွၵ်ႇ ၵူႈဝၢၼ်ႈၶႃႈ ဢၼ်မီးၼႂ်းဢိူင်ႇတူင်ႇလၢဝ်းၼႆႉ။ တီႈ ဢိူင်ႇတူင်ႇလၢဝ်းႁဝ်းၶႃႈၼႆႉ တေႃႇထိုင် ဝၼ်းတီႈ 30/8/2021 ၵူၼ်းပဵၼ်တင်းမူတ်းမီးၵႂႃႇ 13 ၵေႃႉ။ မိူဝ်ႈၼႆႉ လႆႈငိၼ်းထႅင်ႈ ဝႃႈ တိတ်းၸပ်း 5 ၵေႃႉၼႆၶႃႈ။ ၵူၺ်းၵႃႈ တႃႇ 5 ၵေႃႉၼႆႉ ပႆႇယိုၼ်ယၼ် လႆႈၶေႃႈမုလ်းမၼ်းတႅတ်ႈတေႃးၶႃႈ။ ပေႃးဝႃႈ 5 ၵေႃႉၼၼ်ႉ ပဵၼ်ထႅင်ႈၼႆ တင်းမူတ်း ႁူမ်ႈၵၼ် တေမီး 18 ၵေႃႉယဝ်ႉ”- ဝႃႈၼႆ။
ယၢမ်းလဵဝ် ၵူၼ်းပဵၼ် 13 ၵေႃႉၼႆႉ လႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင် ၸႄႈဝဵင်းမိူင်းၵိုင် ၼႆ ယဝ်ႉ။
“ယူႇတီႈႁဝ်းၶႃႈသေ ၶႂ်ႈတုၵ်းသူၼ်းထိုင် ၵူၼ်းၼႂ်းဢိူင်ႇႁဝ်းၶႃႈတႄႉ ႁႂ်ႈမီးလွင်ႈယုမ်ႇယမ်ၵၼ် ။ ႁႂ်ႈမေႃပွင်ႇၸႂ်ၵၼ် ။ပေႃးႁဝ်းၶႃႈ ဢွၼ်ၵၼ်ၵၵ်းတူဝ် ယူႇဝႆႉ ၼႂ်းႁိူၼ်းၶၢဝ်းတၢင်း 14 ဝၼ်းၼႆ တၢင်းပဵၼ်ၼႆႉ တေလူတ်းယွမ်းလူင်းၵႂႃႇယူႇ”- ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၼႂ်း ဢိူင်ႇတူင်ႇလၢဝ်း သိုပ်ႇတုၵ်းသူၼ်းလၢတ်ႈၼႄၼင်ႇၼႆ။
ၼႂ်းဢိူင်ႇတူင်ႇလၢဝ်းၼႆႉ တင်းမူတ်းမီး 10 ဝၢၼ်ႈ မိူၼ်ၼင်ႇ ဝၢၼ်ႈၽၵ်းႁီႉ၊ ဝၢၼ်ႈတူင်ႇလၢဝ်း ပွၵ်ႉ 1 ၊ တူင်ႇလၢဝ်း ပွၵ်ႉ 2 ၊ ဝၢၼ်ႈမၢၵ်ႇၶီႇၼူၵ်ႉ၊ ဝၢၼ်ႈၵုင်းသႃႇ၊ ဝၢၼ်ႈတူၼ်ႈၵႅင်း၊ ဝၢၼ်ႈၼမ်ႉၵတ်း၊ ဝၢၼ်ႈပၢင်ႇလေႃႉ၊ ဝၢၼ်ႈသႃးတေႃးလႄႈ ဝၢၼ်ႈပၢင်ပွႆး ၸိူဝ်းၼႆႉ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၼႂ်းၸႄႈဝဵင်းမိူင်းၵိုင်ၼႆႉ တင်းမူတ်းမီးၵူၼ်းတိတ်းၸပ်းၸိူဝ်ႉမႅင်းၵႂႃႇ 70 ပၢႆယဝ်ႉ ဝႃႈၼႆ။
ယွၼ်ႉသိုၵ်းတႆး 2 ၸုမ်းပိုတ်းယိုဝ်းတိုၵ်းတေႃးၵၼ်လႄႈ ၼႂ်းဢိူင်ႇတူင်ႇလၢဝ်းၼႆႉ မီးၵူၼ်းပၢႆႈၽေးသိုၵ်း လုၵ်ႉဝဵင်းၼမ်ႉလၼ်ႈမႃး ႁူဝ်ၵူၼ်း 200 ပၢႆ ။ မႃးသွၼ်ႈဝႆႉ တီႈဝတ်ႉပၢင်လၢင်ႈ လႄႈ ႁူင်းႁဵၼ်း ဝၢၼ်ႈၽၵ်းႁီႉ။ ၵူၺ်းၵႃႈ ႁၢင်လိူၼ်ဢေႃႊၵတ်ႊသ်ပူၼ်ႉမႃးၼႆႉ ဢွၼ်ၵၼ်ပွၵ်ႈၶိုၼ်းႁိူၼ်းယေး မူတ်းယဝ်ႉ။
