ၵူၼ်းဝၢၼ်ႈ ၼႂ်း ၸႄႈဝဵင်းမိူင်းၵူဝ်း ႁၼ်တူဝ်တၢႆ သိုၵ်းမၢၼ်ႈ ႁိမ်းၸမ် 20 တီႈဝၢၼ်ႈၵဝ်ႇလဝ်ႇႁၢမ်း ဢၼ်မီးႁိမ်းၸမ် ဝၢၼ်ႈၼမ်ႉႁူးလႄႈဝၼ်ႈယိတ်ႉၶူႇ ၊ ႁိမ်းဝၢၼ်ႈၵဝ်ႇသမ်ႉမီးၵႃးသိုၵ်းမၢၼ်ႈလမ်းၼိုင်ႈလႄႈတူဝ်တၢႆၼၢင်းယိင်း 2 ၵေႃႉ။
ၵူၼ်းပိုၼ်ႉတီႈၵေႃႉၼိုင်ႈလၢတ်ႈဝႃႈ – “ တီႈႁိမ်းဝၢၼ်ႈယိတ်ႉၶူႇလႄႈဝၢၼ်ႈၼမ်ႉႁူးၼႆႉ မီးဝၢၼ်ႈ ၵဝ်ႇဝၢၼ်ႈၼိုင်ႈဢေႃႈ။ ၸွမ်းၼင်ႇဝႃႈပဵၼ်ဝၢၼ်ႈၵဝ်ႇလႄႈ ယုမ်းၵေႃႈၼႃဢေႃႈ။ မိူဝ်ႈဝႃးၼႆႉသမ်ႉ မီးၵူၼ်းဝၢၼ်ႈ ၵႂႃႇၵၢၼ် သမ်ႉလတ်းၵႂႃႇတၢင်းၼၼ်ႉလႄႈ ႁၼ်မႅၼ်ႈတူဝ်တၢႆၵူၼ် 17 ၵေႃႉ သႂ်ႇသိူဝ်ႈၶူဝ်းသိုၵ်းမၢၼ်ႈလၢႆလၢႆ။ႁိမ်းၼၼ်ႉသမ်ႉမီးၵႃးသိုၵ်းမၢၼ်ႈလမ်းၼိုင်ႈ မီးမႄႈယိင်း 2 ၵေႃႉတၢႆဝႆႉၼိူဝ်ၵႃး။ ႁဵတ်းႁိုဝ်လႄႈၶဝ်မႃးတၢႆဝႆႉယူႇတီႈဝၢၼ်ႈၵဝ်ႇၼႆႉၵေႃႈဢမ်ႇႁူႉၶႃႈ။ ႁဝ်းၶႃႈၵူၼ်းဝၢၼ်ႈႁိမ်းၸမ်ၼႆႉတႄႉ မႆႈၸႂ်ဝႆႉယူႇၶႃႈဢေႃႈ ၵူဝ်လႆႈယူႇယၢပ်ႇယွၼ်ႉၶဝ်”- ဝႃႈၼႆ။
ၵူၼ်းဝၢၼ်ႈ တင်း 2 ဝၢၼ်ႈတႄႉလၢတ်ႈဝႃႈ မၢတ်ႇၸဵပ်းမႃးၼႂ်းပၢင်တိုၵ်းသေမႃး တၢႆ တီႈၼႆႈတႄႉဢမ်ႇလႅပ်ႈပဵၼ်လႆႈ။ ၵွပ်ႈပိူဝ်ႈဝႃႈ ၵူၼ်းတၢႆၼႆႉ မၼ်းယႅၵ်ႈၵၼ်သေတၢႆဝႆႉ 2 တီႈ -ဝႃႈၼႆ။
“မိူဝ်ႈၵူႈပွၵ်ႈ တၢင်းႁဝ်းၶႃႈယူႇၼႆႉ ပၼ်ႁႃၸိူင်ႉၼႆဢမ်ႇယၢမ်ႈမီးၶႃႈ။ ယၢမ်းလဵဝ်သမ်ႉ တီႈမိူင်းၵူဝ်းၼႆႉ မီးပၢင်တိုၵ်း။ ၼိူဝ်ၵႃးသိုၵ်းၶဝ်ဢၼ်ၸွတ်ႇဝႆႉႁိမ်းၼၼ်ႉသမ်ႉမီးဝႆႉၽူႈယိင်းတၢႆ 2 ၵေႃႉ။ ၼႆႉပဵၼ်ဢၼ်လီဝူၼ်ႉတႄႉတႄႉၶႃႈ။ မၢင်ၵမ်းၵေႃႈလီၵူဝ်ဝႃႈပဵၼ်ၶဝ်တီႉၵူၼ်းဝၢၼ်ႈတီႈလႂ်မႃးသေ ဢဝ်သိူဝ်ႈၶူဝ်းသိုၵ်းမၢၼ်ႈၶဝ်သုပ်းပၼ်ဝႆႉၵေႃႈပဵၼ်လႆႈၶႃႈလူး ပေႃးၶဝ်ၶႂ်ႈပၼ်တၢင်းတုၵ်ႉၶ တီႈၵူၼ်းဝၢၼ်ႈမႃး ”- ၵူၼ်းမိူင်းၵူဝ်းတႄႉ ပၼ်တၢင်းႁၼ်ထိုင်ၼင်ႇၼႆ။
ၵူၺ်းၵႃႈယူႇတီႈၵူၼ်းဝၢၼ်ႈ လႆႈသူင်ႇၶၢဝ်ႇၸူးပလိၵ်ႈလႄႈၽူႈမီးပုၼ်ႈၽွၼ်း ၾၢႆႇၵဵဝ်ႇၶွင်ႈ ဝႆႉယဝ်ႉၼင်ႇၵဝ်ႇ လႆႈႁူႉၼင်ႇၼႆ။
ယၢမ်းလဵဝ် တီႈမိူင်းၵူဝ်းၼႆႉ သိုၵ်းဢူၺ်းလီပွတ်းႁွင်ႇ ဢၼ် KIA , MNDAA လႄႈသိုၵ်းမၢၼ်ႈယိုဝ်းၵၼ် ၵူၼ်းမိူင်းပၢႆႈၽေးသိုၵ်းမီး 600 ပၢႆ။
