ပၢင်တိုၵ်းၼႂ်းၵႄႈသိုၵ်းဢူၺ်းလီပွတ်းႁွင်ႇလႄႈ သိုၵ်းမၢၼ်ႈယိုတ်းမိူင်း ဢၼ်ပဵၼ်ၼႂ်းၵိင်ႇၸႄႈဝဵင်းမိူင်းၵူဝ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇၼၼ်ႉ ယင်းပႆႇယဵၼ်သဝ်း၊ သိုၵ်းမၢၼ်ႈယိုဝ်းၵွင်ႈလူင်ၶဝ်ႈၼႂ်းဝၢၼ်ႈလႄႈၵူၼ်းပၢႆႈၽေးသိုၵ်းမီးထိုင် 600 ပၢႆ။

 သိုၵ်းမၢၼ်ႈယိုတ်းမိူင်းလႄႈ သိုၵ်းဢူၺ်းလီပွတ်းႁွင်ႇ ပိုတ်းယိုဝ်းၵၼ် တင်ႈတႄႇဝၼ်းတီႈ 28 တေႃႇထိုင်ဝၼ်း ဝၼ်းတီႈ 30/8/2021 ။

ၵူၼ်းၼုမ်ႇတႆး ဢၼ်ယူႇၼႂ်းၸုမ်းတူင်ႇဝူင်းၵူၼ်းသေ ၸွႆႈထႅမ်ၵူၼ်းပၢႆႈၽေးသိုၵ်းယူႇၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ ယိုဝ်းၵွင်ႈလူင် လူင်ၵႂႃႇၵူႈတၢင်း။ ၾၢႆႇသိုၵ်းၵဝ်ႈၵၢင်ႉၵေႃႈယိုဝ်းၵွင်ႈလူင်တေႃႇၸုမ်းသိုၵ်းမၢၼ်ႈ။ ပေႃးသိုၵ်းၵဝ်ႈၵၢင်ႉယိုဝ်း သိုၵ်းမၢၼ်ႈသမ်ႉ ယိင်ႈၶႅၼ်းယိုဝ်းၵွင်ႈလူင်ၵႂႃႇ ၵူႈႁူးၵူႈတၢင်း ႁဵတ်းႁႂ်ႈတူၵ်းသႂ်ႇႁိူၼ်းၵူၼ်းဝၢၼ်ႈ။ ၵူၼ်းဝၢၼ်ႈတၢႆ 4 ၵေႃႉပေႃႈမႄႈလုၵ်ႈ။ ပၢႆႈၽေးသိုၵ်းမီး 600 ပၢႆ ”- ဝႃႈၼႆ။

သိုၵ်းမၢၼ်ႈလႄႈသိုၵ်းၵဝ်ႈၵၢင်ႉယိုဝ်းၵၼ်မႃးၶၢဝ်းတၢင်းမွၵ်ႈ 1 လိူၼ်။ ဝၼ်းတီႈ 28 လႄႈ 29 ၼႆႉ လႆႈဝႃႈ ပၢင်တိုၵ်းႁၢဝ်ႈႁႅင်းလိူဝ်ပိူၼ်ႈ။ ယၢမ်းလဵဝ်ပဵၼ်ၶၢဝ်းၵူၼ်းမိူင်းပၢႆႈၽေးသိုၵ်းလႄႈ လွင်ႈလူႉသုမ်းလႄႈမၢတ်ႇၸဵပ်းလူႉတၢႆ ဢမ်ႇပႆႇႁူႉတႅတ်ႈတေႃး။

 ယၢမ်းလဵဝ် ဢၼ်လႆႈပၢႆႈၽေးသိုၵ်းဝႆႉ ပဵၼ်ၵူၼ်းဝၢၼ်ႈၼမ်ႉႁႃႉ လင်ႁိူၼ်း 500 ပၢႆ၊ ၵူၼ်းဝၢၼ်ႈၵွင်းလူင် လင်ႁိူၼ်း 20 ပၢႆ၊ ၵူၼ်းဝၢၼ်ႈႁိမ်းႁွမ်းၸိူဝ်းပဵၼ်ပၢင်တိုၵ်း လၢႆလၢႆဝၢၼ်ႈ 600 ၵေႃႉပၢႆ  ၸိူဝ်းၼႆႉႁွတ်ႈထိုင်ဝႆႉတီႈ ၵျွင်းမုၼ်ၸဝ်ႈမၢၼ်ႈပၢင်ႇ၊ ၵျွင်းၽြႃးၶရိယၼ်ႇ ၊ ယူႇၸွမ်းသုမ်ႉၶၢႆၶူဝ်းၼႂ်းၵၢၼ်ႇၼႂ်းသႃး ၸိူဝ်းၼႆႉ – ၵူၼ်းမိူင်းၵူဝ်းၵေႃႉၼိုင်ႈ လၢတ်ႈၼင်ႇၼႆ။

“ပၢင်တိုၵ်းတႄႉ တိုၵ်ႉပဵၼ်ယူႇတေႃႇထိုင်မိူဝ်ႈဝႃး မိူဝ်ႈၼႆႉ တိုၵ်ႉၶဵင်ႈၶႅင်ၵၼ်ယူႇ လႄႈၵူၼ်းပၢႆႈၽေးသိုၵ်းတႄႉယႃႇဝႃႈတေပွၵ်ႈႁိူၼ်းလႃႈ ယင်းၸၢင်ႈၼမ်မႃးထႅင်ႈယူႇဢေႃႈ။” – ၵူၼ်းမိူင်းၵူဝ်းၵေႃႈၼိုင်ႈလၢတ်ႈ။

ပၢင်တိုၵ်းသိုၵ်းမၢၼ်ႈလႄႈ သိုၵ်းၵဝ်ႈၵၢင်ႉ MNDAA ၼႆႉပဵၼ်မႃးၸဵမ်ႁူဝ်လိူၼ်ၵျူႊလၢႆႊလႄႈ ၵူၼ်းမိူင်းၽွင်းသႅင်၊ မၢၼ်ႈပၢင်ႇ၊ ပၢင်မူၺ်မွၵ်ႈ 200 ပၢႆလႆႈပၢႆႈယၢၼ်ႁိူၼ်းယေးတီႈယူႇသေ ၵႂႃႇသွၼ်ႈဝႆႉတီႈလႅၼ်လိၼ် ထႆး-မၢၼ်ႈ ၊တေႃႇထိုင်ဝၼ်းမိူဝ်ႈၼႆႉပႆႇၸၢင်ႈပွၵ်ႈၶိုၼ်းႁိူၼ်းယေး။