ၵူၼ်းၵျွၵ်ႉမႄး 2 ၵေႃႉပေႃႈလုၵ်ႈ ၵႂႃႇႁႃၼေႃႇသေ ၵႂႃႇယဵပ်ႇၺႃးမၢၵ်ႇမႅင်းၾင်လိၼ် တီႈႁိမ်းဝၢၼ်ႈၼမ်ႉမင်း ဢၼ်ယၢၼ်ၵႆဝဵင်းၵျွၵ်ႉမႄးမွၵ်ႈ 12 လၵ်း ၸၢၵ်ႇမၢၵ်ႇ တႅၵ်ႇတိူဝ်ႉသႂ်ႇမၢတ်ႇၸဵပ်းတင်း 2 ပေႃႈလုၵ်ႈ။
“ဝၼ်းတီႈ 15/8/2021 ၵူၼ်းဝၢၼ်ႈၼမ်ႉမင်း သွင်ၵေႃႉပေႃႈလုၵ်ႈ ၵႂႃႇႁႃၼေႃႇသေ ယဵပ်ႇၺႃးမၢၵ်ႇမႅင်းၾင်လိၼ်။ ပေႃႈမၼ်းမၢတ်ႇၸဵပ်းတီႈၶႃႈလူင် လုၵ်ႈၸၢႆးမၼ်းၺႃးၸၢၵ်ႇမၢၵ်ႇတီႈ ႁူဝ်ၶဝ်ႇ ” ၵူၼ်းႁူႉၸၵ်းၸမ်ၸႂ်ၵၼ်တင်း 2 ၵေႃႉပေႃႈလုၵ်ႈၼၼ်ႉလၢတ်ႈၽူႈတွႆႇႁွၵ်ႈၼင်ႇၼႆ။
ၵေႃႉပဵၼ်ပေႃႈၸိုဝ်ႈႁွင်ႉ ဢူးဢွင်ႇလေး ဢႃယု 48 ပီလႄႈၵေႃႉပဵၼ်လုၵ်ႈၸၢႆး ပဵၼ်ၸၢႆးလိူၼ် ဢႃယု 24 ပီ။ ပဵၼ်ၵူၼ်းပွၵ်ႉ 8 ၵျွၵ်ႉမႄး။ ၸဵမ်မိူဝ်ႈၾူၼ်တႄႇသိင်း ၶႃသွင်ၵေႃႉပေႃႈလုၵ်ႈ ၵႂႃႇႁႃၼေႃႇ ႁႃႁဵပ်း ႁိမ်းႁွမ်းၼၼ်ႉၵူႈဝၼ်းဝႃႈၼႆ။
“ဝၼ်းၵွၼ်ႇႁဝ်းၶႃႈၵေႃႈၵႂႃႇႁႃႁဵပ်းႁႃၼေႃႇ တၢင်းၼၼ်ႉယူႇၶႃႈၼႃ။ ဢမ်ႇၸႂ်ႈႁႃးပေႃႈလုၵ်ႈၵူၺ်းၵႂႃႇၼႆႉ။ ၵူၼ်းၼႂ်းဝၢၼ်ႈၵေႃႈၵႂႃႇ။ ၵူၼ်းတၢင်ႇဝၢၼ်ႈၵေႃႈမႃးယဝ်ႉ တၢင်းၼမ်ႉမင်းၼႆႉ။ ဢိူဝ်ႈဝၼ်းၼၼ်ႉတႄႉလႆႈဝႃႈႁႃးပေႃႈလုၵ်ႈၵၢမ်ႇႁၢႆႉၵႂႃႇဢိူဝ်ႈၼေႃႈ ” ဢူးဢွင်ႇလေး ၵေႃႉယဵပ်ႇၺႃးမၢၵ်ႇၼၼ်ႉလၢတ်ႈတီႈၽူႈတွႆႇႁွၵ်ႈၼင်ႇၼႆ။
ထုင်ႉၼၼ်ႉမီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးယူႇသဝ်း ၵူႈၸုမ်း။ ပဵၼ်ၼမ်ႉမိုဝ်းၸုမ်းလႂ်တႄႉဢမ်ႇၸၢင်ႈဝႃႈ – မၼ်းၸၢႆးလၢတ်ႈၼင်ႇၼႆ။
ထုင်ႉၼမ်ႉမင်းၼၼ်ႉ မီးၼေႃႇ မီးႁဵပ်းလိူင်ႇလႄႈ ၵူၼ်းဝၢၼ်ႈၵႂႃႇႁႃမႃးၵိၼ်မႃးၶၢႆၵူႈပီ။ ၵွပ်ႈၼႆလႄႈ ၵူၼ်းႁႃႁဵပ်းၵေႃႈ ထုၵ်ႇလီၾၢင်ႉတူဝ် တႃႇလွတ်ႈၽေးယူႇ ၵူၼ်းဝၢၼ်ႈထုင်ႉၼမ်ႉမင်းလၢတ်ႈ။
“တၢင်း 11 လၵ်း 12 လၵ်း ထုင်ႉဝၢၼ်ႈၼမ်ႉမင်းၼႆႉ ႁဵပ်း ၊ ၼေႃႇ တၢင်းၵိၼ်လိူင်ႇၼႃႇၶႃႈ။ မိူၼ်ၶၢဝ်းယၢမ်းၼႆႉ ပဵၼ်ၶၢဝ်း ႁဵပ်းလိူင်ႇ။ ၵူၼ်းဝၢၼ်ႈမႃးႁႃႁဵပ်းပေႃးၵိုၼ်းဢိုၵ်ႉဢိုၵ်ႉၶႃႈယဝ်ႉ။ တႃႇႁႂ်ႈလွတ်ႈၽေးၼၼ်ႉၵူၼ်းဝၢၼ်ႈၵေႃႈထုၵ်ႇလီၾၢင်ႉယႂ်ႇၼမ်ယူႇဢေႃႈ။ ” မၼ်းၸၢႆးလၢတ်ႈၼင်ႇၼႆ။
ၼႂ်းလိူၼ်ဢေႃးၵၢတ်ႉသ် ဝၼ်းတီႈ 13 ၼႆႉၵေႃႈ ၵူၼ်းဝၢၼ်ႈပၢင်မႃႉ ဢၼ်ပၢႆႈၽေးသိုၵ်းမႃးယူႇသဝ်းဝႆႉၼႂ်းဝၢၼ်ႈၼွင်သိမ်ႇ ဢိူင်ႇပၢင်လႅင် ၸႄႈဝဵင်းၵျွၵ်ႉမႄး ၵႂႃႇႁႃႁဵပ်းႁိမ်းသူၼ်ၼဵင်ႈ ယင်းယဵပ်ႇၺႃးမၢၵ်ႇမႅင်းၾင်လိၼ် တိူဝ်ႉမၢတ်ႇၸဵပ်းႁႅင်း 2 ၵေႃႉ။
“ၶဝ်ၵႂႃႇႁႃႁဵပ်းႁိမ်းသူၼ်ၼဵင်ႈၼၼ်ႉၵူၺ်း။ ၵႂႃႇၶွင်ႉၺႃးသၢႆ မၢၵ်ႇမႅင်း သေ မၢၵ်ႇတႅၵ်ႇတိူဝ်ႉသႂ်ႇၶႃ ။ ၸိုဝ်ႈႁွင်ႉ ယႃႈဢေးၸိင်ႇဢႃယု 40 ပီလႄႈ မၢႆးဢၢႆႈၺီႇ ဢႃယု 31 ပီ။ လုၵ်ႈဢွၼ်ႇဢၼ်ၵႂႃႇၸွမ်းၶႃ 4 ၵေႃႉၼၼ်ႉတႄႉ ဢမ်ႇမၢတ်ႇၸဵပ်း ။ ၶႃသွင်ၵေႃႉတႄႉ ယၢမ်းလဵဝ်ယူတ်းယႃတူဝ်ဝႆႉတီႈႁူင်းယႃ။ ” ၽူႈၸၢႆး ဢၼ်ၸွႆႈထႅမ်တႃႇ ၶႃသွင်ၵေႃႉတေလႆႈယူတ်းယႃတူဝ်ၼၼ်ႉလၢတ်ႈတီႈၽူႈတွႆႇႁွၵ်ႈၼင်ႇၼႆ။
မိူဝ်ႈလိူၼ် ၵျူႊလၢႆႊပူၼ်ႉမႃးၵေႃႈ ၽူႈၸၢႆး ၵူၼ်းဝၢၼ်ႈပၢင်လႅင် ဢႃယု 25 ပီ ၵႂႃႇႁႃႁဵပ်း ႁႃၼေႃႇၼင်ႇၵဝ်ႇ ၼၼ်ႉၵေႃႈယဵပ်ႇၺႃး မၢၵ်ႇမႅင်းလႄႈ မၢတ်ႇၸဵပ်းလိူဝ်ႁႅင်း၊ တေႃႇထိုင်ယၢမ်းလဵဝ် ပႆႇပႆတၢင်းလႆႈၶိုၼ်း။
တီႈဝဵင်းၵျွၵ်ႉမႄးၼႆႉ တၢင်းပဵၼ်ၶူဝ်ႊဝိတ်ႉလၢမ်းၽႄႈႁၢဝ်ႈႁႅင်း၊ ႁႃၵိၼ်လဵင်ႉတွင်ႉယၢပ်ႇ။ ၵွပ်ႈၼႆ လဵၵ်ႉယႂ်ႇၼုမ်ႇထဝ်ႈပႃးၸဵမ်ၵူၼ်းဝဵင်းၵူၼ်းဝၢၼ်ႈ ဢွၼ်ၵၼ်ဢွၵ်ႇႁႃႁဵပ်း ႁႃၼေႃႇမႃးၵိၼ် မႃးၶၢႆ။
