မိူင်းၼၢႆး လၢင်းၶိူဝ်း မွၵ်ႇမႆႇ မိူင်းပၼ်ႇ ၼႂ်းၸႄႈတွၼ်ႈလၢင်းၶိူဝ်း ၵူတ်ႇထတ်း ႁၼ်ၵူၼ်းတိတ်းၸပ်း ၸိူဝ်ႉမႅင်း တၢင်းပဵၼ် ၶူဝ်ႊဝိတ်ႉ 19 တင်းမူတ်း မီးၵႂႃႇ 384 ၵေႃႉ လူႉတၢႆ 9 ၵေႃႉ ဝႃႈၼႆ။
မိူဝ်ႈၼႆႉ ဝၼ်းတီႈ 12/8/2021 ယၢမ်းၵၢင်ၼႂ် ၽူႈၸၢႆး ၵေႃႉၼိုင်ႈ တီႈဝဵင်းၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်းၸၢၼ်း လႆႈလူႉတၢႆ ယွၼ်ႉတၢင်းပဵၼ် ၶူဝ်ႊဝိတ်ႉ 19 ထႅင်ႈၵေႃႉၼိုင်ႈ ယၢမ်းလဵဝ် ၼႂ်းဝဵင်းၵဵင်းတွင်း လူႉတၢႆ ယွၼ်ႉတၢင်းပဵၼ်ၼႆႉ ပဵၼ်ၵေႃႉထူၼ်ႈ 5 ။
ၼၢင်းသီၼူၼ်း မေႃယႃလုမ်းလႃး ၵူၼ်းပဵၼ် တီႈႁူင်းယႃ ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵၢင်ၼႂ် တီႈၵဵင်းတွင်း ၽူႈၸၢႆးၵေႃႉၼိုင်ႈလူႉတၢႆ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၶႃႈ။ တီႈၵဵင်းတွင်းတႄႉ လူႉတၢႆၵႂႃႇ တေမီး 5 ၵေႃႉ ပႃးမိူဝ်ႈၼႆႉၶႃႈ။ ပေႃးဢဝ်ၸႄႈတွၼ်ႈလၢင်းၶိူဝ်းဝႃႈၸိုင် ၵူၼ်းပဵၼ် တင်းမူတ်း မီး 384 ၵေႃႉ လူႉတၢႆယဝ်ႉ 9 ၵေႃႉ”- ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၽႄႈလၢမ်းႁၢဝ်ႈႁႅင်းမႃးၼႆႉ တေႃႇထိုင် ဝၼ်းတီႈ 11/8/2021 မိူဝ်ႈၼႆႉ ၼႂ်းၸႄႈဝဵင်းလၢင်းၶိူဝ်း ၵူၼ်းၸပ်းတင်းပဵၼ်တင်းမူတ်း 157 ၵေႃႉ လူႉတၢႆ ဢမ်ႇ မီး၊ ဝဵင်းၵဵင်း တွင်း 78 ၵေႃႉ လူႉတၢႆ 5 ၵေႃႉ၊ ၸႄႈဝဵင်းမိူင်းၼၢႆး 79 ၵေႃႉ လူႉတၢႆ 2 ၵေႃႉ၊ ၸႄႈဝဵင်းမွၵ်ႇမႆႇမီး 51 ၵေႃႉ လူႉတၢႆ 2 ၵေႃႉ၊ ၸႄႈဝဵင်းမိူင်းပၼ်ႇ 19 ၵေႃႉ လူႉတၢႆဢမ်ႇမီး ။
ၼႂ်းၵူၼ်းပဵၼ် 384 ၵေႃႉၼၼ်ႉ ယၢမ်းလဵဝ် တိုၵ်ႉယူတ်းယႃ တူဝ်ဝႆႉ တီႈႁူင်းယႃ တင်းမူတ်းမီး 130 ၵေႃႉ လႆႈၶႂၢင်ႉလူင်းႁူင်းယႃယဝ်ႉ 245 ၵေႃႉ ။
တႃႇႁႂ်ႈၵူၼ်းမိူင်းတေၵၢင်းယၢၼ်ၽေးၶူဝ်ႊဝိတ်ႉၼၼ်ႉ ၼႂ်းၸႄႈတွၼ်ႈလၢင်းၶိူဝ်းၵေႃႈ ၶိုၼ်းတႄႇသမ်းယႃႈယႃႁႄႉၵင်ႈတၢင်း ပဵၼ်ၶူဝ်ႊဝိတ်ႉ 19 မႃး ။
“တၢင်းမိူင်းပၼ်ႇ လၢင်းၶိူဝ်းတႄႉ တႄႇသမ်းယႃႁႄႉၵင်ႈၶိုၼ်းယဝ်ႉၶႃႈ။ ႁဝ်းၶႃႈၵေႃႈ လႄႇႁႃသေႃႇသူၼ်းသပ်းလႅင်း ၼႄပၼ် ၵူၼ်းမိူင်းပိုၼ်ႉတီႈႁဝ်းၶႃႈ သပ်းလႅင်းလၢတ်ႈၼႄပၼ် ၼင်ႇႁိုဝ် ၵူၼ်းမိူင်းႁဝ်းၶႃႈ ပေႃးတေဢွၼ်ၵၼ်မႃးသမ်းယႃၵၼ်ၶႃႈ ဢေႃႈ။ ၵူၼ်းမိူင်းတႄႉ ဢွၼ်ၵၼ်မႃးသမ်းယႃႁႄႉၵင်ႈၵၼ်ၼမ်ယူႇၶႃႈ”- ၼၢင်းသီၼူၼ်း မေႃယႃလုမ်းလႃး ၵူၼ်းပဵၼ် သိုပ်ႇ လၢတ်ႈၼႄၼင်ႇၼႆ။
တႄႇဢဝ် ႁၢင်လိူၼ်ၵျုႊလၢႆႊ 2021 ၼႆႉမႃး ၼႂ်းၸႄႈမိူင်းတႆး ၵမ်ႈၼမ် ယူႇတီႈၾၢႆႇပၢႆးယူႇလီၶဝ် တႄႇသမ်းယႃႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ပၼ် ၵူၼ်းမိူင်းမႃးယဝ်ႉ။ ယႃႈယႃဢၼ်လႆႈသမ်းပၼ်ၼၼ်ႉတႄႉ ပဵၼ်ယႃႈယႃမိၵ်ႈ Sinopharm ဢၼ်တၢင်းမိူင်းၶႄႇသူင်ႇမႃး ။
